[ძიუდო] ავსტრალიაში იაპონიის საძებნელად

საქართველოს ქალ ძიუდოისტთა ნაკრების ერთ-ერთი ლიდერი ტატიანა ლევიცკა-შუკვანი (52) ავსტრალიაში მიემგზავრება, სადაც ქალაქ პერტში 3-4 ნოემბერს „ოკეანიის ღია კონტინენტური თასი“ ტარდება. ეს ტურნირი ჩვენი ნაკრების გეგმებში არასოდეს შედიოდა, მაგრამ მოულოდნელად ლევიცკა-შუკვანისთვის აქტუალური გახდა სალიცენზიო ქულების თვალსაზრისით. საქმე თურმე შემდეგშია: ეს შეჯიბრება რანგით კონტინენტური თასი კი გახლავთ, მაგრამ რატომღაც ქულებით „დიდ პრიზთანაა“ გათანაბრებული. დიდი ალბათობით, ქვეყნის დასალიერში გადაკარგულ კონტინენტზე, სადაც დიდი პრობლემაა ტერიტორიული დაშორება, ხანგრძლივი ფრენა და აკლიმატიზაცია, არ ჩავა წამყვან სპორტსმენთა უმეტესობა ანუ, ვისაც თითქმის განაღდებული აქვს ტოკიოს ოლიმპიადის საგზურები და ქულები დიდად არც სჭირდებათ. ამიტომ სხვებისთვის იქ ქულების მოპოვება შედარებით იოლი იქნება. ამ კუთხით ლევიცკა-შუკვანის წასვლა ნამდვილად გამართლებულია, რადგან ის ძალზე ახლოსაა სალიცენზიო ზონაში მოხვედრასთან. საგზურს რეიტინგის 18 მოწინავე სპორტსმენი იღებს, სადღეისო მდგომარეობით კი ჩვენი ძიუდოისტი ოლიმპიურ რეიტინგში 1276 ქულით 28-ე ადგილზეა. ოღონდ ამ სიას ბოლომდე თუ გავცხრილავთ ანუ გამოვაკლებთ მის წინ მდგომ სამ იაპონელს (მოგეხსენებათ, ოლიმპიადის მასპინძლებს საგზურები არ სჭირდებათ, ავტომატურად მონაწილეობენ თამაშებში), ხოლო დანარჩენი ქვეყნებიდან თითო მონაწილეს დავტოვებთ, მაშინ ლევიცკა-შუკვანი სულაც მე-20 ადგილზე გამოდის.

აქვე გეტყვით, რომ სალიცენზიო ზონაში უკვე გვყავს პირველი ქალი წარმომადგენელი - ახალგაზრდებში ევროპისა და მსოფლიოს წლევანდელი ჩემპიონი ეთერ ლიპარტელიანი (57) რეგიონულ კვოტაში ხვდება, თუმცა მას სალიცენზიო ზონამდე სულ რაღაც 150-ოდე ქულა აშორებს, ამ სხვაობის გაბათილება კი არ გაუჭირდება.

350
მკითხველის კომენტარები / 0 /
მსგავსი ამბები
რუბრიკის სხვა სიახლეები
;