[ძიუდო] ბრინჯაო წმინდა მიწიდან

საქართველოს ძიუდოისტთა ნაკრებმა ერთი ბრინჯაოთი დაასრულა გამოსვლა თელ ავივის „დიდ პრიზზე“ - მას ლუკა მაისურაძე დაეუფლა 81 კილოგრამში.

მსოფლიოსა და მეორე ევროპული თამაშების ბრინჯაოს მედალოსანმა ისრაელში ხუთი პაექრობა ჩაატარა, თუმცა პირველ წრეში თავისუფალი იყო, როგორც განთესილი. მეორეში მან ყაზახი რუსლან მუსაევი დააიპონა, მერე კი გაფრთხილებებით მოახსნევინა თურქი მუჰამად კოჯი. ერთადერთი მარცხიც ამის შემდეგ განიცადა. არადა, ცოტა მოულოდნელი კი იყო ბერძენ ალექსიოს დანაციდისთან წაგება. მართალია, ისინი ერთმანეთს პირველად შეხვდნენ, მაგრამ ბერძენს არც მაისურაძის სადარი მედლები გააჩნია და თან ქართველს მასზე ბევრად ტიტულოვანი ძიუდოისტებიც დაუმარცხებია. თუმცა ეს ამ უშუალო დაპირისპირებაში მაისურაძეს არაფერში წაადგა და შეხვედრა ვაზარით დამარცხებულმა დატოვა. სანუგეშო წრეში ჩვენმა ფალავანმა კიდევ ერთი მეტოქე მოახსნევინა გაფრთხილებებით - რუსი ტურპალ ტუპკაევი, ბრიონჯაოსთვის პაექრობაში კი დამატებით დროში ბერძენზე ბევრად უფრო ძლიერი მეტოქე, თურქთა ქართველი მსოფლიოს მესამე პრიზიორი ვედატ ალბაირაქი დაამარცხა (ბოლო პერიოდში - უკვე მეორედ). ოღონდ საამისოდ დამატებითი დრო დასჭირდა, თუმცა კი არც ძირითადში დაუთმო რამე. დამატებითი დროის მეექვსე წუთი მიმდინარეობდა, როცა ალბაირაქმა წელში შესვლიდან სცადა ილეთის გაკეთება, მაგრამ მაისურაძეც მაგრად დაუდგა და გარეფეხიდან მაინც მოახერხა მისი ვაზარზე გადაგდება. ამით ჩვენმა სპორტსმენმა სალიცენზიო ჩათვლაში ბლომად ქულები შეიმატა.

სამწუხაროდ, ჩვენი გუნდის სხვა წევრებმა მაისურაძეს მხარი ვერ აუბეს. თელ ავივში ჩვენი ვაჟთა ნაკრების სახელით კიდევ სამი ძიუდოისტი გამოვიდა, იმათგან კი პირველი წრის გადალახვა ორმა შეძლო. ოღონდ ამ დუეტიდან ილია სულამანიძეს (100) ნამდვილად ვერ გავაკრიტიკებთ მარცხისთვის, რადგან კორეელთა მსოფლიოს ჩემპიონ გუჰამ ჩოსთან დამარცხდა. მანამდე ჩვენმა დებიუტანტმა დამაჯერებლად დაჯაბნა შვეიცარიელი ოტო იმალა - ჯერ ვაზარი აართვა, შემდეგ კი იპონზეც დააგდო და უფროსებში პირველი გამარჯვება მოიპოვა. აი, სწორედ ამის შემდეგ გადაიკვეთა მისი გზა ჩოსთან, ვინც ამ ეტაპზე ნამდვილად გაცილებით მაღალი დონეა.

სულამანიძის მსგავსად, ამ რანგის შეჯიბრებაზე იმედა გოგოლაძესაც (90) დებიუტი ჰქონდა, თუმცა თავდაპირველად არც მას გასჭირვებია რუმინელი გეორგე როტარუს დამარცხება - წმინდად მოუგო. აი, შემდეგ კი ავსტრიელ ჰარისონ კასართან დამარცხდა.

ერთი შეხედვით, წაგებისთვის გელა ზაალიშვილის (+100) გამტყუნებაც ძნელია, რადგან პირველივე შეხვედრაში მეტოქედ იაპონელი იუსუკე კუმაშირო ერგო - ამ ტურნირის მომავალი ბრინჯაოს მედალოსანი, ვინც დეკემბერში ოსაკაშიც იჭიდავა ბრინჯაოსთვის. თუმცა კი ზაალიშვილს ამ წონაში იაპონელთა ლიდერი, მსოფლიოსა და ოლიმპიადის ფინალისტი ჰისაიოში ჰარასავაც დაუმარცხებია და თანაც, უკვე მერამდენე შეჯიბრებაა, როცა ჩვენი ერთ-ერთი ყველაზე იმედისმომცემი ახალგაზრდა პირველივე წრეში აგებს.

ვაჟებისგან განსხვავებით, თელ ავივში ჩვენი ქალთა ნაკრები უძლიერესი შემადგენლობით გამოდიოდა, თუმცა ისინიც უმედლოდ დარჩნენ. ჩვენი ხუთი წარმომადგენელიდან სამმა პირველივე დღეს იჭიდავა და მათი გამოსვლის შესახებ უკვე გიამბეთ, ბოლო დღეებში კი ჩვენი ორი წარმომადგენელი გამოდიოდა. სამწუხაროდ, ორივე მათგანი პირველივე შეხვედრაში დამარცხდა. არ ვიცი, ნუგეშად რამდენად გამოდგება ის ფაქტი, რომ ორივემ დამატებით დროში წააგო: მარიამ ჭანტურიამ (70) დანიელ ემილიე სოოკესთან დათმო, სოფიო სომხიშვილმა (+78) კი - რუს ანჟელა გასპარიანთან.

ცხადია, უმედლოდ დარჩენა ცუდია, თუმცა თელ ავივში ჩვენი გუნდის ასეთი გამოსვლა, გარკვეულწილად, ლოგიკურია, რადგან იქ წასვლამდე ორივე გუნდმა ავსტრიაში მეტად დატვირთული ერთობლივი კემპი გაიარა. თანაც, ქალები მანამდე ფიზიკური მომზადებისთვის განკუთვნილ შეკრებაზეც იყვნენ წასულნი, ვაჟებში კი გამოცდილების მისაღებად 23-წლიანთა ნაკრების წევრები ჰყავდათ წაყვანილი. ჩვენი ნაკრების ძირითადი შემადგენლობა თებერვალში გამოვა პარიზის „დიდ მუზარადზე“.

1500
მკითხველის კომენტარები / 0 /
მსგავსი ამბები
რუბრიკის სხვა სიახლეები
;