ძიუდო. ევროპის ჩემპიონატი: 9 მედალი და ბევრი სიხარული სოფიიდან

9 მედალი. მათ შორის: 3 ოქრო, 2 ვერცხლი და 4 ბრინჯაო - ასეთი ბრწყინვალე შედეგით დაასრულა გამოსვლა საქართველოს ახალგაზრდა ძიუდოისტთა ნაკრებმა სოფიაში ჩატარებულ თანატოლთა ევროპის ჩემპიონატში.

თუმცა ამის გარდა თავმოსაწონებელი სხვაც მოხდა სოფიაში: ქართული ფინალი 81 კილოგრამში, გოგონების კარგი გამოსვლა, გუნდური პირველი ადგილი...

ჩვენი გუნდისთვის განსაკუთრებით წარმატებული ინდივიდუალურის ბოლო ორი დღე გამოდგა, როცა ჯერ ოთხი, მერე კი სამი მედალი მოვიპოვეთ. სწორედ ამ პერიოდზე მოდის ქართული ფინალიც და ოქროების ცვენაც.

ქართულ ფინალში ლუკა მაისურაძემ ტატო გრიგალაშვილი დამატებით დროში დაამარცხა და ჩემპიონი გახდა. მეორე დღეს მას კარგად აუბეს მხარი ონისე სანებლიძემ (100) და გელა ზაალიშვილმა (+100), რომლებმაც თავიანთ წონებში ასევე არავის დაუთმეს პირველობა. გოგონებიც კარგად გაისარჯნენ.

განსაკუთრებით - ეთერ ლიპარტელიანი (57), ვინც მხოლოდ ფინალში დამარცხდა, ხოლო მარიამ ჭანტურია (70) და სოფიო სომხიშვილი (+78) მესამეზე გავიდნენ. თუმცა ჭანტურიას წაგებაში მსაჯის გადაწყვეტილებებზეც შეიძლება კამათი.

აქვე შეგახსენებთ, რომ პირველ დღეს ბრინჯაოს მედალოსნები გახდნენ ჯაბა პაპინაშვილი (60) და ბაგრატ ნინიაშვილი (66).

მწვრთნელთა არჩევანი
ეს მიღწევები გუნდური ტურნირის ჩაგდებამ და უმედლოდ დარჩენამაც ვერ გადაწონა, რადგან გამოჩნდა, რომ ორივე გუნდი - ბიჭებიც და გოგონებიც - სწორი გზით მიდის. გოგონებში მთავარ მწვრთნელ გია თენაძეს, კახა მოცრაძეს და სამწვრთნელო შტაბის სხვა წევრებს არ ჰქონიათ დიდი არჩევანი.

ამიტომ მწირი რესურსიდან ხუთი ყველაზე პერსპექტიული შეგირდი ამოარჩიეს; ცხადია, გაითვალისწინეს შერეული გუნდის საჭიროებაც და არჩევანი ამის მიხედვითაც გააკეთეს.

ისინი ამ ხუთეულს ამზადებდნენ კონტინენტის პირველობისთვის. რამდენად სწორი არჩევანი გააკეთეს ან რამდენად კარგად ამზადებდნენ, ეს იქიდანაც ჩანს, რომ ხუთიდან სამმა მედალი მოიპოვა...

გოგონების სასახელოდ გუნდურში მათი კარგი ჭიდაობის შესახებ აუცილებლად უნდა ითქვას, სადაც რამდენიმე ხმაურიანი გამარჯვება მიითვალეს. აქამდე შერეულ გუნდში ქალების წონები თუ ჩვენი "აქილევსის ქუსლი" იყო, ახლა გოგონებმა ძალიან ძლიერად იჭიდავეს და ვერც ერთ წაგებას მათ ვერ დავაბრალებთ. აი, ბიჭებმა კი რამდენიმე გადამწყვეტი და საწყენი პაექრობა დათმეს.

