ძიუდო. ევროპის ჩემპიონატი 23-წლიანებში: ბოლო დღეს გადარჩენილნი

საქართველოს 23-წლამდელ ძიუდოისტთა ნაკრები არცთუ წარმატებით გამოვიდა პოდგორიცაში დასრულებულ თანატოლთა ევროპის ჩემპიონატში, სადაც მხოლოდ ერთი მედალი მოიპოვა - ბრინჯაოსი.

სრული კრახისგან ტურნირის ბოლო დღეს მძიმეწონოსანმა გელა ზაალიშვილმა გვიხსნა, რომელმაც მოიპოვა ეს ერთადერთი ჯილდო. ასევე ბოლო დღეს ბრინჯაოსთვის ნოდარ ბერიანმაც (90) იჭიდავა, მაგრამ წააგო და მეხუთეზე დარჩა. მეშვიდეზე გავიდა გოგონების ტურნირის ჩვენი ერთადერთი მონაწილე მარიამ ჯანაშვილი (52), ამ შედეგებით კი ჩვენი ნაკრები საერთო ჩათვლაში უჩვეულო - 22-ე ადგილზეა, ბიჭები კი მე-10-ზე გავიდნენ.

ჩვენ არაფერში გვერგება, მაგრამ მეორეზე გავიდა იაგო აბულაძე (60) რუსეთიდან.

თბილისელი ზაალიშვილისთვის ეს წლეულს მეორე ევროპული ბრინჯაოა - 21-წლამდელებშიც მესამე იყო თანაგუნდელ ამირან წიქორიძესთან ერთად. ჩერნოგორიაში მან ჯგუფური ეტაპი დამაჯერებლად გაიარა: უკრაინელი ფედირ პანკო ვაზარის შემდეგ დააგდო იპონზე, სერბი ზარკო კულუმი კი პირდაპირ ბეჭებზე დასცა. სხვათა შორის, ბოლოს ის და სერბი ერთად იდგნენ კვარცხლბეკის მესამე საფეხურზე, ჩვენებურს კი მედლისკენ მიმავალი გზა ნახევარფინალში რუსმა ტამერლან ბაშაევმა გადაუკეტა, ვინც ჩვენებისთვის საკმაოდ უხერხული მეტოქეა. ბრინჯაოსთვის შეხვედრაში ზაალიშვილმა აზერბაიჯანელ ჯალილ შუკუროვთან მოიგო მძიმე ბრძოლა: ორივეს თითო ვაზარი ჰქონდა, როცა ქართველმა მაინც მოინადავლა იპონი. თუმცა მეტოქის ის ვაზარიც ცოტა საეჭვო ჩანდა, რადგან იმ მომენტში ილეთს, თითქოს, ჩვენებური იწყებდა. მთლიანობაში, ზაალიშვილმა საკმაოდ ტექნიკური და გააზრებული ჭიდაობა აჩვენა.

ბერიანის წაგებაც ცოტა საჭოჭმანოა ბელარუსთა მომავალ ფინალისტ იაჰორ ვარაპაუსთან, მთლიანობაში კი ჩვენებურმა საკმაოდ დამაჯერებლად იჭიდავა: ჯგუფურ ეტაპზე მან ხორვატ ანტონიო ერნიეს გარასიჩთან მოიპოვა ორი ვაზარი, ფინელ აატუ ლაამანენთან კი ვაზარის იპონი მიაყოლა. დამამშვიდებელშიც ასეთივე ანგარიშებით აჯობა ესტონელ კლენ კრისტოფერ კალჯულაიდს და პოლონელ რაფალ კოზლოვსკის.

კარგად იჭიდავა ჯანაშვილმაც, ვინც ისევ თავის მშობლიურ წონას დაუბრუნდა და ორი შეხვედრაც მოიგო. რომ არა მეორე წრეში იტალიელ ჯულია პერუჩისთან მიღებული სახის იარა, ვინძლო, მედალზეც გაეწია. პერუჩის მან ორი გდება აუღო, რომელთაგანაც ერთი იპონი იყო, მანამდე კი უკრაინელი კატერინა ჩერტილიც დააიპონა. ჩვენებური აზერბაიჯანელთა მსოფლიოსა და ევროპის მესამე პრიზიორ ნაზაკატ აზიზოვასაც ბოლომდე ეომა, მაგრამ, ვფიქრობთ, მაინც დააკლდა სპარინგების თუ სატურნირო პრაქტიკის ნაკლებობა, რასაც წონიდან წონაში გადანაცვლებაც ემატება და საბოლოოდ ვაზარით წააგო. თუმცა შეხვედრა რამდენჯერმე ხანგრძლივადაც შეჩერდა მისი ჭრილობის გადასახვევად და შეხვედრა ერთიანად დაბინტულმა ჩაამთავრა. ალბათ, ეს ტრავმა იყო დამამშვიდებელში ესპანელთა მომავალ ბრინჯაოს პრიზიორ ანა ბოქს პერესთან მისი წაგების მიზეზიც.

თუმცა ჩვენი გუნდიდან ყველაზ მოულოდნელი მაინც ახალგაზრდებში ევროპისა და მსოფლიოს ბრინჯაოს მედალოსან ტატო გრიგალაშვილის (73) და, განსაკუთრებით, უფროსებში ევროპის მედალოსან ბექა ღვინიაშვილის მარცხია. თან ორივემ პირველივე შეხვედრა დათმო.

ღვინიაშვილმა რუს მიხაილ იგოლნიკოვთან წააგო: თავიდანვე მისთვის ჩვეულად მიეძალა რუსს და ილეთზე მოჰყვა. ვფიქრობთ, გრიგალაშვილი გადაიღალა 20-წლამდელთა შეჯიბრებებით და ამჯერად სრულფასოვნად აღდგენა ვერ მოასწრო. მოლდოველ კორნელ ანდრიესთან იქნებ, მსაჯიც სცოდავდა, მაგრამ ჩვენებურიც არ ჰგავდა თავის თავს, მისგან ბევრად უკეთესი შემართებაც გვახსოვს. ასევე ძალიან დასანანი იყო ონისე სანებლიძის (100) წაგებაც ბელარუს დანიელ მუკეტესთან, რაც ასევე პირველ წრეში მოხდა. მართალია, ბელარუსი ბოლოს ჩემპიონი გახდა, მაგრამ დასანანია, რომ ტალანტად მიჩნეული სანებლიძე "გაჩერდა".

ჩერნოგორიაში ჩვენგან ირაკლი კუპატაძე (60), ზვიად ხუბულური (66), ბექა შავდათუაშვილი (73) და ბექა დონღვანიც (81) გამოდიოდნენ, მაგრამ ისინი პირველ-მეორე წრეში დამარცხდნენ და სანუგეშოში ვერც ერთი ვერ გადავიდა.

ყოველდღიური სპორტული გაზეთი "ლელო"
671
მკითხველის კომენტარები / 0 /
მსგავსი ამბები
რუბრიკის სხვა სიახლეები