ძიუდო. ანთალიაში ახალგაზრდებმა უფროსები ჩააჩოჩეს

ანთალიაში ძიუდოისტთა გრან პრის მორიგი ტურნირი ჩატარდა, სადაც ჩვენმა სპორტსმენებმა სამივე სინჯის თითო მედალი მოიპოვეს.

ეს შედეგი გამორჩეული იმითაა, რომ თურქეთში ძირითადად ექსპერიმენტული ახალგაზრდული ნაკრების წევრები გამოდიოდნენ, რომლებსაც სპეციალური პროგრამით ამზადებენ.

როგორც ჩანს, ეს ყურადღება წყალში გადაყრილი არაა და ღირს მსგავს ინიციატივებში ფულის ჩადება, რადგან ანთალიაში შედარებით უფროსებიც იყვნენ, მაგრამ მედლები სწორედ იმ საგანგებო გუნდის წევრებმა მოიპოვეს.

ჩემპიონი ახალგაზრდებში მსოფლიოს მედალოსანი, 19 წლის ბაგრატ ნინიაშვილი (66) გახდა, ვერცხლი ახალგაზრდებში მსოფლიოს ჩემპიონმა ჯაბა პაპინაშვილმა (60) ირგუნა, მესამეზე კი ახალგაზრდებში ევროპისა და მსოფლიოს შარშანდელი ბრინჯაოს მედალოსანი ტატო გრიგალაშვილი (81) გავიდა, ვინც ჯერ სულაც 18 წლისაა.

არადა, ეს ტურნირი ჯერ ხომ უფროსებში ტარდებოდა და მაღალი რანგისაც იყო, შემადგენლობითაც თბილისის გრან პრიზე უფრო უკეთესი გახლდათ. ამის მიუხედავად, ჩვენმა 18-19 წლის ბიჭებმა გამოცდილ უფროსებს ტოლი არაფერში დაუდეს და გვარიანი სარეიტინგო ქულებიც შეიმატეს. აქვე, როცა ზემოაღნიშნული პროექტის წარმატებაზე ვსაუბრობთ, წინა უქმეებზე თბილისში თემურ ნოზაძის (60) მიერ მოპოვებული ბრინჯაოც უნდა გავიხსენოთ, რომელიც ასევე ამ ექსპერიმენტული გუნდის წევრია. ვფიქრობთ, ექსპერიმენტი ამართლებს.

ნინიაშვილის გაბრწყინება

ანთალიაში მშვენივრად იჭიდავა ნინიაშვილმა. ქართველმა ათლეტმა პირველ შეხვედრაში კუბელი ოსნილ სოლისი ვაზარით ჩამოიშორა, ირანელი ალირეზა ხოჯასტეპი კი გაფრთხილებებით მოახსნევინა.

ამას მიაყოლა იპონი გამოცდილ ყაზახთან, იელდოშ ჟუმაკანოვთან და მასპინძელ სინან სანდალთან, ვინც უკვე სავეტერანედაა გამზადებული, მაგრამ "კუდის მოქნევა" ჯერ კიდევ შეუძლია.

თუმცა ნინიაშვილთან ეს არ გამოუვიდა და ჩვენებურმა მორიგი იპონი მიითვალა. ფინალიც პირწმინდად მოუგო მოლდოველ დენის ვიერუს, ვისაც ასევე წმინდად მოუგო, თუმცა მანამდე კიდევ ერთი გდებაც გაუკეთა. ნინიაშვილისთვის ეს პირველი მედალია უფროსებში.

პატარა პაპინა

მეორე ადგილის მიუხედავად, ანთალიური შეჯიბრება დადებითად უნდა ჩავუთვალოთ ჯაბა პაპინაშვილს, ვინც ეროვნულ ნაკრებში უფროსი ძმის, ამირან პაპინაშვილის ღირსეულ შემცვლელად ჩანს.

თურქულ ტატამზე ფინალში რუს ალბერტ ოგუზოვთან წაგების მიუხედავად, მასზე საყვედური არავის დასცდება. პაპინაშვილს პირველივე წრეში საკმაოდ საკმაოდ მძიმე საჯილდაო ქვა შეხვდა - სლოვენიელი მატიას ტრბოვცი მასზე ბევრად გამოცდილია, თუმცა ჩვენებურმა ეს ფაქტორი არად ჩააგდო და სამჯერ გააფრთხილებინა.

მომდევნო მეტოქეებთან - რუსეთიდან მოჭიდავე იაგო აბულაძესთან და მეოთხედფინალში ამერიკელ ადონის დიასთან უკვე ილეთებით მოიპოვა წმინდა გამარჯვება - ორივეს ორ-ორი გდება გაუკეთა. ნახევარფინალში მონღოლი ამარბოლდ ჯაგვარალდორჯიც ასევე დაამარცხა და მხოლოდ ფინალი დათმო ოგუზოვთან, სადაც უფრო თავისი გამოუცდელობით მოჰყვა იპონზე.

ცული რას დამაკლებდაო

ტურნირი წარმატებად ეთვლება ტატო გრიგალაშვილსაც, ვინც სხვა მედალოსნებზე პატარაცაა და წლეულს ისიც ასევე ახალ წონაში ჭიდაობს. ის რომ ტალანტია, შარშანაც დაამტკიცა თბილისის ტურნირზე, სადაც ნიჭი სრულად გამოავლინა.

