ძველი ფორმატით - დიდი ათი აგვისტოს ბოლოს იწყება

საქართველოს ჩემპიონატი უმაღლესი ლიგის გუნდებს შორის 31 აგვისტოს დაიწყება.

ამჟამად სატრანსფერო ფანჯარა ღიაა და გუნდებმა რაგბის კავშირის საშეჯიბრო კომიტეტში განაცხადები 7 აგვისტომდე უნდა წარადგინონ.

უმაღლეს ლიგაში, ისევე როგორც გასულ სეზონში, ისევ ათი გუნდი ითამაშებს და არც გათამაშების ფორმატი იცვლება.

აქ ხელმოცარული ქუთაისის "ბაგრატის" ნაცვლად პირველად ითამაშებს გუნდი კახეთის რეგიონიდან - ნაფარეულის "ვეფხვები". პირველ ტურში შეჯიბრების დებიუტანტს სერიოზული გამომცდელი, ყველაზე ტიტულოვანი ქართული გუნდი და ქვეყნის მოქმედი ჩემპიონი თბილისის "ლოკომოტივი" ეყოლება.

ჩემპიონობისთვის იბრძოლებენ ასევე: "ბათუმი", ქუთაისის "აია", რუსთავის "ხარები", მარნეულის "არმაზი", გორის "ჯიქი" და თბილისური გუნდები, "ლელო", "აკადემია" და "არმია".

რვა გუნდით იქნება წარმოდგენილი პირველი ლიგის გათამაშება. აქ ფავორიტები, სავარაუდოდ, ქუთაისის გუნდები "ბაგრატი" და "არესი" იქნებიან. უმაღლეს ლიგაში დაბრუნებას შეეცდება ბოლნისის "ყოჩებიც". ბოლო დროს საგრძნობლად მოღონიერდა კიკეთის "იუნკრები". აქვე არიან თბილისის "დინამო", ოზურგეთის "არწივები", თბილისის "ივერია" და პირველ ლიგაში წლეულს აღზევებული ახალციხის "ტაო".

რეგიონული ლიგა ორ ზონადაა გაყოფილი. დასავლეთ ზონაში ექვსი გუნდი ითამაშებს. ესენია: ჭიათურის რაგბის სკოლა, "გორი", ზესტაფონის "არწივები", ქედას "ფირალები", ვანის "აიეტი" და წყალტუბოს "დინოზავრი".

აღმოსავლეთ ზონაში კი პირველობას ერთმანეთს რვა გუნდი შეეცილება. "თელავი", თბილისის "დევები", თბილისის "სტუ", მცხეთის "იბერია სპორტუნი", დუშეთის "ტორნადო", სტეფანწმინდას "ყაზბეგი", თბილისის "წიქარა" და "რუსთავი". შეჯიბრება აქ 1-ელ სექტემბერს დაიწყება.

ყოველდღიური სპორტული გაზეთი "ლელო"
965
მკითხველის კომენტარები / 0 /
მსგავსი ამბები
რუბრიკის სხვა სიახლეები
;