[ძიუდო. ანალიზი+VIDEO] დიუსელდორფში ისევ ქართველები ზეიმობენ: თუშიშვილი, გრიგალაშვილი....

4 მედალი - 2 ოქრო, თითო ვერცხლ-ბრინჯაო და მეორე ადგილი საერთო გუნდურ ჩათვლაში - ასეთი შედეგით დაასრულა ჩვენმა ძიუდოისტთა ნაკრებმა გამოსვლა ამ უქმეებზე დიუსელდორფის „დიდ მუზარადზე“. ჩემპიონები ახალგაზრდა ტატო გრიგალაშვილი (81) და გუნდის ლიდერი, მსოფლიოს, ევროპისა და ევროპული თამაშების ჩემპიონი გურამ თუშიშვილი გახდნენ. ევროპის ჩემპიონი, მსოფლიოს მესამე პრიზიორი ვაჟა მარგველაშვილი (66) ვერცხლს დასჯერდა, ხოლო ევროპის ბრინჯაოს მედალოსანი ბექა ღვინიაშვილი (90) მესამეზე გავიდა.

გრიგალი ქართლიდან

დიუსელდორფში ბევრი რამ მოხდა ჩვენთვის საინტერესო, თუმცა მათ შორის უმთავრესი ტატო გრიგალაშვილის ჩინებული გამოსვლაა. ის რომ უნიჭიერესი ძიუდოისტია, ყველამ კარგად ვიცით, მაგრამ ჯერ ასეთ მეტოქეებთან ასეთ ჭიდაობას, როცა მას ჩვენს ნაკრებშიც კი არ მოუპოვებია ლიდერის სტატუსი, მაინც ძნელად თუ ვიფიქრებდით. არადა, ქართული გრიგალი ისეთ „ვარსკვლავებს“ დაატყდა თავს და ისეთი ავტორიტეტები შემუსრა, როგორიც იაპონელთა მსოფლიოს ჩემპიონი და ოლიმპიური მედალოსანი ტაკანორი ნაგასე, გერმანელთა მსოფლიოს ჩემპიონი ალექსანდრ ვიცზერზაკი და რუსთა ინგუში ოლიმპიური ჩემპიონი ხასან ხალმურზაევია. ტატომ დადებითი თვისებები არა მხოლოდ ამ სამეულთან, არამედ სხვებთანაც გამოავლინა - იტალიელ ანტონიო ესპოზიტოსთან, ფრანგ ალფა ოუმარ ჯალოსა და ნახევარფინალში ყირგიზ ვლადიმირ ზოლოევთან. გრიგალაშვილმა ყველა პაექრობა უაღრესად მობილიზებულმა ჩაატარა და უკლებლივ ყველა მეტოქესთან პირველ ნომრად ჭიდაობდა, არავისთან დაუთმია ინიციატივა. ნაგასემ მთელი შეხვედრა ვერაფერი მოუხერხა. თანაც, მასთან პირველივე პაექრობამ მოუწია, დასაწყისი კი ყოველთვის რთულია. დასრულებამდე ერთი წამით ადრე ქამრიდან გადავლებულზე ფეხიც კარგად გამოჰკრა და ვაზარი აართვა. ამ მეტოქეებიდან ის მხოლოდ ვიცზერზაკთან და ჯალოსთან ჩამორჩა, თუმცა ინიციატივა მაინც მის ხელთ იყო და საბოლოოდ ლოგიკურ შედეგამდე მიიყვანა საქმე. გერმანელს კისრულის მცდელობა დაუხურა და მოწყვეტით დასცა ბეჭებზე, ხოლო ფრანგი ჯერ გადავლებიდან გადააგდო უკან, მერე კი დამატებით დროში გამოცერა და გვერდზე დაიქნია სავაზარედ.

გრიგალაშვილის კიდევ ერთი კარგი თვისება მისი ხასიათია - ეს ფინალშიც გამოავლინა, სადაც სასწორზე ბევრი რამ იდო - მთელი დღის ნაშრომ-ნაწვალები, მეტოქედ კი ოლიმპიური ჩემპიონი ჰყავდა... ასეთ დროს ბევრ მასზე გამოცდილს აუკანკალდებოდა ფეხები, მაგრამ არა ტატოს. ის ხალმურზაევსაც შემტევ სტილში, პირველ ნომრად ეჭიდავა და შედეგიც მოიმკა, როცა კისრულზე შესული კონტრილეთით ბრუნზე გადააგდო - ვაზარი და ეს უპირატესობა ბოლომდე წარმატებით შეინარჩუნა. 