ანთალიას მან გრიგალივით "გადაუქროლა", მაგრამ მისი წინსვლა თურქმა ვედათ ალბაირაკიმ შეაჩერა. თუმცა ხის ჩივილი ხომ გაგიგიათ, ცული რას დამაკლებდა, ჩემივე ნაწილი რომ არ ერიოსო: სინამდვილეში, ის ქართველი ვანო რევაზიშვილია, ყოფილი ბერძენი რომან მასტოპულოსი, ჩვენი სახელოვანი ძიუდოისტის - გიორგი რევაზიშვილის შვილი, ვინც ახლა ამ გვარ-სახელით თურქეთის დროშით გამოდის.

არადა, გრიგალაშვილმა თავიდანვე დაატრიალა გრიგალი ანთალიაში: მასპინძელთა კიდევ ერთ ნატურალიზებულ მაგომედ ჩეჩენოღლუსთან წმინდა მოგება იქნებ მოსალოდნელიც იყო და ამიტომ ბევრს არც გაჰკვირვებია, მაგრამ მეორე წრეში თვით ირანელთა მსოფლიოს ბრინჯაოს მედალოსანი საეიდ მოლაე მეორედ რომ დაანარცხა ტატამს, ეს კი უკვე მისი ასაკის ბიჭისგან დიდი სიურპრიზი იყო.

ირანელის შემდეგ მოლდოველი დორინ კოტონოაგა წაგებისთვის განწირულიც კი იყო და არც გრიგალაშვილმა დაახანა - ერთ წუთზე ოდნავ მეტი დასჭირდა ამისთვის, მერე კი ლამის რვაწუთიან თრილერში გადაეშვა ნახევარფინალში - ალბაირაკისთან ორთაბრძოლა დამატებით დროში გაგრძელდა და მერვე წუთის დასაწყისში მეტოქის ვაზარით დასრულდა.

ამ ხანგრძლივი ორთაბრძოლით დაღლილ გრიგალაშვილს შესვენების მერეც ბრინჯაოსთვის შეხვედრაში უმძიმესი ბრძოლა ელოდა ძლიერ უნგრელ ლასლო ჩოკნიაისთან, თუმცა აქტიური ჭიდაობით მალევე მიაღებინა სამი გაფრთხილება და უფროსებში ასევე პირველი მედალი მოიპოვა. ვფიქრობთ, 81 კილოგრამში საქართველოს და ძიუდოს სამყაროს კიდევ ერთი ძლიერი ფალავანი მოევლინა.

წაგებულთა დასანანი სია

ანთალიაში საქართველოდან კიდევ რამდენიმე ფალავანი გამოდიოდა და ერთ-ერთი ყველაზე საინტერესო ფიგურა ობერვარტის ტურნირის ფინალისტი მძიმე წონაში გიორგი ქავთარაძე გახლდათ.

სამწუხაროდ, მან ამჯერად ბევრი ვერაფრით დაგვამახსოვრა თავი, თუმცა მისი მეტოქის - კორეელი სუნგმინ კიმის ფაქტორიც აღსანიშნავია, როგორც ძლიერი კონკურენტისა და აკი, თურქეთში საბოლოოდ მესამეზეც გავიდა. მასთან წაგებამდე ქავთარაძემ ბერძენი დიმიტრიოს ცუმიტასი დაამარცხა. ამავე წონაში ასევე ერთი შეხვედრა მოიგო გიორგი ზაქარიაძემ - რუს რომან ბობიკოვთან, მერე კი ყირგიზ იური კრაკოვეცკისთან წააგო.

ასევე საინტერესო იყო გიგა გიგაურის (81 კგ) გამოსვლა, ამჯერად, ვერც მან ივაჟკაცა: პირველ წრეში თურქმენი პარახატ ბაშიმოვი კი დაამარცხა, მაგრამ მერე გრიგალაშვილისგან გაცამტვერებულ ჩოკნიაისთან წააგო.

ნიკოლოზ ჭიკაიძე (66) პირველივე შეხვედრაში დამარცხდა ებრაელ იარინ მენაგედთან. ასევე პირველივე ორთაბრძოლა დათმო ზაურ კენჭაძემ (100), რაც ფრიად დასანანია ამ ნიჭიერი მოზარდისგან, თუმცა კი რეიტინგის ფავორიტ უნგრელ მიკლოშ ცირიენიჩთან წააგო.

ომარ ნიაზაშვილი (73) ძიუდოს "ჯუჯებს" დაერია: ყატარელი მოჰამედ რებაი და ტაივანელი ჩია-ჰუან ლინი დააიპონა, ბრაზილიელ დავიდ ლიმასთან კი თვითონ წააგო - ვაზარით. 100-ში დავით რამაზაშვილმა ტაივანელ გუან ჟი ლუს კი აჯობა, მაგრამ ქართველებისთვის უხერხულ მეტოქედ ქცეულ რუს ნიიაზ ილიასოვს - ვერა.

ყოველდღიური სპორტული გაზეთი "ლელო"
569
მკითხველის კომენტარები / 0 /
მსგავსი ამბები
რუბრიკის სხვა სიახლეები