ძიუდოს დიდი აუდიტორია ტოკიოში, პირად-გუნდურ მსოფლიოს ჩემპიონატზე 

25 აგვისტოდან 1 სექტემბრის ჩათვლით ტოკიო ძიუდოისტთა პირად-გუნდურ მსოფლიოს ჩემპიონატს უმასპინძლებს.

აგვისტოს დღეები პირად პრველობას დაეთმობა, როცა ყოველ დღეს ვაჟთა და ქალთა თითო წონების წარმომადგენლები იჭიდავებენ, 1 სექტემბერს კი შერეული გუნდური პირველობა გაიმართება. ძიუდოს ქართველ ქომაგს პირდაპირი რეპორტაჟების ხილვის საშუალება ყოველ დღე ექნება „სილქ უნივერსალზე“ დილის 6 საათიდან.

ეს მსოფლიოს ჩემპიონატი ერთგვარი რეპეტიციაა ტოკიოს 2020 წლის ოლიმპიური თამაშებისთვის, ამ რეპეტიციის გასავლელად კი მთელი მსოფლიო ემზადება: წინასწარი მონაცემებით, მასში მონაწილეობას 149 ქვეყნის ნაკრები მიიღებს, მონაწილეთა რაოდენობა კი, არც მეტი, არც ნაკლები, 863 იქნება - 521 ვაჟი და 342 ქალი.

იშვიათად სპორტის სახეობა, სადაც მსოფლიოს ჩემპიონატი ამხელა აუდიტორიას კრებდეს! ბუნებრივია, ეს ძიუდოს საერთაშორისო ფედერაციის სწორი მანეჯმენტის დამსახურებაა.

ტოკიოში გამოსვლას, პრაქტიკულად, ყველა უძლიერესი ფალავანი აპირებს, თუმცა არ იქნება მთავარი ვარსკვლავი, ორგზის ოლიმპიური ჩემპიონი, მსოფლიოს 10-გზის და ევროპის 5-გზის ჩემპიონი ფრანგი ტედი რინერი. დანაკლისი ექნებათ მასპინძლებსაც - ტრავმის გამო არ ჭიდაობს მსოფლიოს ჩემპიონი სოიჩი ჰაშიმოტო (73). ამავე წონაში არც კორეელთა ორგზის მსოფლიოს ჩემპიონი ჩანგრიმ ანი გამოვა. ცალკეული დანაკლისი სხვა გუნდებსაც ექნებათ, თუმცა ეს საერთო დონეზე გავლენას ვერ მოახდენს.

ჩემპიონატში არ იასპარეზებს ჩრდილოეთ კორეის ნაკრები. ამ კომუნისტურ ქვეყანას იაპონიასთან დიპლომატიური ურთიერთობა არა აქვს, მაგრამ იაპონელები მათთვის გამონაკლისს უშვებდნენ და ქვეყანაში შესასვლელად პრობლემებს არ უქმნიდნენ, თუმცა ამჯერად ჩრდილოკორეელებმა იუარეს ტოკიოში ჩასვლა. 

არა გვგონია, ამაზე იაპონელებმა დიდად ინაღვლონ და ისინი დიდი გეგმებით ემზადებიან საშინაო ჩემპიონატისთვის. ასე მაგალითად, მათი ნაკრების მთვარი მწვრთნელი, ოლიმპიური ჩემპიონი კოსეი ინუე აცხადებს, რომ, მინიმუმ, 3-4 ოქროს მედლის მოპოვებას გეგმავს. 

ჩვენი ვაჟთა ნაკრები მსოფლიოს ჩემპიონატზე სრული შემადგენლობით, 9 მონაწილით იასპარეზებს, ქალებში კი ერთი სპორტსმენი გვეყოლება. ვაჟთა ნაკრები უკვე რამდენიმე დღეა, ტოკიოშია, სადაც სარელაქსაციო-აღმდგენ შეკრებას გადის ანუ შედარებით მსუბუქად ვარჯიშობს და არა დიდი დატვირთვებით, რათა პლანეტის პირველობას დასვენებული და ძალამოკრებილი შეხვდეს. 

საქართველოს ნაკრები

ვაჟები
60 კგ. ამირან პაპინაშვილი, ლუხუმ ჩხვიმიანი
66 კგ. ვაჟა მარგველაშვილი, ბაგრატ ნინიაშვილი
73 კგ. ლაშა შავდათუაშვილი
81 კგ. ლუკა მაისურაძე
90 კგ. ბექა ღვინიაშვილი
100 კგ. ვალერი ლიპარტელიანი
+100 კგ. გურამ თუშიშვილი

ქალები
52 კგ. ტატიანა ლევიცკა-შუკვანი

ყოველდღიური სპორტული გაზეთი "ლელო"
1487
მკითხველის კომენტარები / 0 /
მსგავსი ამბები
რუბრიკის სხვა სიახლეები
;