ძიუდო. ბუდაპეშტს პაპინაშვილი, ჩხვიმიანი და ნაგლიაშვილი გახსნიან

10 აგვისტოს ბუდაპეშტში სეზონის მორიგი "დიდი პრიზის" ტურნირი იწყება, რომელიც სალიცენზიო ქულებსაც იძლევა. მასში 6 ქვეყნის 578 სპორტსმენი გამოდის - 346 ვაჟი და 232 ქალი. სოლიდური შემადგენლობის მიუხედავად, "დიდი პრიზი" ორ ძლიერ გუნდს მაინც მოისაკლისებს - არ ჩასულან საფრანგეთი და სამხრეთ კორეა. წილისყრით ჩვენებს ასეთი ბადეები ერგოთ.

60 კგ.
ამ წონაში ორივე ჩვენებური მეორე წრიდან იწყებს შეჯიბრებას. ოღონდ ევროპის ჩემპიონისა და მსოფლიოს პრიზიორ ამირან პაპინაშვილის მეტოქე ახლავეა ცნობილი - მასპინძელი ანდრაშ ვიდა. შესაძლოა, იმავე ეტაპზე ლუხუმ ჩხვიმიანიც უნგრელს შეხვდეს, რადგან მისი კონკურენტი მადიარი დანიელ მონორისა და მაროკოელი იასინე მოუდატირის პაექრობაში გამოვლინდება.

გამარჯვების შემთხვევაში პაპინაშვილი მერვედფინალში ესპანელი ხოაკინ გომისისა და ავსტრალიელი ბრაიან ჯოლის წყვილიდან გასული იქნება. თუმცა ჯგუფში ჩვენებურის ყველაზე სახიფათო მეტოქე რუსი ალბერტ ოგუზოვი გვგონია. ნახევარფინალში გასვლის შემთხვევაში მის სავარაუდო მეტოქეთა შორის რუსთა ქართველი ევროპის ჩემპიონი რობერტ მშვიდობაძე და მონღოლთა მსოფლიოს ჩემპიონი ბოლბაატარ განბატიც არიან.

ჩხვიმიანი მომდევნო წრეში გასვლის შემთხვევაში ბულგარელ იანისლავ გერჩევსა და სერბ ფილიპ ნურკიჩს შორის გამარჯვებულს დაუპირისპირდება. ამ ჯგუფის ფავორიტი ესპანელი ევროპის მედალოსანი ფრანსისკო გარიგოსია.

66 კგ.
თორნიკე ნაგლიაშვილი პირველად ნეპალელ ინდრა ბაჰადურ შრეშტას შეხვდება, მოგების შემთხვევაში კი ჩეხ პაველ პეტრიკოვსა და პორტუგალიელ სერგეი ოლეინიჩს შორის უძლიერესს გაეჯიბრება. მერვედფინალის სავარაუდო მეტოქეთა შორის ჩვენებურს ანგარიშგასაწევი გერმანელი სებასტიან სეიდლი ჰყავს, მეოთხედფინალში - რუსი აბდულა აბდულჯალილოვი და იაპონელი კენძო ტაგავა.

73 კგ.
ჩვენებიდან ყველაზე მეტად ფრიდონ გიგანს არ გაუმართლა - პირველივე წრეში მეტოქედ იაპონელთა მსოფლიოს სამგზის ჩემპიონი და რიოს დე ჟანეიროს ოლიმპიადის ბრინჯაოს პრიზიორი მასაში ებინუმა ერგო. ერთი შეღავათი ისაა (ამასაც თუ შეიძლება, შეღავათი ეწოდოს), რომ ებინუმა აქამდე 66-ში გამოდიოდა და ამჯერად ახალ წონაში ჭიდაობს.

81 კგ.
ევროპის პრიზიორი ზებედა რეხვიაშვილი თავდაპირველად რუმინელ ელემერ ჟოცს ხვდება, ხოლო თუ მოუგებს, დიდი ალბათობით, ბულგარელ ივაილო ივანოვს დაეჭიდება, ვინც მანამდე ზამბიელ ანდრეი კასვანგას ხვდება. ამ ჯგუფშის ფავორიტი გერმანელი დომინიკ რესელია, თუმცა ჩვენებური მას მეოთხედფინალამდე არ ხვდება. იქამდე ბელგიელი სამი ჩოუჩიც ანგარიშგასაწევი ძალაა.

