ძიუდო. გია თენაძე: ეს სასწაული იყო, მარიამ ჭანტურიამ ძალიან გაგვახარა

თბილისის გრანპრი დიდი გარდამტეხი უნდა ყოფილიყო ჩვენი ძუდოისტ ქალთა ნაკრებისთვის: გუნდის ხელმძღვანელობას სწორედ აქ ნანახი სურათით უნდა განესაზღვრა, ჩვენი მეტისმეტად ახალგაზრდული ნაკრებიდან ვის ექნებოდა უფროსებში დარჩენის და ლიცენზიებისთვის ბრძოლის გაგრძელების შანსი, შესაბამისად კი, ვის დააბრუნებდნენ ახალგაზრდულ ნაკრებში.

ახალგაზრდულის თემა კი მათთვის მეტად აქტუალურია, რადგან სალიცენზიო ტურნირებისთვის შერჩეულ ყველაზე პერსპექტიულ 6 გოგოში უფროსთა ასაკის მხოლოდ მარიამ ჯანაშვილია (52), სხვები კი ჯერ ისევ ახალგაზრდები არიან. თუმცა იმათგან ორს - მარიამ ჭანტურიას (70) და სოფიო სომხიშვილს (+78) ჯერ ამ ნაკრებში გამოსვლის გამოცდილებაც არა აქვს, რადგან იქაც კი წლეულს გადმოვიდნენ ჭაბუკებიდან. ამის მიუხედავად, თბილისში ყველაზე მეტად ყველაზე პატარამ - ჭანტურიამ იყოჩაღა და შეუპოვარი ხასიათის დამსახურებით, ბრინჯაოს მედალიც მოიპოვა.

ამ ტურნირმა მწვრთნელებს მართლაც აჩვენა, ვინ დატოვონ უფროსებსი და ვინ დააბრუნონ ახალგაზრდებში. ერთი შეხედვით, უცნაური ჩანს, რომ ჭანტურია მეორე ჯგუფში მოხვდა, თუმცა შეჯიბრებამ ისიც გვაჩვენა, რომ ჩვენი პატარები ჯერ მზად არ არიან უფროსებთან საჭიდაოდ. ვინ გამოვა უფროსებში ევროპის ჩემპიონატზე და რა გეგმები აქვს ქართულ ქალთა ძიუდოს, ამაზე ქალთა ნაკრების მთავარი მწვრთნელი გია თენაძე გვესაუბრება.

"მარიამ ჭანტურია როგორ შემოიჭრა ძიუდოს სამყაროში, ამაზე უკვე ვისაუბრეთ. მან ჯერ თავის ასაკში მოიპოვა წარმატებები, ახლა კი უფროსებშიც აჩვენა ლამის შეუძლებელი. მას ჯერ ახალგაზრდული ნაკრებიც არ გაუვლია - შარშანდელიდან გადმოვიდა იქ, თან წონა შეიცვალა, ახალ წონაში ადაპტაციას კი საკმაო დრო სჭირდება. ამის მიუხედვად, უფროსებში ასე მალე მაინც მოიპოვა პირველი მედალი. ეს სასწაული იყო, ძალიან გაგვახარა და დიდი სტიმული მოგვცა ყველას. ის ნამდვილი ტალანტია და სულ მალე ლიდერებშიც ვიხილავთ.

მედლის მოპოვების რეალური შანსი კიდევ ორ წონით კატეგორიაში გვქონდა. არ ვსაუბრობ ოქროს მედალზე - ეს მართლაც არარეალური იქნებოდა, მაგრამ სხვა სინჯის მედლების მოპოვება შეგვეძლო. 52 კილოგრამში მარიამ ჯანაშვილი ფრანგთა მომავალ ჩემპიონ ამანდინ ბუშართან დამარცხდა. ფრანგი ამ ეტაპზე ჩვენზე ძლიერია და ვიოცნებებდით მასთან მოგებაზე, მაგრამ ჯანაშვილს ბრინჯაოს მოპოვება თავისუფლად შეეძლო, თუმცა კონცენტრირება ვეღარ მოახდინა, ვერ განეწყო მოსაგებად."

ვრცლად იხილეთ გაზეთ "ლელოს" 4 არილის ნომერში

458
მკითხველის კომენტარები / 0 /
მსგავსი ამბები
რუბრიკის სხვა სიახლეები