ძიუდო. ევროთამაშებისთვის ნაკრების სია ცნობილია

უკვე ამოიწურა მეორე ევროპულ თამაშებზე ძიუდოისტთა რეგისტრაციის ვადა და საქართველოს ვაჟთა ნაკრების მთავარმა მწვრთნელმა ნოდარ მეტრეველმაც დაასახელა იქ წასაყვანი შემადგენლობა.

დიდი ოლიმპიადის მსგავსად, ძიუდოისტებს ამ თამაშებზეც სათანადო რეიტინგი უნდა მოეპოვებინათ ანუ დაეგროვებინათ ქულები და მოხვედრილიყვნენ სალიცენზიო ზონაში, რაც შვიდივე წონაში შევძელით, მწვრთნელმა კი ორი წონა - 60 და 66 გააორა. მეტრეველის გადაწყვეტილებით, ივნისის ბოლოს მინსკში შემდეგი ფალავნები იჭიდავებენ:

ევროპის ჩემპიონი, მსოფლიოს ორგზის მესამე პრიზიორი ამირან პაპინაშვილი, ლუხუმ ჩხვიმიანი (ორივე - 60), ევროპის ჩემპიონი, მსოფლიოს მესამე პრიზიორი ვაჟა მარგველაშვილი, ბაგრატ ნინიაშვილი (60), ოლიმპიური და ევროპის ჩემპიონი ლაშა შავდათუაშვილი (73), ახალგაზრდებში ევროპის ჩემპიონი და მსოფლიოს მესამე პრიზიორი ლუკა მაისურაძე (81), ევროპის ბრინჯაოს მედალოსანი ბექა ღვინიაშვილი (90), ევროპის სამგზის ჩემპიონი, მსოფლიოს სამგზის და ოლიმპიადის ფინალისტი ვალერი ლიპარტელიანი (100) და ევროპისა და მსოფლიოს მოქმედი ჩემპიონი გურამ თუშიშვილი (+100).

როგორც გითხარით, ძიუდოისტებს ლიცენზიები რეიტინგის მიხედვით უნდა მოეპოვებინათ, თუმცა სხვადასხვა წონაში სხვადასხვა რაოდენობაა დაშვებული. მაგალითად, ვაჟებში ყველაზე მეტი მონაწილე 73 კილოგრამში იქნება - 42, ყველაზე ცოტა კი მძიმეში - 24.

მსოფლიოს რეიტინგში ლამის ყველა წონაში მოწინავეთა შორის ვართ და მინსკის საგზურების დაუფლება ჩვენთვის პრობლემური არ ყოფილა. ბოლო პერიოდამდე მხოლოდ 81-ში ვერ ვინაღდებდით ბელარუსში წასვლას, მაგრამ მაისურაძის ჯერ ეკატერინბურგულმა ბრინჯაომ, მერე კი ანტალიურმა ოქრომ ეს პრობლემაც მოგვიხსნა - რეიტინგში 23 ადგილით წაიწია წინ და 29-მდე ავიდა, საგზურს კი 38 იღებდა. ნაკრებში პირველხარისხოვან შეჯიბრებაზე მასაც და ნინიაშვილსაც დებიუტი ექნებათ.

ევროპული თამაშები დიდი ოლიმპიადების ანალოგიით ტარდება და ამიტომ გუნდურში დამატებითი მოჭიდავეების წაყვანის უფლებას არ გვაძლევენ. შესაბამისად, შერეულში ეს ფალავნები გამოვლენ, თუმცა შეგახსენებთ, რომ გუნდურში ყველა წონა არ შედის - ქალებშიც და ვაჟებშიც 3-3 წონაა. ვაჟებიდან ესაა 73, 90 და +90, ხოლო ქალებიდან - 57, 70 და +70. დიდ ოლიმპაიდებთან შედარებით ერთადერთი განსხვავება ისაა, რომ პირად პირველობაში ორ წონაში გაორების საშუალებას გაძლევენ და თან ეს თამაშები ძიუდოში ევროპის ჩემპიონატთანაა გათანაბრებული.

რაც შეეხება ქალთა ნაკრებს, იქ ჩვენები პირდაპირ ვერ ხვდებიან სალიცენზიო ზონაში (საბოლოოდ განმსაზღვრელი რეიტინგში 8 აპრილს არსებული მდგომარეობა იყო), თუმცა რამდენიმე ახლოსაა ამ ზონასთან. დაველოდოთ, რომელ წონებს გააორებენ სხვები და იქნებ ამის შემდეგ მომხდარი ადგილების გადანაცვლებით რომელიმე ჩვენგანი მოხვდეს კიდეც თამაშებზე. არც ისაა გამორიცხული, 1 კვოტა გუნდურის გამო ეგრეთ წოდებული ველური ბარათითაც მოგვცენ.

ევროპული თამაშებისთვის მოსამზადებელ პერიოდში იქ წამსვლელი ჩვენი ვაჟთა ნაკრები შეჯიბრებებში აღარ გამოვა, მხოლოდ შეკრებებით მოემზადება თამაშებისთვის. გუნდი უკვე შეუდგა მზადებას - რამდენიმე ლიდერის გარდა, ნაკრები ჰოლანდიაშია, სადაც ფიზიკური მომზადებისთვის განკუთვნილ შეკრებას გადის. გამონაკლისი მხოლოდ სამი ლიდერია - ამირან პაპინაშვილი, ლუხუმ ჩხვიმიანი (ორივე - 60) და ვალერი ლიპარტელიანი, რომლებსაც მცირე ტრავმები აწუხებთ. ამიტომ ისინი თბილისში ემზადებიან.

ევროპული თამაშებისთვის მზადების ძირითად ეტაპს გუნდი იაპონია-კორეაში გაივლის - 29 აპრილს იაპონიაში მიფრინავენ, სადაც ორკვირიან ერთობლივ ვარჯიშს გაივლიან, იქიდან კორეაში გადაინაცვლებენ ასევე ორკვირიან შეკრებაზე, მზადების დასკვნით ეტაპს კი საქართველოში გაივლიან.

ყოველდღიური სპორტული გაზეთი "ლელო"
1317
მკითხველის კომენტარები / 0 /
მსგავსი ამბები
რუბრიკის სხვა სიახლეები
;