[ძიუდო]. გოგონების ისტორიული გამოსვლა

უდმურტეთში დამოუკიდებელი ქართული ძიუდოს ისტორია დაიწერა: პირველად მოხდა, რომ ოფიციალურ ტურნირზე ჩვენმა გოგონათა ნაკრებმა ბიჭების გუნდს აჯობა; ასევე პირველად მოხდა, როცა ჩვენმა გოგონათა ნაკრებმა საერთო გუნდურ ჩათვლაში გაიმარჯვა.


ეს სასიხარულო ამბები 23-წლამდელთა ევროპის ჩემპიონატზე მოხდა, სადაც საქართველოს დელეგაციამ წარმატებით იასპარეზა და ხუთი მედალი მოიპოვა: ორ-ორი ოქრო-ბრინჯაო და ერთი ვერცხლი. აქედან ორივე ოქრო გოგონების ანგარიშზე მოდის. ისინი სულ სამი მონაწილით იყვნენ წარმოდგენილნი უდმურტეთში და ორი მათგანი ჩემპიონი გახდა - ეთერ ლიპარტელიანი (57) და მარიამ ჭანტურია (70). აღსანიშნავია, რომ ლიპარტელიანმა წლეულს მოიგო სეზონის სამივე პირველხარისხოვანი შეჯიბრება: ევროპისა და მსოფლიოს ჩემპიონატები 23-წლამდელთა შორის და ევროპის 23-წლიანთა პირველობა, ჭანტურიამ კი 20-წლამდელებში ევროპის ჩემპიონატზე ბრინჯაოს მედალი მოიპოვა, ხოლო მსოფლიოზე ერთადერთი მოგება დააკლდა ანალოგიურ მიღწევამდე.

ბიჭებში ევროპის ვიცე-ჩემპიონი ონისე სანებლიძე (100) გახდა, ხოლო მესამეზე თემურ ნოზაძე და ჯაბა პაპინაშვილი გავიდნენ 60 კილოგრამში. ბრინჯაოსთვის იჭიდავეს, მაგრამ დამარცხდნენ და მეხუთე ადგილზე დარჩნენ ლუკა კაპანაძე (66) და 20-წლიანებში ევროპის წლევანდელი ჩემპიონი ილია სულამანიძე (100). საერთო გუნდურ ჩათვლაში ჩვენი ნაკრები მესამეა რუსეთისა და უნგრეთის შემდეგ. გოგონებმა, როგორც გითხარით, საუკეთესო შედეგი აჩვენეს (გუნდური ჩათვლა ფასდება ოქროს მედლების რაოდენობით, ორი ოქრო კი მხოლოდ საქართველომ მოიპოვა), ბიჭები კი მეხუთეზე არიან.

ოქროს გოგონები

ჩვენს ნაკრებს პირველი ოქრო პირველივე დღეს ლიპარტელიანმა მოუტანა. მის მიერ წაუგებელი შეხვედრების სტატისტიკა უკვე 27-მდე გაიზარდა - თან ამჯერადაც ყველა შეხვედრა იპონით და ილეთით მოიგო, არც ერთში არ გაუმარჯვია გაფრთხილებით ან ვაზარით, ხოლო ფინალში, სადაც, წესით, ყველაზე ძლიერი კონკურენტი უნდა ჰყოლოდა, და სადაც  მასპინძელ დანა ნაგუჩევას შეხვდა, ორი გდებაც კი გააკეთა. მან ამჯერადაც ძალზე ტექნიკურად და სანახაობრივადაც იჭიდავა, ხოლო „ხაბარელის ილეთს“ სამუდამოდ მიუჩინა ადგილი თავის არსენალში. განსაკუთრებით შთამბეჭდავი ნახევარფინალში ტეა ტოპოლოვეცთან მოპოვებული წმინდა გამარჯვება იყო მეოთხედფინალში - ლიპარტელიანმა ბრუნზე კი არ გაისროლა, ბორბალის პრინციპით დაატრიალა და დააჭედა ტატამს. მანამდე ვერც უნგრელმა ბრიგიტა ვარგამ ივარგა ქართველთა დაპირისპირებაში, ხოლო ნახევარფინალში ჩვენებურმა პორტუგალიელი ვისლა გომეში ზუსტად ერთ წუთში მოგვერდით გააკრა ტატამს. ფინალში რუსი დანა ნაგუჩევა უბრალო ლანცეტიც არ აღმოჩნდა, არათუ ბასრი დანა - ბოლო წუთზე ორჯერ დააგდო ჩვენებურმა.

პირველი შეხვედრა გაფრთხილებებით მოიგო ებრაელ მაია გოშენთან - ფიზიკურად ძლიერსა და ძალისმიერი სტილის მიმდევარს მეტოქემ ვერაფერი დაუპირისპირა. თუმცა ჭანტურია მხოლოდ ფიზიკური ძალის იმედად არ ყოფილა და სხვებს ილეთებით მოუგო. მაგალითად, ბელარუს ჟანა ასიპოვიჩს იოტისოდენა შანსიც არ მისცა. ფინალში ჭანტურიამ ბრუნით ვაზარზე დააგდო ამ ასაკში ჰოლანდიელთა ევროპის ექს-ჩემპიონი ჰილდე იახერი და თავის კოლექციას მორიგი ოქრო შეჰმატა. 

სამწუხაროდ, ამჯერად უმედლოდ დარჩა გოგონათა ნაკრების ჩვენი მესამე წევრი სოფიო სომხიშვილი (+78). მან პირველივე პაექრობა დათმო ხორვატ ზრინკა მიოჩიჩთან.

955
მკითხველის კომენტარები / 0 /
მსგავსი ამბები
რუბრიკის სხვა სიახლეები
;