ძიუდოს მსოფლიოს რეიტინგები: გადაადგილებები არაბეთის ფონზე

აბუ დაბის გრანდ სლემის შემდეგ ძიუდოს საერთაშორისო ფედერაციამ მსოფლიოს ახალი რეიტინგი გამოაქვეყნა, რამაც ჩვენებურებს ახალი წარმატება მოუტანა - ნაკრებმა 3 ოქრო და გუნდური პირველობა მოიპოვა.

ჩემპიონები ამირან პაპინაშვილი (60), ვაჟა მარგველაშვილი (66) და ლაშა შავდათუაშვილი (73) გახდნენ. ამისთვის მათ 1000-1000 სარეიტინგო ქულა მიიღეს.

60 კგ.
ევროპის ჩემპიონი და მსოფლიოს ორგზის ბრინჯაოს მედალოსანი პაპინაშვილი რეიტინგს არც აბუ დაბიმდე უჩიოდა, ახლა კი ერთი საფეხურით ზევით აინაცვლა - უკვე მესამეა და ეს ადგილი რუსთა ქართველ ევროპის ჩემპიონ რობერტ მშვიდობაძეს გაუცვალა.

პაპინაშვილის ანგარიშზე უკვე 5018 ქულაა, თუმცა ჯერ მაინც საგრძნობლად ჩამორჩება იაპონელ მსოფლიოს ჩემპიონებს - რიუჯუ ნაგაიამას (5970 ქულა) და ნაოჰისა ტაკატოს (5700). თუმცა ეს ის შემთხვევაა, როცა დაწინაურებას, იქნებ, ჩამორჩენა და მეხუთე ადგილამდე დასვლა სჯობდეს - მსოფლიოს მომავალ ჩემპიონატზე მხოლოდ ასე თუ ასცდება ფინალამდე იაპონელებს, თორემ ახლანდელი განლაგებით ნახევარფინალში ტაკატოს გადაეყრება. თუმცა მსოფლიოს ჩემპიონატამდე მთელი წელიწადია და მათ ჯერ კიდევ გვარიანად დააკლდებათ ქულები. ჩვენთვის ცუდი ისიცაა, რომ იაპონელებს ამ წონაში ორი უძლიერესი ფალავანი ჰყავთ და ორი გასაორებელი წონიდან ამას უმეტესად აორებენ.

ამავე წონაში ლუხუმ ჩხვიმიანმა შეინარჩუნა მე-12 პოზიცია.
50-ეულში ამირან პაპინაშვილის უმცროსი ძმა, ახალგაზრდებში მსოფლიოს შარშანდელი ჩემპიონი, წლევანდელი ევროპისა და მსოფლიოს ბრინჯაოს მედალოსანი ჯაბა პაპინაშვილიც შედის, ვისაც ახალგაზრდული რეიტინგის ქულებიც გადმოჰყვება (შეგახსენებთ, რომ გადმოჰყვებათ მხოლოდ ახალგაზრდების მსოფლიოს ჩემპიონატის ქულები). ის 856 ქულით 44-ე ადგილზეა და ორი საფეხურით დაწინაურდა. 100-ეულში სხვა მონაწილე არა გვყავს.

66 კგ.
ევროპის ჩემპიონი და მსოფლიოს პრიზიორი მარგველაშვილი ორი ადგილით დაწინაურდა და ახლა 4616 ქულით მეორეა, პირველი კი კვლავაც იაპონელთა ზეტალანტი მსოფლიოს ორგზის ჩემპიონი ჰიფუმი აბეა 6100-ით. აბე განახევრება-განულებებით ბევრს არაფერს ჰკარგავს, რადგან შედარებით იშვიათად ჭიდაობს და მარგველაშვილი ვერ დაეწევა. მით უფრო, რომ თავადაც დაჰკარგავს გარკვეულ რაოდენობას.
ახალგაზრდული ნაკრების წევრი ბაგრატ ნინიაშვილი 1133 ქულით 38-ე ადგილზეა, თუმცა წინა რეიტინგში ერთი პოზიციით წინ იყო. ბუნებრივია, ახალგაზრდული რეიტინგის ქულები მასაც გადმოჰყვა, თუმცა ნინიაშვილმა წლეულს უფროსებშიც იმარჯვა - ანთალიის გრან პრი მოიგო, რისთვისაც 700 ქულა შეიმატა.

ლაშა გიუნაშვილი ერთი საფეხურით დაწინაურდა - 878 ქულა და 51-ე ადგილი, სხვა კი 100-ეულში ჩვენგან არავინაა.

73 კგ.
არაბულმა წარმატებამ ევროპისა და ოლიმპიური ჩემპიონი შავდათუაშვილი 4 პოზიციით დააწინაურა და ახლა მე-3 ადგილზეა 5107 ქულით. მის წინ მსოფლიოს ორი ჩემპიონია, იმათგან ერთს - 5380-იან კორეელთა ორგზის ჩემპიონ ჩანგრიმ ანს ბევრად არ ჩამორჩება, აი, მის მიერ ბაქოში, მსოფლიოს წლევანდელი პირველობის ფინალში ძლეული იაპონელთა მსოფლიოს შარშანდელი გამარჯვებული სოიჩი ჰაშიმოტო კი გვარიანად დაწინაურდა - 6440 ქულა. ფრიდონ გიგანი 534-ით 71-ეა.

