ძიუდო. ბექა ღვინიაშვილის მენისკი... როდის დაბრუნდება გორელი ფალავანი?

ერთი თვეც არაა გასული, რაც ძიუდოში ევროპის ბრინჯაოს მედალოსანმა ბექა ღვინიაშვილმა (90) თბილისში მარცხენა ფეხზე მენისკის ოპერაცია გაიკეთა. როგორც მისმა პირადმა მწვრთნელმა გია თენაძემ გვითხრა, სარეაბილიტაციო პერიოდი გეგმის მიხედვით, შეუფერხებლად და გართულებების გარეშე მიმდინარეობს და ათლეტი დეკემბერში უკვე შეძლებს ტატამზე სავარჯიშოდ შესვლას. ოღონდ თავიდან მსუბუქად დაიტვირთება, მისი სიმძიმე კი თანდათან გაიზრდება.

ღვინიაშვილი სარეაბილიტაციო პროგრამით გათვალისწინებულ ვარჯიშებს ახლაც ასრულებს, თუმცა ესაა სპეციფიური ვარჯიშები, რომელიც ფიზიკურ დატვირთვებსაც შეიცავს, მაგრამ, ბუნებრივია, ფეხს დატვირთვა ჯერ არ ადგება.

შეგახენებთ, რომ ღვინიაშვილმა ტრავმა სეზონის დასაწყისში, პარიზის `დიდ მუზარადზე~ მიიღო ფინალში იაპონელ მუკაისთან. მას შემდეგ მან მთელი სეზონი ტრავმირებული ფეხით ჩაატარა და, ბუნებრივია, სრულად ვერ იტვირთებოდა. ალბათ, სასურველიც იქნებოდა, ოპერაცია იმთავითვე გაეკეთებინა, მაგრამ ეს პროცესი აქამდე გაიწელა და როგორც კი მსოფლიოს ჩემპიონატი ჩაამთავრა, მაშინვე დაიწყო ზრუნვა ოპერაციის გაკეთებაზე.

იმედია, პრობლემები არც ვარჯიშების განახლების შემდეგ გაჩნდება და ღვინიაშვილი დიდ სპორტს მომავალი სეზონის განახლებისთანავე დაუბრუნდება. მით უფრო, სალიცენზიო ტურნოირები უკვე დაწყებულია, მათი ფასი და იქ მოპოვებული ქულები კი თანდათან უფრო მნიშვნელოვანი გახდება. არადა, 90 კილოგრამი ჩვენს ნაკრებში კონკურენციის თვალსაზრისით ერთ-ერთი ყველაზე რთული წონაა, სადაც ღვინიაშვილს კონკურენციას ევროპის სამგზის და მსოფლიოს ჩემპიონი ავთანდილ ჭრიკიშვილი და მსოფლიოს ბრინჯაოს მედალოსანი უშანგი მარგიანი უწევენ. თუმცა ეს სადღეისო მოცემულობით, თორემ დიდი ალბათობით, გაისად მათ კონკურენციაში ახალგაზრდებიც ჩაერთონ.

962
მკითხველის კომენტარები / 0 /
მსგავსი ამბები
რუბრიკის სხვა სიახლეები