ძიუდო: ევროპის ჩემპიონატზე მხოლოდ ვაჟთა ნაკრებით

საქართველოს ვაჟ ძიუდოისტთა ნაკრები უკვე თელ ავივშია, სადაც ხვალ ევროპის პირადი ჩემპიონატი იწყება.

ნაკრების მთავარმა მწვრთნელმა ირაკლი ცირეკიძემ იქ ის შემადგენლობა წაიყვანა, რომელიც ადრევე დააანონსა:

ევროპის ჩემპიონი, მსოფლიოს პრიზიორი ამირან პაპინაშვილი, ლუხუმ ჩხვიმიანი (ორივე - 60), ევროპის ჩემპიონი, მსოფლიოს პრიზიორი ვაჟა მარგველაშვილი (66), ოლიმპიური და ევროპის ჩემპიონი ლაშა შავდათუაშვილი (73), ევროპის ორგზის ფინალისტი ნუგზარ ტატალაშვილი (81), მსოფლიოს პრიზიორი უშანგი მარგიანი, ევროპის ბრინჯაოს მედალოსანი ბექა ღვინიაშვილი (ორივე - 90), ევროპის სამგზის გამარჯვებული, მსოფლიოს ორგზის და ოლიმპიადის ფინალისტი ვალერი ლიპარტელიანი (100) და ევროპის ჩემპიონი გურამ თუშიშვილი (+100).

გუნდი გუშინ დილით გაფრინდა ისრაელში და, ჩვენი ინფორმაციით, მშვიდობიანად ჩავიდა "აღთქმულ მიწაზე".

ევროპის ჩემპიონატში ამჯერად ჩვენი ქალები არ გამოვლენ. თბილისის გრან პრის მედალოსან მარიამ ჭანტურიას (70) მხარი სტკივა, ბოლო დღეებში კი ფეხი იტკინა ახალგაზრდებში მსოფლიოს ფინალისტმა მარიამ ჯანაშვილმა (52). დარჩა ჭაბუკებში ევროპის ჩემპიონი მზია ბებოშვილი (63), თუმცა მწვრთნელებმა საბოლოოდ მაინც არჩიეს, ისიც არ გამოეყვანათ და დანარჩენებთან ერთად ეს სამეული ევროპის გუნდური პირველობისთვის მოამზადონ.

დასასრულს, შეგახსენებთ, რომ 26 აპრილს ვაჟებში 60-66 კილოგრამების ფალავნები იჭიდავებენ, 27-ში - 73-81, ჩემპიონატს კი 90, 100 და მძიმე წონების ფალავნები დახურავენ.

ყოველდღიური სპორტული გაზეთი "ლელო"
1249
მკითხველის კომენტარები / 0 /
მსგავსი ამბები
რუბრიკის სხვა სიახლეები