ძიუდო, თელ ავივის ტურნირი: ქალებმა სეზონი გახსნეს

თელ ავივში გუშინ დაიწყო ძიუდოისტთა სეზონის პირველი გრან პრი, რომელშიც ჩვენგან მხოლოდ ქალთა ნაკრები გამოდის და ისიც მხოლოდ ხუთი მონაწილით, თანაც - ძირითადად ახალგაზრდებით დაკომპლექტებული.

გუშინ ჩვენგან ტურნირში სამი მონაწილე ჩაება, თუმცა იმათგან მხოლოდ ერთი იყო ახალგაზრდული ნაკრების წევრი. სამწუხაროდ, ჩვენმა სამეულმა თავი დიდად ვერ გამოიჩინა - ორმა მათგანმა შეძლო თითო შეხვედრის მოგება და სამივე ნაადრევად დაემშვიდობა ტურნირს.

საქართველოს ნაკრებში დებიუტი წარმატებით დაიწყო უკრაინიდან გადმობარგებულმა ტატიანა ლევიცკა-შუკვანმა (52), ვინც პირველ შეხვედრაში მასპინძელი პაზ კაფრი დააიპონა. შეხვედრის დაწყებიდან 15 წამში ჩვენებურმა მოგვერდით ვაზარი მოიპოვა, დაახლოებით 20-ოდე წამში კი კიდევ ერთხელ წამოიღო კისრულით, თუმცა ეს გდება სამართლიანად არ შეფასდა, მაგრამ იქვე შებოჭა და საქართველოს ნაკრების შემადგენლობაში პირველი გამარჯვებაც მოიპოვა.

მისი მომდევნო მეტოქე უკვე ლეგენდად ქცეული კოსოვოელი მაილინდა კელმენდი იყო - ოლიმპიური, მსოფლიოს ორგზის და ევროპის სამგზის ჩემპიონი, ვინც საბოლოოდ ამ შეჯიბრების გამარჯვებულიც გახდა. ჩვენებურთან დაპირისპირებაშიც ფავორიტი კოსოვოელი იყო და მართლაც მიითვალა იპონი, თუმცა ეს იოლად ნამდვილად არ გაუკეთებია. ლევიცკა-შუკვანი (შეგახსენებთ, რომ ის თურქეთში გადასული ბეთქილ შუკვანის, იგივე ბეკირ ოზლუს მეუღლეა.

სხვათა შორის, ვაჟთა ტურნირშიც გამოდიოდა ) მას გვარიანად ეომა და შეხვედრის დასაწყისში კინაღამ ისეთივე გდებით გადაიტანა ქულაზე, როგორიც წინა წრეში ებრაელს გაუკეთა მეორე ეპიზოდში. თუმცა გასაგებია, რომ კელმენდი კაფრიზე ბევრად მაღალი დონეა და თავის დაცვა დიდი გაჭირვებით, მაგრამ მაინც შეძლო. ჩვენებურს ამის შემდეგაც ჰქონდა ილეთის მცდელობები, მაგრამ კელმენდი რის ლეგენდა იქნებოდა, ასე იოლად გადმოეფინა თეთრი დროშები და 2 წუთის შემდეგ ქრესტომათიული ამოსმულით დააიპონა ჩვენებური.

ამავე წონაში პირველივე წრეში დამარცხდა ახალგაზრდებში მსოფლიოს ფინალისტი მარიამ ჯანაშვილი - რუს ალესია კუზნეცოვასთან წმინდად წააგო. ვერ ვიტყვით, რომ რუსი მასთან პაექრობაში საგრძნობ უპირატესობას ფლობდა, მაგრამ შეხვედრის მიწურულს გდებისას ხელი დაუჭირა მტკივნეულზე.

ჩვენი გუნდიდან გუშინ ახალგაზრდებში ევროპის შარშანდელი ფინალისტი ეთერ ლიპარტელიანიც (57) ჭიდაობდა და პირველი ორთაბრძოლა მანაც მოიგო - კოტ დივუარელი ზოულეია აბზეტა დაბონე პირველივე წუთზე დააიპონა. უნდა ითქვას, რომ მანამდე აფრიკელიც უტევდა და ნამდვილად ცდილობდა, მაგრამ ქართველმა მალევე აჩვენა კლასი, როცა შიგნიდან გამოცერა და ჰაერში ააბზრიალა. სამწუხაროდ, მეორე ეტაპი ლიპარტელიანისთვისაც დაუძლეველი ზღუდე აღმოჩნდა და მასპინძელთა მომავალ ჩემპიონ ტიმნა ნელსონ ლევისთან წააგო.

გუშინ ვაჟთა ტურნირში თავი გამოიჩინა ჰოლანდიის სახელით მოჭიდავე თორნიკე ჭკადუამ, ვინც 60 კილოგრამში ვერცხლი მოიპოვა - ფინალში ბელგიელ ჟორრე ვერსტრაეტენთან დამარცხდა.

დღეს თელ ავივში ჩვენგან ახალგაზრდებში ევროპის შარშანდელი მედალოსანი მარიამ ჭანტურია (70), ხვალ კი სტარტზე იმავე ხარისხის მედლის მფლობელი სოფიო სომხიშვილიც (78) იჭიდავებს.

ყოველდღიური სპორტული გაზეთი "ლელო"
883
მკითხველის კომენტარები / 0 /
მსგავსი ამბები
რუბრიკის სხვა სიახლეები
;