ძიუდოს მსოფლიოს რეიტინგი: მარგველაშვილი, ლიპარტელიანი, თუშიშვილი პირველები არიან

მოახლოვდა ძიუდოისტთა მორიგი დიდი შეჯიბრება - ეკატერინბურგის გრანდ სლემი, რომელიც 15-17 მარტს ჩატარდება. უპრიანია, იქამდე კიდევ ერთხელ გადავავლოთ თვალი მსოფლიოს რეიტინგს, სადაც რაღაც პარამეტრები კი გაგვიუარესდა, მაგრამ ძირითადად მაინც ვინარჩუნებთ მოწინავე პოზიციებს.

ვაჟებში 7 წონიდან 3-ში - 66, 100 და +100-ში კვლავ პირველები ვართ, კიდევ ორში კი ხუთეულში ვართ. შედარებით ჩავარდნა მხოლოდ ორ წონაშია 81-სა და 90-ში, სადაც არათუ ხუთეულში, არამედ განთესილთა შორისაც არა ვართ.

60 კგ.
ევროპის ჩემპიონმა და მსოფლიოს ორგზის მესამე პრიზიორმა ამირან პაპინაშვილმა მაროკოში ბრინჯაო კი მოიპოვა, მაგრამ როგორც წინა წერილში ვწერდით, მას განულება-განახევრების გზით გარკვეული ქულები ჩამოაკლდა და ჯერ კიდევ გერმანული შეჯიბრების შემდეგ ერთი საფეხურით დაქვეითდა, მესამეზე

ჩამოინაცვლა. მაროკოში მოპოვებული მედლით ეს პოზიცია გაიმყარა, მაგრამ უახლოეს პერიოდში - თბილისის ტურნირის შემდგომ მას ანალოგიური მიზეზით ისევ დააკლდება ქულები. ამ დროს მისი კონკურენტები - ევროპის ჩემპიონი და მსოფლიოს ფინალისტი რობერტ მშვიდობაძე, იაპონელი მსოფლიოს სამგზის ჩემპიონი, ოლიმპიური მედალოსანი ნაოჰისა ტაკატო და მისი თანაგუნდელი, მსოფლიოს მესამე პრიზიორი რიუჯუ ნაგაიამა არაფერს კარგავენ

. ეს იმიტომ, რომ ტაკატო შედარებით იშვიათად ჭიდაობს (სამაგიეროდ, სადაც გამოდის, თითქმის ყველგან იმარჯვებს), მშვიდობაძე და ნაგაიამა კი შედარებით გვიან „შეცურდნენ“ „დიდ ავიაციაში“. თუმცა პაპინაშვილი ხუთეულში მაინც დარჩება ანუ განთესილთა შორის ისევ დარჩება, ოღონდ ეგაა - არასასურველ და უხერხულ კონკურენტებს შედარებით ადრეულ ეტაპებზე გადაეყრება, თუნდაც - მეოთხედფინალში.

რაც შეეხება პაპინაშვილის კონკურენტებს საკუთრივ ჩვენს ნაკრებში, მის უახლოეს მდევრად ისევ ლუხუმ ჩხვიმიანი რჩება, ვინც ერთი საფეხურით დაქვეითდა და განთესილებში კვლავაც ვერ შედის. სამაგიეროდ, რჩება სალიცენზიო ზონაში, ასეულში კი ახალგაზრდებიდან ამირანის უმცროსი ძმა - ჯაბა პაპინაშვილი და თემურ ნოზაძეც შედიან, ოღონდ ისინი ჯერ მისგან ცოტა შორს არიან.

1. რობერტ მშვიდობაძე (რუსეთი) - 6446 ქულა
2. რიუჯუ ნაგაიამა (იაპონია) - 6010
3. ამირან პაპინაშვილი (საქართველო) - 5881
4. ნაოჰისა ტაკატო (იაპონია) - 5550
5. ამარტუვშინ დაშდავაა (მონღოლეთი) - 4269
11. ლუხუმ ჩხვიმიანი (საქართველო) - 3138
38. ჯაბა პაპინაშვილი (საქართველო) - 1168
59. თემურ ნოზაძე (საქართველო) - 612

