ძიუდო. ანი და მოლაი იჭიდავებენ... არადა სჯობდა...

ტოკიოში მიმდინარე ძიუდოისტთა მსოფლიოს პირველობაში კორეელთა მსოფლიოს ჩემპიონი ბაულ ანიც (66) იჭიდავებს და იმავე ტიტულის მფლობელი, პლანეტის შარშანდელი გამარჯვებული საიდ მოლაიც (81). ამის შესახებ ტოკიოში მყოფი ჩვენი დელეგაციის წევრებისგან შევიტყვეთ, ისე კი ორივე სპორტსმენი შეტანილია წილისყრის ოქმებში.

ანის გამოუსვლელობაზე ხმები ჩემპიონატის დაწყებამდე რამდენიმე დღით ადრე გავრცელდა, მიზეზად კი ტრავმას ასახელებდნენ, თუმცა, როგორც ამბობენ, ეს პრობლემა უკვე მოგვარდა და კორეელი ხვალ იასპარეზებს. არადა, ჩვენთვის ჯობდა, არ ეჭიდავა, რადგან ბადეში ბაგრატ ნინიაშვილის მხარესაა. თუმცა ევროპული თამაშების პრიზიორ ჩვენებურს უსეც არ აკლია ძლიერი კონკურენტები - ამ ბადის ფავორიტი იაპონელთა მსოფლიოს ორგზის ჩემპიონი ჰიფუმი აბეა.

რაც შეეხება მოლაის, მისი დაკლების შესახებ ინფორმაცია ტურნირის დაწყებამდე ორი დღით ადრე გავრცელდა, მიზეზი კი... ებრაელ სპორტსმენ საგი მუკისთან შესაძლო შეხვედრისთვის თავის რიდება იყო. ოღონდ თავად სპორტსმენის კომენტარებიდან ირკვეოდა, ის მზად იყო ებრაეთან საჭიდაოდ, მაგრამ ოფიციალური თეირანი არ აძლევდა ამის ნებას და ამიტომ ტურნირიდანაც მოხსნეს. ახლა მოლაი ამბობს, რომ ის პრობლემები მოგვარდა და მას დართეს ჭიდაობის ნება. სავარაუდოდ, ირანზე ზეწოლა ძიუდოს საერთაშორისო ფედერაციამ მოახდინა, რომელმაც ირანული სპორტის მმართველ სტრუქტურებთან გააფორმა მემორანდუმი, რომლითაც ირანი იღებდა ვალდებულებას, რომ არ დაეშვა დისკრიმინაციული ქმედებები და პატივი ეცა ოლიმპიური ქარტიისთვის.

ძალიანაც კარგი, მოლაის თუ დართეს ნება, მაგრამ საკითხავია, რას ერჩოიდა თეირანი თავის მეორე სპორტსმენს, მსოფლიოს შარშანდელ ბრინჯაოს პრიზიორ მოჰამად მოჰამადის (73), ვისაც იმავე მიზეზით აუკრძალეს მსოფლიოს ჩემპიონატში გამოსვლა და არც კი გაუშვეს ტოკიოში?

1451
მკითხველის კომენტარები / 0 /
მსგავსი ამბები
რუბრიკის სხვა სიახლეები
;