ძიუდო. ადამ ოქრუაშვილი ბრუნდება

საქართველოს ძიუდოისტ ვაჟთა ნაკრები უკვე შეუდგა ტურნირებში გამოსვლას - ბოლო უქმეებზე პარიზის გრანდ სლემზე იჭიდავა, მომდევნო ორ უქმეებზე კი ორ შეჯიბრებაში გამოვა.

17-18 თებერვალს გუნდი ავსტრიულ ობერვარტში "ევროპის ღია თასზე" გამოვა, სადაც მეორე შემადგენლობით იასპარეზებს. იქ ძირითადად საქართველოს ჩემპიონატის მედალოსნები იჭიდავებენ, რომლებსაც ეგრეთ წოდებული მეორე დონის პირველობის გამარჯვებულებიც შეერევიან. თუმცა, მიზეზთა გამო, რამდენიმე ფალავანი გუნდს დააკლდება.

ქვეყნის პრიზიორთაგან არ იჭიდავებენ ისინი, რომლებმაც ბოლო უქმეებზე პარიზში იასპარეზეს: ლუხუმ ჩხვიმიანი (60), ლაშა შავდათუაშვილი (73), ნუგზარ ტატალაშვილი, ზებედა რეხვიაშვილი (ორივე - 81), ბექა ღვინიაშვილი (90), ლაშა ტაველური (100) და ლევან მატიაშვილი (+100).

არც ავთანდილ ჭრიკიშვილი (90) იჭიდავებს, ვისაც ხელის ტრავმა ისევ აწუხებს. მეორე დონის ჩემპიონთაგან ავსტრიაში ალეკო მამიაშვილი (73) და ზაურ კენჭაძე (100) არ გამოვლენ.

ისინი ჯერ ახალგაზრდული ნაკრების წევრები არიან და 3-4 მარტს მის შემადგენლობაში პრაღაში იასპარეზებენ "ევროპის ღია თასზე". მამიაშვილი და კენჭაძე უკვე შეუერთდნენ ჭაბუკებისა და ახალგაზრდების იმ გაერთიანებულ გუნდს, რომელსაც საგანგებო პროგრამით ავარჯიშებენ.

ეს პროგრამა უფროსთა შეჯიბრებებში მათ ეტაპობრივად ჩართვასაც ითვალისწინებს და ამიტომ მიჰყავთ ახალგაზრდები უფროსებთან საჭიდაოდ.

ავსტრიაში თითქმის ყველა წონა სრულად ანუ 4-4 კაცით იქნება დაკომპლექტებული, თუმცა 81 განსაკუთრებით "დაიჩაგრა": ტატალაშვილი და რეხვიაშვილი ხომ პარიზში მონაწილეობის გამო არ მიდიან ობერვარტში - ისვენებენ, ქვეყნის ჩემპიონი თამაზ კირაკოზაშვილი და მესამე პრიზიორი კობა მჭედლიშვილი გერმანიაში გამოჰყავთ.

ისე გამოვიდა, რომ ამ წონის მედალოსანთაგან ავსტრიისთვის ვერავინ "მოიცალა" და მხოლოდ ქვედა წონიდან ამონაცვლებული მეორე დონის ჩემპიონის - გიგა გიგაურის იმედად დავრჩით.

3-3 მონაწილე გვეყოლება 73-ში, 90-სა და 100-ში. დანარჩენ წონებში 4-4 ფალავანი გვეყოლება, ოღონდ ტრავმა აწუხებს ზვიად კაპანაძეს (73).

* * *

ამ შეჯიბრებიდან ერთი კვირის თავზე დიუსელდორფში გრანდ სლემის მორიგი ტურნირი იმართება, სადაც ჩვენგან ლიდერები მიდიან, თუმცა არასრული გუნდით გამოვალთ:

მონაწილე არ გვეყოლება 66, 73 და 90 კილოგრამებში, თუმცა, შესაძლოა, 100-შიც ასევე უფალავნოდ დავრჩეთ. ეს იმ შემთხვევაში, სამწვრთნელო შტაბი ვალერი ლიპარტელიანის (100) იქ წაყვანას მიზანშეწონილად თუ არ ჩათვლის.

შესაძლოა, მათ ამირან პაპინაშვილის (60) წაყვანაც იუარონ. ისინი განაცხადში კი არიან შეყვანილები, მაგრამ მათი წასვლის საკითხი საბოლოოდ მიმდინარე კვირის ბოლოს გადაწყდება, როცა ძირითადი ნაკრები პარიზიდან დაბრუნდება, სადაც ერთობლივ ვარჯიშებზე დარჩა.

ლიდერთაგან გერმანიაში ასევე არ იჭიდავებენ მარგველაშვილი, შავდათუაშვილი, ღვინიაშვილი და უშანგი მარგიანი (90) - ეს კვარტეტი შაბათს, 17 თებერვალს ბაკურიანში გაემგზავრება და იქ ორი კვირით საერთო ფიზიკური მომზადებისთვის განკუთვნილ შეკრებას გაივლის.

გერმანიაში ასევე არ იქნება გურამ თუშიშვილიც (+100). სამაგიეროდ, დიდი ხნის შემდეგ ძიუდოს დაუბრუნდება ასევე მძიმეწონოსანი ადამ ოქრუაშვილი (+100).

როგორც უკვე გითხარით, ამ შეჯიბრებების შემდეგ ჩვენები პრაღაშიც გამოვლენ, თუმცა - მხოლოდ ახალგაზრდული ნაკრები, ეროვნული გუნდი კი თბილისის "დიდი პრიზისთვის" გააგრძელებს მზადებას, რომელიც 30 მარტიდან 1-ელი აპრილის ჩათვლით ჩატარდება თბილისის ოლიმპიურ სასახლეში.

საქართველოს ნაკრები
ავსტრია, ობერვარტი

17-18 თებერვალი

60 კგ: ლაშა ჩადუნელი, ამირან დარბაისელი, თემურ ნოზაძე, ზურაბ კახნიაშვილი.
66 კგ: ზვიად ხუბულური, ნიკოლოზ ჭიკაიძე, ლაშა გიუნაშვილი, გიორგი ქალდანი.
73 კგ: ზვიად კაპანაძე, ომარ ნიაზაშვილი, ფრიდონ გიგანი.
81 კგ: გიგა გიგაური
90 კგ: ნოდარ ბერიანი, თორნიკე ჯუღელი, გიორგი პაპუნაშვილი.
100 კგ: ონისე სანებლიძე, იასონ ნემსაძე, დავით ოზბეთელაშვილი.
+100 კგ: ონისე ბუღაძე, გიორგი ქავთარაძე, გიორგი ზაქარიაძე, გუგა კიბორძალიძე.

გერმანია, დიუსელდორფი
23-25 თებერვალი

60 კგ: ლუხუმ ჩხვიმიანი, ამირან პაპინაშვილი
81 კგ: თამაზ კირაკოზაშვილი, კობა მჭედლიშვილი
100 კგ: ვალერი ლიპარტელიანი
+100: ლევან მატიაშვილი, ადამ ოქრუაშვილი

ყოველდღიური სპორტული გაზეთი "ლელო"
1995
მკითხველის კომენტარები / 0 /
მსგავსი ამბები
რუბრიკის სხვა სიახლეები
;