ძიუდო. ახალგაზრდების ისტორიული წარმატება მსოფლიო ჩემპიონატზე

როგორც გუშინ გაცნობეთ, ბაჰამის კუნძულებზე დასრულებულ ახალგაზრდა ძიუდოისტთა მსოფლიოს ჩემპიონატზე ლაშა გუჯეჯიანის გაწვრთნილმა ბიჭების ნაკრებმა 5 მედალი მოიპოვა - 2 ოქრო და 3 ბრინჯაო.

მსოფლიოს ჩემპიონები ლაშა ბექაური (90) და გელა ზაალიშვილი (+100) გახდნენ, ხოლო მესამეზე ჯაბა პაპინაშვილი (60), ლუკა მაისურაძე (81) და ონისე სანებლიძე (100) გავიდნენ. საქართველო საერთო გუნდურ ჩათვლაში მეხუთეა, ბიჭებში კი - მეოთხე. იმასაც შეგახსენებთ, რომ ჩვენებს ახალგაზრდებში მსოფლიოზე ასეთი წარმატება ადრე არასოდეს მოუპოვებიათ.

არადა, ორი დასანანი მარცხი რომ არა, შედეგი რაოდენობრივადაც უკეთესი იქნებოდა და - ხარისხობრივადაც. პირველი სანებლიძის წაგებაა ნახევარფინალში ჰოლანდიელ სიმეონ კატარინასთან, როცა თავად გამოუწერა საკუთარ თავს წაგება, თორემ დიდი ალბათობით, ევროპის ჩემპიონატის მსგავსად, აქაც სამი ოქრო გვექნებოდა, მეორე კი მაისურაძის არასაკმარისი გარჯაა მეოთხედფინალში უნგრელ რობერტ რაჯკაისთან:

ჩვენებურს ნამდვილად შესწევდა მისი დამარცხება და მერე ნახევარფინალშიც თუ იმარჯვებდა, უკეთესი შედეგი ხომ ექნებოდა, თუ არადა, იქ რომც წაეგო, დამამშვიდებელში თანაგუნდელ ტატო გრიგალაშვილს ასცდებოდა, ვისაც ბრინჯაოს მოპოვების დიდი შანსი ჰქონდა.

ამის თქმის საფუძველს ბაჰამებზე ტატოს ჭიდაობის ხარისხი გვაძლევს, მაისურაძესთან კი, უბრალოდ, უჭირს ჭიდაობა. შეგახსენებთ, რომ ისინი სექტემბერში ევროპის ჩემპიონატის ფინალშიც შეხვდნენ ერთმანეთს და მაშინაც მაისურაძემ მოუგო. ის ერთი წლით უფროსია გრიგალაშვილზე და თან, როგორც ჩანს, მისთვის უხერხული მეტოქეც.

ამ ნაკრებში ხსენებული ტურნირის უდავო აღმოჩენად ბექაური უნდა მივიჩნიოთ, ვინც სეზონის უდიდესი სენსაციაცაა - ჭაბუკებიდან წლეულს გადმოვიდა, თანაც ორი წონით მაღლა აინაცვლა და ამხელა წარმატებაც მოიპოვა. მისი გამარჯვების შესაფასებლად ისიც კმარა, რომ ბაჰამებზე, საჩემპიონო გზაზე ორი იაპონელი დაამარცხა - მეოთხედფინალსა და ფინალში. თანაც ფინალში სანშირო მურაო სულ რაღაც 35 წამში გამოცელა უკნიდან და ტომარასავით მოწყვეტით დააგდო ბეჭებზე.

ქვეჯგუფში ჩვენებურმა ჯერ კანადელი ბენჯამინ კანდრიცკი დაამარცხა ვაზარით, მერე კი ლატვიელი ემილს გერკენსი ნახევარ წუთში დააიპონა. მეოთხედფინალში იაპონელ კოსუკე მაშიამასთან უმძიმესი ბრძოლა გადაიხადა: ორივეს 2-2 გაფრთხილება ჰქონდა, როცა მეტოქეს დამატებით დროში მესამეც მიაღებინა და მოახსნევინა, თუმცა მანამდე იყო მისი გდება, რომელიც მსაჯებმა გააუქმეს. ნახევარფინალში ბექაურმა მორიგი წმინდა გამარჯვება სერბ დარკო ბრასნიოვიჩთან მიითვალა, ვისაც წლეულს საერთაშორისო ტურნირებზეც მოუგო.