20 წლის ხაშურელმა გრიგალაშვილმა (10 წლიდან ქარელში ვარჯიშობს მირზა ხაბარელთან) ეროვნულ ნაკრებში მეორე დიდი ტურნირი მოიგო - შარშან ბუდაპეშტის „დიდ პრიზზეც“ იმარჯვა, რითაც ოლიმპიურ რეიტინგში 1000 ქულა შეიმატა და სერიოზული განაცხადი ოლიმპიადის საგზურზე.

თუშიშვილმა გერმანია ააყირავა

თუშიშვილს ეტყობოდა ის გაცდენილი პერიოდი, რაც ხელის ტრავმამ გამოიწვია - ჯერ კიდევ ვერაა ფორმაში, მოძრაობაშიც ცოტა შეზღუდული იყო, თითქოს ფიზიკური ღონეც აკლდა და სისწრაფე, ელასტიურობა, კოორდინაციაც არ ჰქონდა ჩვეულებრივი. თუმცა დიდი საჭიდაო დიაპაზონის პატრონმა მაინც წარმატებით იჭიდავა, რაც მის დიდ შესაძლებლობებსა და დიდ რეზერვზე მიუთითებს.

ამ ყველაფრის მიუხედავად, მაინც ბლომად ვიხილეთ ჩვეული ჩახტომილი კისრულები მისი შესრულებით - უზბეკ ალიშერ იუსუპოვთან, ტაჯიკ შაკარმამად მირმამადოვთან, ხოლო მეოთხედფინალში კორეელთა მსოფლიოს მედალოსანი მინჯიონგ კიმი ასე ვერ წამოიღო, თუმცა საპირისპირო მხარეს მიაწვა და დავარდნილი შებოჭა. ნახევარფინალში მასზე ლამის ორჯერ უფრო დიდ ბრაზილიელთა მსოფლიოს ფინალისტსა და ორგზის ოლიმპიურ პრიზიორ რაფაელ სილვას, რამდენიმე მცდელობის მიუხედავად, კისრული ვერ გაუკეთა, თუმცა გაფრთხილებებით მოახსნევინა.

ფინალში თუშიშვილი უაღრესად მობილიზებული გავიდა მასპინძელ იოჰანეს ფრეისთან საჭიდაოდ და ძალიან დაკვირვებითაც ირჯებოდა, ტატამზე ერთი ზედმეტი მოძრაობა არ გაუკეთებია. ისე კი ტატამზე დიდი დროც არ გაუტარებია - 45 წამში მორიგ კისრულზე უკვე მასპინძელი წამოიღო და მორიგი იპონით მოიგო ტურნირი. თუმცა ილეთსაც გააჩნია: გდება იმდენად უზადო იყო, ფრეი ლამის აბზრიალდა ჰაერში.

მარგველაშვილის მეტამორფოზა

მარგველაშვილი ასეთი შემართებით ევროპისა და მსოფლიოს ჩემპიონატებზე რომ ჭიდაობდეს, ყულაბაში ამ ტურნირების გაცილებით მეტი მედალი ექნებოდა. თუნდაც რად ღირდა მისი მოგვერდი მეოთხედფინალში აზერბაიჯანელთა მსოფლიოს ფინალისტ ორხან საფაროვთან, ხოლო ფინალში ძალიან თამამად და გახსნილად ეჭიდავა იაპონელთა ორგზის მსოფლიოს ჩემპიონ ჰიფუმი აბეს. ამ პატარა „მონსტრთან“ ასე თანაბრად ჭიდაობას ბევრი ვერ ახერხებს და მეტოქეებმა ფრიად სანახაობრივი პაექრობა შემოგვთავაზეს. ეგ კი არა, მარგველაშვილი გამარჯვებასთანაც ახლოს იყო, მაგრამ აბე ორჯერ გასაოცარი მდგომარეობიდან დაუძვრა. განსაკუთრებით - მეორე ეპიზოდში, როცა მარგველაშვილმა გამოცერა, მაგრამ უკან ვერ გადააგდო, იაპონელმა წელის საოცარი გამძლეობით დაიცვა თავი. თავიდან მარგველაშვილმა საკმაოდ ადვილად დაამარცხა ალჟირელი ვაილ ეზინე და ჩეხი პაველ პატრიკოვი. მათთან შედარებით, ყაზახთა მსოფლიოს ვიცე-ჩემპიონი იერლან სერიკჟანოვიც და რუსი იაკუბ შამილოვიც უფრო ძლიერები არიან, თუმცა მარგველაშვილმა ორივეს წმინდად მოუგო. მთლიანობაში, ჩვენმა ფალავანმა ძალიან კარგი ძიუდო გვაჩვენა და მომზადებულიც კარგად ჩანდა.