თავის მხრივ, ლაშა გუჯეჯიანმაც მოახერხა გუნდის შეკვრა-კონსოლიდირება და მობილიზება. დასამალი არაა, რომ მის მიერ დასახელებულ შემადგენლობაში რამდენიმე გადაწყვეტილება კითხვის ნიშნებს აჩენდა, მაგრამ დღეს შედეგი არის, ანუ მწვრთნელის არჩევანმა გაამართლა.

სხვათა შორის, ეს გუნდურშიც დამტკიცდა, როცა სათადარიგოებმა ზოგჯერ მთლად ვერ ივარგეს. გუჯეჯიანი ხშირად იმეორებს, რომ შეგირდებისგან ყოველთვის ბრძოლას მოითხოვს - წაგებულ შეხვედრაშიც კი და მათ ყოველთვის ბრძოლისკენ მოუწოდებს. მისმა გუნდმა სწორედ ეს ბრძოლისუნარიანობა გამოავლინა.

ცხადია, ყველა შემთხვევაში ერთნაირად არა, მაგრამ გუნდს მსგავსი ხელწერა ნამდვილად ეტყობოდა. ნიშანდობლივი ვიდეო გავრცელდა სოფიიდან, თუ როგორ ამხნევებს, როგორ განაწყობს გუჯეჯიანი ფინალის წინ საბრძოლველად ზაალიშვილს. თუმცა ახლა ამ მიღწევას განმტკიცება მსოფლიოს ჩემპიონატზეც სჭირდება და, იმედია, ჩვენები არც იქ შეირცხვენენ თავს - არც მწვრთნელები და არც - სპორტსმენები.

ევროპის ქართული ფინალი
ქართული ძიუდოსთვის ქართული ფინალი აღარაა უპრეცედენტო შემთხვევა, თუმცა მსგავსი პრეცედენტი ნებისმიერი რანგის ტურნირზე სასიამოვნოა. მით უფრო, ისეთი დონის შეჯიბრებაზე, როგორიც კონტინენტის პირველობაა.

81 კილოგრამში ჩვენგან ახალი თაობის ორი უნიჭიერესი ფალავანი გამოდიოდა. აღსანიშნავია, რომ ორივე ჩვენებური ფინალამდე იპონებით მივიდა და ორივემ ოთხ-ოთხი შეხვედრა მოიგო. მაისურაძემ - გაფრთხილებებით დამატებით დროში ბოსნიელ ვუკ ელეზთან, ესტონელ ასლანბეგ მაგომედკერიმოვთან, პორტუგალიელ მიგელ ალვეშთან და ნახევარფინალში იტალიელ კრისტიან პარლატისთან.

ამის პარალელურად, ბადის მეორე მხარეს მეტოქეებს ასეთივე დღეში აგდებდა გრიგალაშვილიც. მის შეტევებს გერმანელი ემილ ჰენებახი, ჰოლანდიელი იან რაინტიენსი, უნგრელი რობერტ რაიკაი და აზერბაიჯანელი მურად ფატიევი ემსხვერპლნენ.

მათ სოფიაში გვასახელეს
სანებლიძემ სოფიაში ერთი ამოსუნთქვით გაიმარჯვა და კიდევ ერთხელ დაამტკიცა, ქართული ძიუდოს მომავალი და წონის ფავორიტი რომაა. აქა-იქ შეიძლება, კიდეც ჩააგდოს ტურნირები, თუმცა ფაქტია - გამორჩეული ტალანტია. ევროპირველობაზე მან ხუთი პაექრობა გამართა და ყველა წმინდად მოიგო.

აქედან ორი მეტოქე - არცთუ ხელწამოსაკრავი ჰოლანდიელი სიმეონ კატარინა და ნახევარფინალში გერმანელი დანიელ ზორნი გაფრთხილებებით მოახსნევინა, რაც მის კოლოსალურ უპირატესობაზე მიუთითებს, ხოლო ფრანგი პოლ დევო, აზერბაიჯანელი ადილ კარიმლი და ფინალში კოსოვოელი შპატ ზეკა გდებებით დაამარცხა. თან, კარიმლის იპონამდე ვაზარიც აართვა.