81 კგ.
ეს წონა ერთადერთია, სადაც განთესილთა შორის, ანუ 8 საუკეთესოში, ვერ შევდივართ. არადა, მძიმე წონის შემდეგ, 100-ეულში ყველაზე მეტი წარმომადგენელი - 5 ფალავანი სწორედ აქ გვყავს. მათგან საუკეთესო ევროპის მესამე პრიზიორი ზებედა რეხვიაშვილია - 2180 ქულა და მე-17 ადგილი, რაც ადრინდელთან შედარებით, როცა მოიგო მინსკის "ევროპის ღია თასი", 4 საფეხურით უკუსვლაა. თამაზ კირაკოზაშვილი, პირიქით, 4 პოზიციით დაწინაურდა და ახლა 31-ეა 1561 ქულით.

ევროპის ორგზის ფინალისტი ნუგზარ ტატალაშვილი 45-ეა 1011-ით. ახალგაზრდული ნაკრების წევრი ტატო გრიგალაშვილი 544 ქულით 71-ეა, ახალგაზრდებში ევროპის ჩემპიონი და მსოფლიოს მესამე პრიზიორი ლუკა მაისურაძე კი 406-ით 84-ეა, რაც ერთი საფეხურით უკუსვლაა. კობა მჭედლიშვილი 344 ქულით 94-ეა და 2 საფეხურით დაქვეითდა.

90 კგ.
მსოფლიოს ჩემპიონატზე გამარჯვების შემდეგ ამ წონას სათავეში ესპანეთის სახელით მოასპარეზე ნიკოლოზ შერაზადიშვილი (ესპანურად - ნიკო შერა) ჩაუდგა, ჩვენ კი თანდათან ვთმობთ პოზიციებს, თუმცა ჯერჯერობით განთესვის ზონაში ანუ საუკეთესო ოქტეტში ვართ: ევროპის მედალოსანი ბექა ღვინიაშვილი, მართალია, 4 საფეხურით დაქვეითდა, მაგრამ 3877 ქულით მე-7 ადგილს მაინც ინარჩუნებს. მსოფლიოს პრიზიორმა უშანგი მარგიანმა ერთი პოზიციით დაიხია და 2815 ქულით მე-14 ადგილზეა. ევროპის სამგზის და მსოფლიოს ჩემპიონი ავთანდილ ჭრიკიშვილი. პირიქით, ადრინდელ რეიტინგთან შედარებით, ახლა 4 ადგილით წინაა, თუმცა ჯერ 834-ით 48-ზეა. ახალგაზრდების მსოფლიოს ჩემპიონატზე გამარჯვების შემდეგ 700 ქულით 53-ეა ლაშა ბექაური, ხოლო გიორგი პაპუნაშვილი 644-ით - მე-60.

100 კგ.
აქ რეიტინგს ვალერი ლიპარტელიანი ლიდერობს და გვარიანი უპირატესობითაც: მის ანგარიშზე 6382 ქულაა, ხოლო მეორეზე ჰოლანდიელი მიხაელ კორელი იმყოფება 5566-ით. ახალგაზრდებში ევროპის ჩემპიონი და მსოფლიოს მესამე პრიზიორი ონისე სანებლიძე 953 ქულით მე-40-ეა, თუმცა მას ახალგაზრდების გარდა, ქულები უფროსებშიც აქვს მოხვეჭილი. ლაშა ტაველური რეიტინგში 10 საფეხურით დაწინაურდა და 850-ით 47-ეა, იასონ ნემსაძე კი 324-ით 88-ეა.

+100 კგ.
მძიმე წონას მსოფლიოს ჩემპიონი გურამ თუშიშვილი უდგას სათავეში 7202 ქულით და ესეც გვარიანად უსწრებს მეორეზე მყოფ ჩეხთა ოლიმპიურ, მსოფლიოსა და ევროპის ჩემპიონ ლუკაშ კრპალეკს, ვის ანგარიშზეც 5021 ქულაა. წინა სეზონთან შედარებით, რეიტინგში ძალიან დაქვეითდნენ ჩვენი სხვა მძიმეწონოსნები. ევროპის ჩემპიონი და მსოფლიოს პრიზიორი ადამ ოქრუაშვილი წინა რეიტინგთან შედარებით ერთი ადგილით წინაა, მაგრამ მხოლოდ 35-ეა 1228 ქულით, ევროპის მესამე პრიზიორი ლევან მატიაშვილი კი იმავე - 41-ე ადგილზეა 1089-ით. ამასობაში მათ თანდათან უახლოვდება ახალგაზრდებში მსოფლიოს წლევანდელი ჩემპიონი გელა ზაალიშვილი - 756 ქულა და 54-ე ადგილი, ხოლო ონისე ბუღაძე 750-ით 55-ეა. გიორგი ქავთარაძის ანგარიშზე 294 ქულა და 88-ე საფეხურია.

ყოველდღიური სპორტული გაზეთი "ლელო"
1184
მკითხველის კომენტარები / 1 /
-
0
ვალერის ისევ ვარლამი ჯობია
მსგავსი ამბები
რუბრიკის სხვა სიახლეები
;