ზაალიშვილმა პირველივე შეხვედრა ფინალის ტოლფასი ჩაატარა, როცა იაპონელი გოლიათი (160 კილოგრამზე მეტია) ტაცურო საიტო უკნიდან გამოცელა და იპონზე დააგდო (მას მეორედაც მოუგო - გუნდურზეც), ჩილელ ფრანსისკო სოლისსაც დაახლოებით ამგვარად აჯობა, მაგრამ ის კიდევ უფრო მოწყვეტით დაახეთქა ტატამზე, ნახევარფინალში კი რუს ჯამალ გამზათხანოვთან მესამე იპონი კისრულით მიითვალა. ჯამში ჩვენებურს ფინალში გასასვლელად დაახლოებით ერთი წუთი ეყო.

ფინალში ზაალიშვილის მეტოქე ძლიერი ავსტრიელი სტეფან ჰეგი იყო - სპორტსმენი, ვინც შარშან ბუდაპეშტში, უფროსთა მსოფლიოს ჩემპიონატზე თვით იაპონელთა ოლიმპიადის ვიცე-ჩემპიონი ჰისაიოში ჰარასავა დაამარცხა, ხოლო წლევანდელ ევროპირველობაზე ასევე უფროსებში მესამე იყო. ის ახალგაზრდებში ევროპისა და მსოფლიოს შარშანდელი ფინალისტია და ორჯერვე რუს ინალ ტასოევთან წააგო, ახლა კი მის არყოფნაში ოქროზე იყო დაგეშილი. საბედნიეროდ, ამჯერად ზაალიშვილმა შეძლო ამ სტატისტიკის შეცვლა: თავიდანვე აქტიურად, დაზვერვის გარეშე შეუტია ჰეგის და წუთ-ნახევარში ზედა ჩავლებიდან გამოცერა. ის პირველად გახდა მსოფლიოს ჩემპიონი.

ნასაუში 81 კილოგრამში ორივე ჩვენებური მეოთხედფინალში დამარცხდა. მანამდე გრიგალაშვილმა ჰოლანდიელი კოენ ვან ვინდენი ვაზარით დაჯაბნა, ხოლო თურქ მუჰამედ კოჯს ვაზარი გაუქვითა და წმინდად მოუგო. ამას იაპონელ ჰირომასა კასაჰარასთან შეხვედრა მოჰყვა, ვისაც თავიდან სწორი ტაქტიკით ეჭიდავა და ვაზარიც გაუქვითა - ქამრიდან აყვანით გადააგდო, მაგრამ დამატებითში მეტოქემ კონტრშეტევაზე ილეთი გაუგრძელა და წააგო. ისე კი მისი გდება ძალიან ჰგავდა იპონს.

მაისურაძემ მექსიკელი ფრიკერ ტინტოსი იოლად დააიპონა, მაგრამ აზერბაიჯანელ მურად ფატიევთან დამატებითში ლამის 9 წუთი იჭიდავა და ბოლოსღა გატეხა. მას მეოთხედფინალშიც დამატებითი დრო დასჭირდა უნგრელ რობერტ რაჯკაისთან და მეტოქემ უკნიდან გამოცერა.

დამამშვიდებელში ქართველების პაექრობა გრიგალაშვილის უპირატესობით დაიწყო, მაგრამ საბოლოოდ მაისურაძის გარესარმით დასრულდა, ვინც ბრინჯაოსთვის შეხვედრაში ჩინებულად იჭიდავა უზბეკ ჯახონჯირ მაჯიდოვთან - მეტოქე ამოსმულს ცდილობდა, მაგრამ ამან ბეჭებზე ჩაატრიალა.

შეიძლება ითქვას, ოქროს მედალი თუ არა, მინიმუმ, ფინალის საგზური თავად დაკარგა სანებლიძემ, ნახევარფინალში ისეთი შეხვედრა წააგო კატარინასთან: დამატებით დროში წელში შესული მეტოქე მის ჩატრიალებას ცდილობდა, მაგრამ სანებლიძემ შუაკაური ამოუსვა და ორივე გადავარდა.

არადა, ქვეჯგუფში სანებლიძემ ძალიან იოლად, თამაშ-თამაშით მიყარ-მოყარა ორი მეტოქე: გერმანელი ივო ვიტასეკი პირდაპირ ბეჭებზე დააგდო, დანიელ მათიას მადსენს კი იპონამდეც გაუკეთა გდება.

