ძარია აქეთ, ლორია იქით: სიმბოლურ ნაკრებში წაგებული გუნდის მეკარეც ხვდება

დიდი შანსია, ირაკლი ძარიამ ჩემპიონთა ლიგაში ითამაშოს. მისი "კუკესი" ალბანეთის სუპერლიგის 29-ე ტურში მიზანს კიდევ უფრო მიუახლოვდა, რადგან უშუალო კონკურენტი, ტირანის "პარტიზანი", შინ 4:0 გაანადგურა...

...პირველ ადგილზე 66 ქულით "შკენდერბეუა". ირაკლი ძარიას გუნდი ლიდერს 12 ქულით ჩამორჩება. მაგრამ გარიგებულ მატჩებში მხილების გამო, "შკენდერბიუ" უეფას ტურნირებზე 10 წლის განმავლობაში ვერ ითამაშებს.

შესაბამისად, ჩემპიონთა ლიგაში ალბანეთს მეორეადგილოსანი წარადგენს. ეს გუნდი კი, დიდი ალბათობით, სწორედ ძარიას "კუკესი" იქნება. ალბანეთის ჩემპიონატის დასრულებამდე 7 ტურია დარჩენილი. ბოლო უქმეებზე გამარჯვების შემდეგ "კუკესი" "პარტიზანს" 9 ქულით უსწრებს და ძნელად სავარაუდოა, ეს უპირატესობა გაანიავოს.

29 წლის ქართველი ნახევარმცველი კი სასტარტო შემადგენლობის შეუცვლელი მოთამაშეა. ახლაც, მან 28-ე წუთზე გოლი გაიტანა და ანგარიში 2:0 გახადა, ისედაც მშვენიერი მატჩი ჩაატარა და გუნდის გამარჯვებაში დიდი როლი ითამაშა. გამოცემა "ვიპსპორტმა" ძარიას გარჯა დაუფასა და ტურის სიმბოლურ ნაკრებში დაასახელა.

"ძარიამ ანგარიში ორამდე გაზარდა და საერთოდაც, "პარტიზანის" წინააღმდეგ ძალიან კარგად ითამაშა. ის "კუკესიში" ერთ-ერთი ყველაზე სასარგებლო ფეხბურთელი იყო", - ასე ასაბუთებს "ვიპსპორტი" თავის არჩევანს.

ძარიამ ალბანეთის სუპერლიგაში ჯერ მხოლოდ 11 მატჩი ჩაატარა და უკვე მეოთხედ მოხვდა ტურის სიმბოლურ ნაკრებში.

ბერლინის "ჰერტასა" და "ვოლსბურგის" ყოფილი მოთამაშე ნდერიმ ნეჯიპი ამჟამად "კუკესის" სპორტული დირექტორია. მიუხედავად იმისა, რომ მაკედონიის ნაკრებში თამაშობდა, ალბანური წარმოშობისაა და ამ ქვეყნის საფეხბურთო სამყაროში კარგი სახელი აქვს. მას გუნდის სატრანსფერო პოლიტიკაზე ჰკითხეს. ნეჯიპმა ძარიაზე გამორჩეულად ილაპარაკა.

"ჩვენმა გუნდმა იანვარში ტექნიკური პერსონალი განაახლა. ამის შედეგად, შემადგენლობაში რამდენიმე ახალი ფეხბურთელი დავიმატეთ - გერმანიიდან, რუმინეთიდან, საბერძნეთიდან, ალბანეთიდან და საქართველოდან. საერთოდ, იანვარში კარგი ტრანსფერი იშვიათობაა, მაგრამ ყველა ახალწვეული დღეს უკვე მნიშვნელოვანი ფიგურაა გუნდში.

მათ ის თვისებები აღმოაჩნდათ, რამაც "კუკესი" საგრძნობლად გააძლიერა. განსაკუთრებით გაოცებული ვარ ირაკლი ძარიათი. ის ჩემთვის ნამდვილი აღმოჩენა იყო - ქართველმა ფეხბურთელმა ყველა მოლოდინს გადააჭარბა. ძარია იანვრის სატრანსფერო პერიოდის გამორჩეული შენაძენი აღმოჩნდა.