ზაალიშვილიც მთელი თავით აღმატებული აღმოჩნდა მეტოქეებზე და ოთხიდან სამს წმინდად აჯობა. ქულებით მხოლოდ რუსი დავიდ ბაბაიანი დაამარცხა ნახევარფინალში, უკრაინელი ვლადისლავ ბერეჟკა, უნგრელი რიხარდ ვაჟულიკი და ფინალში გერმანელი ერიკ აბრამოვი კი სუფთად დააგდო.

ფინალში იყო ერთი საკამათო ეპიზოდი, როცა ორივე მეტოქე ერთდროულად დაეცა ტატამზე და ბოლოს გდებას თითქოს გერმანელი აკონტროლებდა, მაგრამ, ვგონებთ, იქ არც იყო მისთვის ქულა მისაცემი და ეგეც რომ არა, ჩვენებურმა საბოლოოდ მაინც სუფთად დააგდო.

გოგონებში ჩინებულად გამოვიდა ლიპარტელიანი, ვინც ფინალამდე ასევე იპონებით გაიკვალა გზა და მანაც ოთხი კონკურენტი დაჯაბნა: მაკედონიელი ბერნა შერიფოვსკა, ბრიტანელი აცელია ტოპრაკი, გერმანელი კაროლინ ფრიტცე და ფრანგი მერილინ ლუის სიდნი. ფინალში ჩვენებური მეორე ფრანგთან - ლეონიე კისიკ სარასთან დამარცხდა.

ჭანტურია მეოთხედფინალში დამარცხდა ჰოლანდიელ მარგიტ დე ვოოგდთან, მანამდე კი ბერძენ არისტეა-იოანა დიმოუს ილეთით მოუგო წმინდად, ხოლო ჩერნოგორიელი ჯოვანა პეკოვიჩი გაფრთხილებებით მოახსნევინა. დამამშვიდებელში შვედი იდა ერიქსონი ვაზარით დაამარცხა, ბრინჯაოსთვის პაექრობაში კი ჰოლანდიელ ჯესიკს გორისენსაც ვაზარით უგებდა, როცა მესამე გაფრთხილება მიაღებინა.

სომხიშვილმა დამაჯერებლად მოიგო ჯგუფური ეტაპი, სადაც ბულგარელ დარინა სტოიჩევას და პოლონელ იულია სვიატკევიჩს სუფთად მოუგო. ის ნახევარფინალშიც დომინირებდა გერმანელ რენე ლუჩთან და ვაზარისაც უგებდა, მაგრამ მაინც დამარცხდა. სამაგიეროდ, მისი ჯავრი ფრანგ ლაურა ფუსეზე იყარა დამამშვიდებლის ფინალში.

გოგონებიდან უმედლოდ მხოლოდ მზია ბებოშვილი დარჩა 57 კილოგრამში, ბიჭებიდან კი - ლაშა ბექაური (90) და ზაურ კენჭაძე (100).

გუნდური უმედლობა
გუნდურში ჩვენებმა პოლონეთს და სერბეთს მოუგეს, მერე დამარცხდნენ გერმანიასთან და სანუგეშოში გადავიდნენ. იქ რუმინეთსა და იტალიას კი აჯობეს, რითაც ბრინჯაოსთვის ბრძოლის უფლება მოიპოვეს, მაგრამ სწორედ ეს გადაწყვეტი პაექრობა დათმეს ჰოლანდიასთან და მეხუთეზე დარჩნენ.

ყოველდღიური სპორტული გაზეთი "ლელო"
1582
მკითხველის კომენტარები / 0 /
მსგავსი ამბები
რუბრიკის სხვა სიახლეები
;