ბობონოვის წერა გავხდით

ღვინიაშვილმა ბრინჯაოსთვის პაექრობაში აზერბაიჯანელი მამადალი მეჰდიევი ბრუნით ისე გამეტებით გაიქნია და დაახეთქა ტატამს, თითქოს გუშინდელი დღის მთელი ბოღმა ამ ერთ მოძრაობას გაატანა...

90 კილოგრამში ჯერ ხომ ჩვენები ისედაც ერთ ჯგუფში მოხვდნენ, მერე რისხვად გვექცა უზბეკთა მომავალი ჩემპიონი დავლატ ბობონოვი - ეტყობა, უზბეკთა ქართველყოფილმა მთავარმა მწვრთნელმა ილიას ილიადისმა კარგად შეასწავლა ქართველთა წინააღმდეგ ჭიდაობა: ჯერ ლაშა ბექაურს მოუგო, მერე კი - ღვინიაშვილსაც.

ღვინიაშვილმა თავდაპირველად ყირგიზი ერლან შეროვი მოგვერდით ვაზარზე დააგდო და იქვე შებოჭა კიდეც. შვეიცარიელ სირილ გროსკლაუსსაც ვაზარით მოუგო - პირველივე წუთზე ხელი დაუჭირა და მოგვერდით უკან გადააგდო. ამას ბობონოვთან მარცხი მოჰყვა, დამამშვიდებელში კი აზერბაიჯანელამდე ჩეხი დავიდ კლამერტიც დაამარცხა, ვინც ჯგუფში რუს მიხაილ იგოლნიკოვს მოუგო. ბექაურმა ერთი მოგება მიითვალა - ლატვიელ ალექსის ზარდუნევსთან.

ამათ გარდა, დიუსელდორფში რამდენიმე ახალგაზრდამაც კარგად იასპარეზა და ორი მათგანი მეხუთეზეც გავიდა ანუ ბრინჯაოსთვის იჭიდავეს. ერთი მათგანი ბაგრატ ნინიაშვილი იყო 66 კილოგრამში, თუმცა მეორე ევროპული თამაშების მესამე პრიზიორისგან ეს არც გვიკვირს, აი, თემურ ნოზაძემ (60) კი სასიამოვნოდ გაგვაოცა. ის ძირითად ბადეში უძლიერეს მეტოქესთან, იაპონელთა სამგზის მსოფლიოს ჩემპიონსა და ოლიმპიურ მედალოსანთან, ამ ტურნირის მომავალ ჩემპიონ ნაოჰისა ტაკატოსთან დამარცხდა, მანამდე კი გერმანელი მორიტც პლაფკისა და ამერიკელი ადონის დიასის გვერდით ძლიერ ბრიტანელს, ევროპის მედალოსან ეშლი მაკენზისაც მოუგო - სამივეს წმინდად აჯობა. დამამშვიდებელში კიდევ ერთი სოლიდური მეტოქე გააკრა ბეჭებით ტატამს - ესპანელთა ევროპული თამაშების ვიცე-ჩემპიონი ფრანსისკო გარიგოსი, ხოლო ბრინჯაოსთვის შეხვედრაში ჰოლანდიელთა ქართველ თორნიკე ჭკადუასაც ჯობდა ჭიდაობით და ბევრად აქტიურიც იყო; მეტოქეს ორი გაფრთხილება ჰქონდა და მესამეც არ ჩანდა შორს, როცა ნოზაძე მოხსნეს ამ ყბადაღებული წესის - თავზე დაცემის გამო. ნინიაშვილს გადამწყვეტ შეხვედრაში რეალურად აჯობა ზემოხსენებულმა რუსმა შამილოვმა. ისე კი ნინიაშვილმა ჯგუფში ებრაელ ტალ ფლიკერს და რუს აბდულა აბდულჟალილოვს მოუგო (რუსი მოხსნეს ხელზე აკრძალული ხერხით ზემოქმედებისთვის), ხოლო დამამშვიდებელში ბრაზილიელ დანიელ კარგნინსაც მოუგო, ამათ შემდეგ კი ბულგარელ ბოჟიდარ ტემელკოვასთან წაგება, ცოტა არ იყოს და, მოულოდნელი გახლდათ. ამათ გარდა, ნინიაშვილმა გერმანელ დან მატუშოვიჩსაც აჯობა.