მასში დიდი თანხა არ გადაგვიხდია, მაგრამ ძალიან სასარგებლო ფეხბურთელია, მოედანზე უაღრესად ბევრს მუშაობს, კარგად ფლობს ბურთს და მეტოქის შეტევებს ანეიტრალებს. ძარია ისეთი ფეხბურთელია, რომელსაც ნებისმიერი გუნდის მწვრთნელი ინატრებდა", - ამბობს "კუკესის" სპორტული დირექტორი.

ბოლო მატჩის შემდეგ ძარიამ "ლელოსთვის" კომენტარი გააკეთა: "ტირანის "პარტიზანთან" მატჩს ალბანეთში დიდი გამოხმაურება მოჰყვა, რადგან ძლიერი გუნდია, კარგ ფორმაში იყო და თან ჩვენი უშუალო კონკურენტიცაა.

მათ მეორე ადგილზე გასვლა უნდათ და ჩვენთან მოგების შემთხვევაში, სხვაობას 3 ქულამდე შეამცირებდნენ. ასე რომ, ეს მატჩი ორივე გუნდისთვის ძალიან მნიშვნელოვანი იყო. საბედნიეროდ, 4:0 მოვიგეთ, რაც თავისთავად მეტყველებს, რომ გამარჯვება სრულიად დამსახურებულია".

ძარია ფრთხილობს და ამბობს, რომ 9-ქულიანი უპირატესობა მაინც არ ნიშნავს მეორე ადგილის გარანტიას: "კიდევ 7 ტურია დარჩენილი და მაქსიმალურად ვეცდებით, ქულები ავიღოთ.

ახლა "პარტიზანის" 9 ქულით ვუსწრებთ, რაც სერიოზული უპირატესობაა. თუმცა იოლი კალენდარი არ გვაქვს. მაგალითად, შემდეგ ტურში ბოლო ადგილზე მყოფ გუნდს ვხვდებით და ძალიან რთულ თამაშს ველოდებით, რადგან აუტსაიდერი ლიგაში ადგილის შესანარჩუნებლად იბრძვის და ყველაფერს გააკეთებს ქულების ასაღებად.

საერთოდაც, რთულია აქ თამაში, არავინ არაფერს გითმობს. ამას გარდა, ოთხშაბათს ალბანეთის თასის ნახევარფინალში "ლაჩისთან" საპასუხო მატჩი გვაქვს.

პირველი თამაში 0:0 მორჩა და კარგი იქნება, თუ ფინალში გავალთ. პირველივე სეზონში ტიტულების მოპოვება ნებისმიერ ქვეყანაში სასურველი და სასიამოვნოა".

ლორია რომ არა...

მახაჩყალის "ანჟიმ" რუსული ფეხბურთის ერთ-ერთ ლიდერ სანკტ-პეტერბურგის "ზენიტთან" ვერაფერი გააწყო და პრემიერლიგის 26-ე ტურში 0:1 დამარცხდა. გიორგი ლორიამ სტუმართა ძირითად შემადგენლობაში შეუცვლელად ითამაშა.

მოულოდნელად, ინტერნეტგამოცემა ცჰამპიონატ.ცომ-მა სიმბოლურ ნაკრებში არა რომელიმე მოგებული გუნდის მეკარე, არამედ, საქართველოს ნაკრების კიპერი დაასახელა და ამის მიზეზი ლოგიკურად დაასაბუთა.

"წაგებული გუნდის მეკარე სიმბოლურში - ეს იმას ამტკიცებს, რომ მისი "სეივების" გარეშე "ანჟი" უფრო მეტს გაუშვებდა. სანკტ-პეტერბურგში მახაჩყალელებს მართლაც ძალიან გაუჭირდათ, მაგრამ ლორია რომ არა, დიდი ანგარიშით წააგებდნენ. ქართველმა 4 "სეივი" გააკეთა, კუთხურის შემდეგ ივანოვიჩის დარტყმული მოიგერია, პლუს სმოლნიკოვის ძალიან სახიფათო შეტევასაც გადაეღობა", - წერს championat.com.

ტრავმის შემდეგ ლორიამ "ანჟის" კარში ადგილი დაიბრუნა და სასიხარულოა, რომ ბოლო დროს სათამაშო პრაქტიკა აქვს. ეს კი ძალიან მნიშვნელოვანია მისთვისაც და საქართველოს ნაკრებისთვისაც.

ყოველდღიური სპორტული გაზეთი "ლელო"
1341
მკითხველის კომენტარები / 0 /
მსგავსი ამბები
რუბრიკის სხვა სიახლეები