90 კგ.
მსოფლიოს მედალოსანი უშანგი მარგიანი თავიდან თავისუფალია, მისი პირველი მეტოქე კი ჩეხი ჟირი პეტრისა და ეგვიპტელი ჰატემ აბდ ელ აკერის პაექრობაში გამოვლინდება.

გიორგი პაპუნაშვილი პირველ წრეში ყირგიზ ფარუხ ბულეკულოვს დაეჭიდება, ხოლო თუ მოუგებს, პოლონელი რაფალ კოზლოვსკისა და ისლანდიელი ეგილ ბლონდალის წყვილიდან ეყოლება მოცილე.

100 კგ.
პირველ წრეში მსოფლიოს რეიტინგის ლიდერი, ევროპის სამგზის გამარჯვებული, მსოფლიოს ორგზის და ოლიმპიადის ფინალისტი ვალერი ლიპარტელიანიც თავისუფალია, ვისაც პირველ მეტოქედ შვეიცარიელი პატრიკ მოსერი ან ჩეხი მიჰალ ჰორაკი ეყოლება. კაცმა რომ თქვას, სულ ერთია, ამათგან ვინც იქნება - მისთვის დიდი საფრთხე არც ერთია. ძლიერი მოცილე არც მესამე წრეში გასვლისას ეყოლება - სლოვაკი მატეი ჰაიასი ან უკრაინელი დანილო ჰუტსოლი. ამ ჯგუფში გერმანელთა მსოფლიოს ვიცე-ჩემპიონი და მესამე პრიზიორი კარლ-რიხარდ ფრეი, საუდის არაბელთა მოლდოველი მსოფლიოს პრიზიორი ივან რემარენკო და ახალგარდა რუსი ნიიაზ ბილალოვიც გამოდიან.

ონისე სანებლიძე გიგანზე არანაკლებ დაჩაგრა წილისყრამ. შეღავათი მხოლოდ ისაა, რომ მას მეორე ეტაპზე ელოდება "იაპონური რისხვა" - მსოფლიოს მოქმედი ჩემპიონი აარონ ვოლფი. თუმცა ერთი "მაგრამ" აქაცაა: ვოლფი მსოფლიოს სემდეგ სერიოზულად დაშავდა და ერთი ხანობა იაპონურმა მედიამ წლევანდელი მსოფლიოს პირველობიდანაც კი ჩამოწერა. არცაა გასაკვირი, რადგან მან ვერ იაპონიის ჩემპიონატში, მაგრამ "მკვდრეთით აღსდგა".
სანებლიძე შეჯიბრებაში პირველივე წრიდან ჩაებმება და მისი გავლა არ უნდა გაუჭირდეს (თავად თუ არ შემოგვთავაზა რამე სიურპრიზი) - იქ გაბონელ ლუკ ოდელინ მანონგოს ხვდება.

+100 კგ.
ევროპის მედალოსანი ლევან მატიაშვილი პირველ პაექრობას სერბ ზარკო კულუმთან ჩაატარებს, თუ მოუგებს, მერე ავსტრალიელ ლიამ პარკსა და არგენტინელ ჰექტორ კამპოსს შორის უძლიერეს დაეჭიდება. ჯგუფის ზედა ნახევარში ძლიერი უკრაინელი იაკივ ხამო და ავსტრიელი სტეფან ჰეგიც არიან.
ევროპის ჩემპიონი, მსოფლიოს მედალოსანი ადამ ოქრუაშვილი პირველ წრეში ეკვადორელ ფრედი ფიგუეროას ხვდება, მეორე წრეში გასვლისას კი კონკურენტად ეგვიპტელ აჰმედ ვაჰიდსა და პოლონელ კამილ გრაბოვსკის შორის მოგებულს დაეჭიდება. ამ ჯგუფის სხვა წევრებიდან ჰოლანდიელ ევროპის პრიზიორ როი მაიერს გამოვარჩევთ.

ყოველდღიური სპორტული გაზეთი "ლელო"
436
მკითხველის კომენტარები / 0 /
მსგავსი ამბები
რუბრიკის სხვა სიახლეები