ნამდვილად დაგვიტოვა გარკვეული იმედები 100 კილოგრამში გიორგი ჩიქოვანმა - ყაზახი აიბეკ სერიკბაევისა (იპონი) და სერბი ბოიან დოსენის (მოახსნევინა) დამარცხების შემდეგ არაბთა გაერთიანებული საამიროების მსოფლიოს პრიზიორი ივან რემარენკოც გაამგზავრა სახლში მორიგი იპონით, მერე კი ბრაზილიელ რაფაელ ბუზაკარინთან დამარცხდა. დამამშვიდებელში ვაზარს უგებდა აზერბაიჯანელ ზელიმ კოცოევს, თუმცა ბოლო წამებზე იპონზე მოყვა.

ჯაბა პაპინაშვილმა (60) ავსტრალიელ ჯოშუა კატზს ორი ვაზარით მოუგო, მერე კი დიდი ბრძოლა გაუმართა უზბეკთა მსოფლიოს შარშანდელ ფინალისტ შარაფუდინ ლუტფილაევს, ერთ ეპიზოდში დააგდო კიდეც და იპონიც აჩვენეს, მაგრამ მერე ვაზარად შეუცვალეს, საბოლოოდ კი დამატებით დროში დამარცხდა. ჯამში, უხარისხო ჭიდაობა არ უჩვენებია.

ასევე დამატებით დროში დამარცხდა ნუგზარ ტატალაშვილიც (81) რუს ასლან ლაპინაგოვთან - გაფრთხილებებით მოხსნეს. ოლიმპიურმა და ევროპის ჩემპიონმა ლაშა შავდათუაშვილმა (73) ბოტსვანელ ტირელო ლეკოკოსა და უზბეკ შაკრამ ახადოვთან წმინდა მოგებების შემდეგ სლოვენიელ მარტინ ჰოიაკთან წააგო. ამავე წონაში ფრიდონ გიგანმა ლტოლვილთა გუნდის წევრ ფარეს ბადავისა და ალჟირელ აჰმედ ელ მეზიატის კი აჯობა, მაგრამ მონღოლთა მომავალ პრიზიორ ცოგტბაატარ ჩენდ-ოჩირთან დამარცხდა და გამოვარდა. ნიაზ დიასამიძემ (100) და ონისე ბუღაძემ (+100) თითო შეხვედრა მოიგეს, შესაბამისად, კენიელ გეორგე კიმანისთან და გერმანელ იონას შრაიბერთან. შემდეგ დიასამიძე აზერბაიჯანელთა მომავალ ფინალისტთან, ოლიმპიადის ვიცე-ჩემპიონ ელმარ გასიმოვთან დამარცხდა, ბუღაძე - უზბეკ ბეკმუროდ ოლტიბოევთან.

60 კგ.

  1. ნაოჰისა ტაკატო (იაპონია); 2. იუნგ ვეი იანგი (ტაივანი); 3. ვონ ჯინ კიმი (კორეა), თორნიკე ჭკადუა (ჰოლანდია); 5. თემურ ნოზაძე (საქართველო).

66 კგ.

  1. ჰიფუმი აბე (იაპონია); 2. ვაჟა მარგველაშვილი (საქართველო); 3. ალბერტო მარტინ გაიტერო (ესპანეთი), იაკუბ შამილოვი (რუსეთი); 5. ბაგრატ ნინიაშვილი (საქართველო).

73 კგ.

  1. შოჰეი ონო (იაპონია); 2. ჩანგრიმ ანი (კორეა); 3. რუსტამ ორუჯოვი (აზერბაიჯანი), ცოგტბაატარ ცენდ-ოჩირი (მონღოლეთი).

81 კგ.

  1. ტატო გრიგალაშვილი (საქართველო); 2. ხასან ხალმურზაევი (რუსეთი); 3. ფრანკ დე ვიტი (ჰოლანდია), რობინ პაცეკი (შვედეთი).

90 კგ.

  1. დავლატ ბობონოვი (უზბეკეთი); 2. ქუანჯაუ ნჰაბალი (უკრაინა); 3. ბექა ღვინიაშვილი (საქართველო), სოიჩირო მუკაი (იაპონია).

100 კგ.

  1. მუხამადკარიმ კურამოვი (უზბეკეთი); 2. ელმარ გასიმოვი; 3. ზელიმ კოცოევი (ორივე - აზერბაიჯანი), მიკლოშ ცირიენიჩი (უნგრეთი); 7. გიორგი ჩიქოვანი (საქართველო).

+100 კგ.

  1. გურამ თუშიშვილი (საქართველო); 2. იოჰანეს ფრეი (გერმანია); 3. მინჯიონგ კიმი (კორეა), რაფაელ სილვა (ბრაზილია).
2696
მკითხველის კომენტარები / 0 /
მსგავსი ამბები
რუბრიკის სხვა სიახლეები
;