ძიუდოს საერთაშორისო ფედერაციის პრეზიდენტის წერილი: გადმოინაცვლებს მსოფლიო შემოდგომაზე?

2 აპრილს გამოქვეყნდა ძიუდოს საერთაშორისო ფედერაციის პრეზიდენტ მარიუს ვიზერის წერილი შექმნილ ვითარებასთან დაკავშირებით, როცა სხვა სახეობებთან თუ ცხოვრების სხვა სფეროებთან ერთად აქტიური პროცესები ძიუდოშიც შეჩერებულია გაურკვეველი ვადით. თუმცა საკითხს სიცხადე ვერც ამ წერილმა შესძინა, ოღონდ ესეც გასაგებია - ახალი ტიპის კორონავირუსის გამო ჯერაც გაურკვეველია, როდის განახდება სპორტული პრიცესი მსოფლიოს ძიუდოში.

ინტერვიუ ძიუდოს ფედერაციის პრეზიდენტთან: როცა ყველაფერი ჩაწყნარდება, სრულიად ახალ ეტაპზე უნდა გადავიდეთ

ვიზერის ამ მიმართვის შემდეგ გასაგები ის გახდა, რომ, შექმნილი ვითარებიდან გამომდინარე, ძიუდოს საერთაშორისო ფედერაცია ზრუნავს ახალი საკვალიფიკაციო სისტემის შემუშავებაზე, რომელიც არსებულის გაგრძელება იქნება. ასევე გასაგებია, რომ დღეს არსებული რეიტინგი და რეალობა პანდემიის გამო გამოუსადეგარია.

ვიზერის თქმით, იჯფ-ს სამოქმედო გეგმა ემყარება ორ პრინციპს - უსაფრთხო და ჯანმრთელი მონაწილეობა ყველა მხარისთვის და ყველა ქვეყნის უნივერსალური შეუზღუდავი მონაწილეობა საკვალიფიკაციო შეჯიბრებებში.

საერთაშორისო ოლიმპიური კომიტეტის ახალი გადაწყვეტილებით, სალიცენზიო პერიოდი მთლიანად მსოფლიოს სპორტში და არა მხოლოდ ძიუდოში დასრულდება გაისად, 2021 წლის 29 ივნისს, ვიზერის თქმით კი ძიუდოს საერთაშორისო ფედერაცია, მინიმუმ, იმავე ოდენობის საერთაშორისო ტურნირებს ჩაატარებს, რაც წლეულს იყო დაგეგმილი სალიცენზიო პერიოდში ანუ მიმდინარე წლის 30 მაისამდე. თუმცა პრეზიდენტი იქვე დასძენს, რომ ეს დამოკიდებულია ბევრ ფაქტორზე, უპირველესად კი იმხანად მსოფლიოში არსებულ მდგომარეობაზე ანუ ვირუსის გავრცელების მასშტაბებზე, ქვეყნებს შორის მიმოსვლის აღდგენაზე, შეჯიბრებათა მასპინძელ ქვეყნებსა და ადგილობრივ საორგანიზაციო კომიტეტებზე.

ვიზერი ასევე გვამცნობს, რომ წლეულს ჩასატარებელი, მაგრამ ვირუსის გამო გადადებული ყატარის მასტერსი აუცილებლად დარცება სალიცენზიო ტურნირად, ხოლო ასეთივე სტატუსი შეიძლება მიიღოს 2021 წელს დანიშნულმა მსოფლიოს ჩემპიონატმა. პლანეტის პირველობის შემთხვევაში ეს როგორ მოხდება, ამაზე ვიზერი კონკრეტულად არაფერს წერს, თუმცა რამდენადაც ჩვენტვის ცნობილია, საერთაშორისო ფედერაცია განიხილავს ვარიანტს, რომ მსოფლიოს ჩემპიონატი წლეულს შემოდგომაზე ჩაატაროს და მისცეს მას სალიცენზიო სტატუსი.

მოგეხსენებათ, ოლიმპიადის წელს მსოფლიოს ჩემპიონატები არ ტარდება. ამიტომ ის ძიუდოისტთა წლევანდელ კალენდარში არ იყო და საგაისოში იყო შეტანილი. შეიძლება, ამ ტურნირმა კალენდარში წლები გაცვალოს, თუმცა ესეც იმაზე იქნება დამოკიდებული, რამდენად შეძლებს მსოფლიო თუნდაც წლევანდელი შემოდგომისთვის კორონავირუსის ლოკალიზებას. ჩვენ კი შეგახსენებთ, რომ შემოდგომაზე იგეგმება ევროპის ჩემპიონატის ჩატარებაც. თანაც - სამივე ასაკობრივ კატეგორიაში ერთდროულად, თუმცა ამ საკითხზე ბეჭედის საბოლოოდ დასმასაც ვირუსი აფერხებს.

აქვე იმასაც შეგახსენებთ, რომ წლეულს შეჩერებული და გადადებულია ძიუდოისტთა ყველა შეჯიბრება, რომელიც 30 ივნისამდე იყო დანიშნული, ვიზერის წერილი კი იმასაც გვამცნობს, რომ მისი უწყების მთავარი საფიქრალია, უზრუნველჰყოს სამართლიანი საკვალიფიკაციო პროცესის ჩატარება მსოფლიოს ყველა ძიუდოისტისთვის და განიხილავს ისეთ ვარიანტს, რომ ვარჯიშის არსებული მწირი შესაძლებლობების პირობებში, ყველას მისცეს სპორტული ფორმის დაბრუნებისთვის საჭირო დრო, რაც შეჯიბრებებზე ჯანმრთელობისთვის უსაფრთხო პირობებში მონაწილეობითაა შესაძლებელი.

"ძიუდოს საერთაშორისო ფედერაციის სახელით მსურს, მადლობა გადაგიხადოთ მოთმინებისთვის ამ მოულოდნელი გარემოებების გამო. გისურვებთ ჯანმრთელობას და გამძლეობას. მოგიწოდებთ ყველას, რომ გააგრძელოთ მთავრობის მითითებების შესრულება ვირუსის გავრცელების შესაჩერებლად. დაიცავით საკუთარი თავი და იყავით უსაფრთხოდ და ჯანმრთელად" - წერს მარიუს ვიზერი.

4550
მკითხველის კომენტარები / 0 /
მსგავსი ამბები
რუბრიკის სხვა სიახლეები
;