66 კგ.
აქ რეიტინგის ლიდერად კვლავაც რჩება ევროპის ჩემპიონი და მსოფლიოს მედალოსანი ვაჟა მარგველაშვილი. მას კვალში იაპონელები უდგანან - ჯოშირო მარუიამა და მსოფლიოს ორგზის ჩემპიონი ჰიფუმი აბე. უახლოეს პერიოდში მარგველაშვილს მხოლოდ თბილისში შარშან მოპოვებული 700 ქულა გაუნახევრდება, მეტს კი კარგა ხანს არაფერს დაკარგავს, ამასობაში, დიდი იმედია, ისევ მოიპოვებს ახალ წარმატებებს. ამდენად, შეგვიძლია, გულდამშვიდდებულნი ვიყოთ, რომ ამ წონაში ჩვენი ლიდერობა ჯერ კიდევ კარგა ხანს გაგრძელდება, აი, შიდაკონკურენცია კი არც ისე სახარბიელოა, რადგან კონკურენტები მარგველაშვილს გვარიანად ჩამორჩებიან.

1. ვაჟა მარგველაშვილი (საქართველო) - 5701 ქულა
2. ჯოშირო მარუიამა (იაპონია) - 5690
3. ჰიფუმი აბე (იაპონია) - 5560
4. ბარუხ შმაილოვი (ისრაელი) - 4681
5. გიორგი ზანთარაია (უკრაინა) - 3729
42. ბაგრატ ნინიაშვილი (საქართველო) - 1125
72. ლაშა გიუნაშვილი (საქართველო) - 620

73 კგ.
შიდაკონკურენციის თვალსაზრისით, ყველაზე ცუდი მდგომარეობა ამ წონაში გვაქვს - ნაკრების ლიდერ ლაშა შავდათუაშვილს ღირსეული მოწინააღმდეგე ჯერაც არ უჩანს. 100-ეულში მხოლოდ ფრიდონ გიგანი შედის, ვინც 16 საფეხურით კი წაიწია წინ, მაგრამ სალიცენზიო ზონას კვლავაც დიდი მანძილი აშორებს.
თავად ოლიმპიური და ევროპის ჩემპიონი რეიტინგში ერთი საფეხურით დაქვეითდა და მესამეა, რადგან შარშანდელი თუ შარშანწინდელი მონაგარიდან ქულები დაკარგა, ჩვენი ტურნირის შემდეგ კი ისევ დაკარგავს 350 ქულას.

1. სოიჩი ჰაშიმოტო (იაპონია) - 6008 ქულა
2. ჩანგრიმ ანი (კორეა) - 5680
3. ლაშა შავდათუაშვილი (საქართველო) - 5516
4. რუსტამ ორუჯოვი (აზერბაიჯანი) - 5253
5. ტომი მაკიასი (შვედეთი) - 4773
65. ფრიდონ გიგანი (საქართველო) - 712

81 კგ.
ყველაზე ცუდი სარეიტინგო მდგომარეობა ამ წონაში გვაქვს - განთესილ რვაკაციან ზონას ვინღა დაეძებს, ოლიმპიადის სალიცენზიო 18 კაცშიც კი ვერ შევდივართ. არადა, ასეულში ქართველების „ცვენაა“ - 5 მონაწილე გვყავს. მათგან რეიტინგში საუკეთესო კვლავაც ევროპის მესამე პრიზიორი ზებედა რეხვიაშვილია, თუმცა მან ორი პოზიციით უკან დაიხია და 30-ე ადგილამდე დაქვეითდა. ასევე ორი ადგილით დაქვეითდა თამაზ კირაკოზაშვილიც, სხვებმა კი ცოტათი წინ წაიწიეს. ვნახოთ, რას მოგვიტანს ეკატერინბურგის ტურნირი, სადაც ერთ-ერთი ყველაზე იმედის მომცემი ახალგაზრდა ფალავანი ლუკა მაისურაძე იჭიდავებს.

1. საეიდ მოლაე (ირანი) - 6044
2. ფრანკ დე ვიტი (ჰოლანდია) - 4750
3. სოტარო ფუჯივარა (იაპონია) - 4680
4. დომინიკ რესელი (გერმანია) - 4566
5. ტაკეში სასაკი (იაპონია) - 4467
30. ზებედა რეხვიაშვილი (საქართველო) - 1645
36. თამაზ კირაკოზაშვილი (საქართველო) - 1416
50. ნუგზარ ტატალაშვილი (საქართველო) - 991
73. ტატო გრიგალაშვილი (საქართველო) - 538
89. ლუკა მაისურაძე (საქართველო) - 406