მოგვიანებით ნაკლები დღე არც დამამშვიდებლის ფინალში აყარა კანადელ შადი ელნაჰასს: ორი წუთის შემდეგ ბრუნით ტომარასავით დააწყვიტა ტატამს სავაზარედ და მერეც უტევდა. მან ორი გაფრთხილებაც მიიღო, ოღონდ ამით დრო მოიგო, თორემ დარჩენილ დროშიც საგრძნობ უპირატესობას ფლობდა. 20 წამით ადრე ერთი გდებაც გააკეთა, მაგრამ არ შეუფასეს.

უმედლოდ დარჩა ახალგაზრდებში ევროპის წლევანდელი ბრინჯაოს მედალოსანი ბაგრატ ნინიაშვილი (66): ბრაზილიელ ვილიან ლიმასთან მოგების შემდეგ იაპონელთა მომავალ პრიზიორ იუჯი აიდასთან წააგო. ზაურ კენჭაძე (100) პირველ წრეშივე დამარცხდა გერმანელ ევროპის მედალოსან დანიელ ზორნთან.

პირველივე პაექრობა წააგო ამ ასაკში ევროპის წლევანდელმა ვიცე-ჩემპიონმა ეთერ ლიპარტელიანმაც (57) - ხორვატ ტეა ტოპოლოვიჩთან. ბრინჯაოს მედალოსანმა მარიამ ჭანტურიამ (70) ამერიკელ ჯულია სიმონიანს მოუგო და მერე ბრაზილიელ ელენ სანტანსაც ორი გაფრთხილება მიაღებინა, მაგრამ დამატებითში ილეთზე მოჰყვა და ხელიც იტკინა. თან ისე მაგრად, რომ ორი დღის შემდეგ გუნდურიც ვეღარ იჭიდავა და ის ტურნირი კაცნაკლულმა ჩავატარეთ. ერთი წრე გაიარა ევროპის კიიდევ ერთმა წლევანდელმა მესამე პრიზიორმა სოფიო სომხიშვილმა (+78) - ავსტრიელ მარია ჰოლვარტთან იმარჯვა, მაგრამ წააგო იაპონელთა მომავალ მსოფლიოს ჩემპიონ ჰიკარუ კოდამასთან.

გუნდური პირველობა რაღაც ძალიან უღიმღამო გამოდგა და ბაჰამებზე ჩასული 67 ქვეყნიდან მასში მონაწილეობა მხოლოდ... 7-მა ისურვა! სედეფად, რეიტინგის ფავორიტი იაპონია ჯგუფში მარტო იყო და უბრძოლველად მიიღო ნახევარფინალის საგზური, დანარჩენ სამ ჯგუფში კი 2-2 გუნდი განაწილდა. ჩვენები ფრანგებთან მოხვდნენ, ამათში მოგებული კი ნახევარფინალში იაპონიას ხვდებოდა.

ბაჰამებზე გუნდურში საჭიდაოდ დამატებული მხოლოდ ალეკო მამიაშვილი გვყავდა 73 კილოგრამში, პირადში კი ამ წონაში მონაწილე არ გვყოლია. როგორც გითხარით, გუნდურში მონაწილე გვაკლდა - 70-ში და შეხვედრებს ერთქულიანი ჩამორჩენით ვიწყებდით. ამის მიუხედავად, ჩვენებმა ფრანგებს 5:3 მოუგეს და ნახევარფინალში გავიდნენ.

"მამლებთან" პაპინაშვილმა, მამიაშვილმა, ბექაურმა, სომხიშვილმა და ზაალიშვილმა იმარჯვეს, ტატა ყიფშიძე (48) და ლიპარტელიანი კი დამარცხდნენ, ხოლო მესამე წაგება 70-ში ჩაგვეთვალა. ნახევარფინალში იაპონიასთან 1:5 დავთმეთ. მათთან მხოლოდ ზაალიშვილმა იმარჯვა, ვინც მეორედ მოუგო საიტოს.

მამიაშვილმა და ბექაურმა ფრედ დაასრულეს თავიანთი პაექრობები (ბექაური ისევ მაშიამას შეხვდა), სხვები კი დამარცხდნენ. სამწუხაროდ, ჩვენებმა ბრინჯაოსთვის შეხვედრაც დათმეს რუსებთან: 2:3. აქ ლიპარტელიანმა, ბექაურმა და ზაალიშვილმა მოიგეს, ჩვენები კი საბოლოოდ მეხუთეზე დარჩნენ.

ყოველდღიური სპორტული გაზეთი "ლელო"
1019
მკითხველის კომენტარები / 0 /
მსგავსი ამბები
რუბრიკის სხვა სიახლეები
;