ძიუდო. გუჯეჯიანის გუნდი ევროპას რუსეთიდან შეუტევს

დღეს ღამით, რამდენიმე საათის შემდეგ საქართველოს 23-წლამდელ ძიუდოისტთა ახალგაზრდული ნაკრები რუსეთის ქალაქ იჟევსკში მიფრინავს, სადაც 1-3 ნოემბერს ამ ასაკობრივ კატეგორიაში ევროპის ჩემპიონატში მიიღებს მონაწილეობას. იქ სულ 12 სპორტსმენი გვეყოლება - 9 ბიჭი და 3 გოგონა.

ბიჭების ნაკრების მთავარმა მწვრთნელმა ლაშა გუჯეჯიანმა ბოლოდროინდელი შეჯიბრებებიდან გამომდინარე, ადრე შეგულებულ შემადგენლობაში გარკვეული ცვლილებები შეიტანა და დაასვენა 20-წლამდელთა ნაკრების რამდენიმე ლიდერი: ტატო გრიგალაშვილი (81), ლაშა ბექაური (90) და გელა ზაალიშვილი (+100). ამასთან, ის ამ ასაკობრივ კატეგორიაშიც გამოტოვებს 73 კილოგრამს, სადაც ყველა დონეზე საკადრო კრიზისი მძვინვარებს და ოლიმპიურ ჩემპიონ ლაშა შავდათუაშვილს ღირსეული მოცილე ეგრეც არ უჩანს. შეგახსენებთ, რომ გუჯეჯიანმა ეს წონა 20-წლამდელებშიც გამოტოვა ევროპაზეც და მსოფლიოზეც. თუმცა იქ ამასთან ერთად 60-იც გამოტოვა, სადაც ახლა ერთბაშად ორი მონაწილე გვეყოლება. სულ კი მწვრთნელი კვოტას აქაც სრულად იყენებს და იმ შეჯიბრებათა დარად, ახლაც 9 კაცს ეყრდნობა.

გოგონებში მხოლოდ სამი მონაწილე გვეყოლება. მართალია, ამ ტურნირზე გუნდური პირველობა არ იმართება, თუმცა გია თენაძეს მხოლოდ იმ სამ წონაში მიჰყავს მონაწილენი, რომლებიც შერეულ ნაკრებში გოგონების წონებად შედიან. თუმცა, ობიექტურად რომ ვთქვათ, მას მედლის რეალური კანდიდატი მეტი არც ჰყავს. ამ ტრიოში ისევ დაბრუნდა მძიმეწონოსანი სოფიო სომხიშვილი, ვისაც ამ ცოტა ხნის წინ მამა გარდაეცვალა და ამიტომ გამოტოვა 20-წლამდელთა მსოფლიოს ჩემპიონატი.

საინტერესოა, რომ, ძიუდოს ევროპული საიტი ჩემპიონატის წინათქმაში ეთერ ლიპარტელიანს (57) 2019 წლის სეზონის სუოერვარსკლავს უწოდებს, მის გარდა კი ჩვენი ფალავნებიდან ყურადღებას ჯაბა პაპინაშვილზე (60), ვლადიმერ ახალკაცზე, ტატო გრიგალაშვილზე (ორივე - 81), ლაშა ბექაურსა (90) და ონისე სანებლიძესზე(100) აჩერებს, თუმცა, როგორც გითხარით, გრიგალაშვილი და ბექაური არ იჭიდავებენ.

იჟევსკში 1 ნოემბერს 60-66 კილოგრამის ბიჭები და 48, 52, 57-ის ქალები იასპარეზებენ. 2-ში, შესაბამისად, 73-81 და 63-70 კილოგრამებისა, ხოლო დანარჩენები კვირას, 3 ნოემბერს იასპარეზებენ.

საქართველოს ნაკრები
ბიჭები
60 კგ. ჯაბა პაპინაშვილი, თემურ ნოზაძე
66 კგ. გიორგი თუთაშვილი, ლუკა კაპანაძე
81 კგ. ვლადიმერ ახალკაცი
90 კგ. მიხეილ ბექაური, იმედა გოგოლაძე
100 კგ. ონისე სანებლიძე, ილია სულამანიძე

გოგონები

57 კგ. ეთერ ლიპარტელიანი
70 კგ. მარიამ ჭანტურია
+70 კგ. სოფიო სომხიშვილი

815
მკითხველის კომენტარები / 0 /
მსგავსი ამბები
რუბრიკის სხვა სიახლეები
;