90 კგ.
განთესილთა შორის არც ამ წონაში აღარ ვართ, თუმცა სალიცენზიო სიაში ორი მონაწილე გვყავს. ტრავმების გამო ჩვენი ლიდერები სტაბილურად ვერა და ვერ ჩაერთნენ შეჯიბრებებში, თორემ ბევრად უკეთესი რეიტინგი გვექნებოდა, ოღონდ აქ ისეთი ფალავნები გვყავს, საგანგაშოდ მაინც არ მიგვაჩნია ახლანდელი რეალობა - ეს ტრავმებიც დასრულდება და ჩვენი ლიდერები ისევ დაბრუნდებიან მოწინავეთა შორის. ეგ კი არა, შიდაკონკურენციაც ძალიან დაძაბული იქნება.
სამაგიეროდ, ამ წონაში მატებაც გვაქვს - წინა კვირას შვეიცარიაში გამარჯვების შემდეგ 100-ეულში შევიდა ახალგაზრდა ლაშა ბექაური. ის ჯერ 18 წლისაა, თუმცა უფროსებშიც იმდენად წარმატებით ჭიდაობს, სალიცენზიო შეჯიბრებებშიც გამოსცდიან.

1. ნიკოლოზ შერაზადიშვილი (ესპანეთი) - 7042
2. კრისტიან ტოტი (უნგრეთი) - 6004
3. ალექსანდრ კუკოლი (სერბეთი) - 4914
4. დონჰან გვაკი (კორეა) - 4436
5. ივან ფელიპე სილვა მორალესი (კუბა) - 4415
17. უშანგი მარგიანი (საქართველო) - 2660
19. ბექა ღვინიაშვილი (საქართველო) - 2297
44. ავთანდილ ჭრიკიშვილი (საქართველო) - 1018
54. გიორგი პაპუნაშვილი (საქართველო) - 808
61. ლაშა ბექაური (საქართველო) - 700

100 კგ.
ვალერი ლიპარტელიანი არათუ ამ წონის, არამედ ვაჟთა ყველა წონის ლიდერია ქულათა საერთო მარაგით. თან, მის ლიდერობას კარგა ხანს საფრთხეც არ ემუქრება. საწყენი ისაა, რომ მას ახალგაზრდა კონკურენტები მხარს ვერ უბამენ და ჯერჯერობით ვერ აჩვენებენ ისეთ პროგრესს, როგორსაც მათგან ველოდით.

1. ვალერი ლიპარტელიანი (საქართველო) - 7477
2. გუჰამ ჩო (კორეა) - 5440
3. პეტერ პალჩიკი (ისრაელი) - 5020
4. აარონ ვოლფი (იაპონია) - 4120
5. რამადან დარვიში (ეგვიპტე) - 4043
48. ონისე სანებლიძე (საქართველო) - 903
60. ლაშა ტაველური (საქართველო) - 759
97. იასონ ნემსაძე (საქართველო) - 316

+100 კგ.
დიდი ხანია, ევროპისა და მსოფლიოს ჩემპიონი გურამ თუშიშვილი შეჯიბრებებში არ გამოსულა, მაგრამ რეიტინგის ლიდერობას მაინც ინარჩუნებს. თან, უახლოეს პერიოდშიც ბევრი არაფერი დააკლდება.

სამაგიეროდ, ამ წონაში 10-ეულში ყველაზე მეტი მონაწილე გვყავს - 7 ათლეტი.

1. გურამ თუშიშვილი (საქართველო) - 7252
2. ლუკაშ კრპალეკი (ჩეხეთი) - 5220
3. დუურენბაიარ ულზიიბაიარი (მონღოლეთი) - 3834
4. დავიდ მოურა (ბრაზილია) - 3793
5. სუნგმინ კიმი (კორეა) - 3672
34. ადამ ოქრუაშვილი საქართველო) - 1220
44. ლევან მატიაშვილი საქართველო) - 1012
59. გელა ზაალიშვილი საქართველო) - 756
60. ონისე ბუღაძე საქართველო) - 695
87. გიორგი ქავთარაძე საქართველო) - 329
94. გიორგი ზაქარიაძე საქართველო) - 272

სამწუხაროდ, ქალთა რეიტინგზე ჯერაც ბევრი არაფერია სალაპარაკო. ისინი თბილისის ტურნირზეც გამოვლენ და შემდეგაც უფრო აქტიურად იასპარეზებენ შეჯიბრებებში. იმედია, მერე მათზეც გვექნება სასაუბრო.

1616
მკითხველის კომენტარები / 0 /
მსგავსი ამბები
რუბრიკის სხვა სიახლეები
;