ძიუდო. ვალერი ლიპარტელიანი პირველია - 5800!

ბუნებრივია, დიუსელდორფში ბოლო უქმეებზე გამართულმა "დიდი მუზარადის" ტურნირმა ცვლილებები შეიტანა ძიუდოისტთა მსოფლიოს რეიტინგში. ზოგ შემთხვევაში ამან ცოტათი გვახეირა კიდეც, მაგრამ უმეტეს წონებში თითო-ოროლა საფეხურით უკან დავიხიეთ. თუმცა ამაში საგანგაშო არაფერია - წონათა უმეტესობაში კვლავაც მოწინავე ხუთეულში შევდივართ. თუმცა მთავარი - რეიტინგის ლიდერობა უცვლელია: კვლავაც ერთ წონაში ვართ პირველ ადგილზე.

ახალ რეიტინგში არსებითი ცვლილება სწორედ ამას უკავშირდება: 90 კილოგრამში ლიდერობა დაკარგა ბექა ღვინიაშვილმა, მაგრამ, სამაგიეროდ, გერმანიაში გამარჯვებამ და ამისთვის მიღებულმა 1000-მა ქულამ გაალიდერა ვალერი ლიპარტელიანი (100). ახლა მის ანგარიშზე 5800 ქულაა, ცხრილში კი ადგილი გაუცვალა ჰოლანდიელ მიხაელ კორელს (5761).

უახლოეს მომავალში ეს სხვაობა კიდევ უფრო გაიზრდება ქართველის სასარგებლოდ, რადგან მალე კორელი ქულებს დაკარგავს: მას გაუნულდება ორი წლის წინ თბილისში მოპოვებული 36 ქულა, მოგვიანებით კი იგივე ბედი ეწევა ბუდაპეშტის "დიდ პრიზზე" მოპოვებულ გაცილებით მსუყე ქულებსაც, თუმცა ჰოლანდიელი კიდევ უფრო ბევრს დაკარგავს შარშანდელი ქულების განახევრებით (შეგახსენებთ, რომ რეიტინგში ერთი წლის თავზე მოპოვებული ქულები ნახევრდება, ხოლო ორი წლის შემდეგ ეს განახევრებულიც საერთოდ უქმდება), სადაც კიდევ უფრო მეტი აქვს ნაჭიდავები.

აი, ლიპარტელიანი ამ პერიოდში არაფერს არ დაკარგავს, რადგან არც გამოსულა ტურნირებზე, ხოლო სადაც იჭიდავა - ორი წლის წინ პარიზში, იმისი ქულები უკვე დაკლებული აქვს. ამიტომ მალე კიდევ უფრო გაუსწრებს მდევარს. შესაბამისად, მისი გადასწრების შანსი ჯერ არც სხვებს არა აქვთ, რადგან ისინი ისედაც ბევრად ჩამორჩებიან.

რეიტინგში ღვინიაშვილის დაქვეითება (თუ შეიძლება ასე ეწოდოს მეორე ადგილზე ჩამოსვლას) მოსალოდნელიც იყო, რადგან მას აკლდებოდა წინა წლების ანალოგიურ პერიოდში მოპოვებული ქულები, თვითონ კი გერმანიაში არ ჭიდაობდა. მას ლიდერობას გამოსვლა და მორიგი წარმატება შეუნარჩუნებდა, მაგრამ ერთი, რომ ის ტრავმას იშუშებს და გამოჯანმრთელებას ვერანაირად ვერ ასწრებდა და მეორეც: სამწვრთნელო შტაბმა არც დაუგეგმა იქ ჭიდაობა და ვფიქრობთ, სამართლიანადაც, რადგან ევროპის ჩემპიონატისთვის ინდივიდუალურად ამზადებენ.

ახლა მთავარი სწორედ ეს შეჯიბრებაა, ლიდერობას კი სხვა ტურნირებზე წარმატებით დაიბრუნებს. თუნდაც იმავე ევროპის პირველობაზე კარგი გამოსვლით. რეიტინგი კარგია და მას აქვს გარკვეული უპირატესობები: შეჯიბრებებზე ხვდები განთესილებში; უმეტესად ისვენებ პირველ წრეში და სხვებთან შედარებით ერთი შეხვედრით ნაკლებს ატარებ; მთავარ კონკურენტებს, მინიმუმ, მეოთხედფინალამდე არ გადაეყრები; ფინანსურადაც მიმზიდველი რეალობაა, მაგრამ მთავარი მაინც ოფიციალური შეჯიბრებებისთვის (ევროპისა და მსოფლიოს ჩემპიონატები, ოლიმპიადა) კარგად მომზადებაა. ამიტომ რეიტინგს ყურადღება უნდა მივაქციოთ - სხვა თუ არაფერი, თავის დროზე ამაზეა დამოკიდებული ლიცენზიების მოპოვებაც, მაგრამ არც ზედმეტი გამოკიდება და უფრო დიდი მიზნების გაწირვა არ ღირს.

როგორც გითხარით, ახალ რეიტინგში უმეტეს წონებში ისევ მოწინავეთა შორის ვართ. ამასთან, ზოგან ერთი საფეხურითაც წავიწიეთ წინ. ასეთი წონა სულ ორია: 60 და 90. პირველში ევროპის ჩემპიონი, მსოფლიოს ბრინჯაოს მედალოსანი ამირან პაპინაშვილი დაწინაურდა, მეორეში - მსოფლიოს ბრინჯაოს პრიზიორი უშანგი მარგიანი იმის მიუხედავად, რომ არ უჭიდავიათ გერმანიაში - ეს იმიტომ, რომ ზემოაღწერილი წესის შესაბამისად, მათ წინ მდგომებს დააკლდათ წინა წლების ქულები.

60-ში გერმანულმა ბრინჯაომ 5 ადგილით დააწინაურა ლუხუმ ჩხვიმიანი, ვინც მე-17 პოზიციამდე აღზევდა.

66-ში ევროპის ჩემპიონი და მსოფლიოს მესამე პრიზიორი ვაჟა მარგველაშვილი, ხოლო 73-ში ოლიმპიური და ევროპის ჩემპიონი ლაშა შავდათუაშვილი თითო საფეხურით დაქვეითდნენ. ამათგან ახლო მომავალში მარგველაშვილს ქულების დაკლება არ ემუქრება, შავდათუაშვილს კი ისევ შეუმცირდება, მაგრამ სერიოზული "ვარდნა" არ ექნება. თანაც, ამასობაში ახალი ტურნირიც მოუსწრებს...

მძიმე წონაში სტატუს-ქვო უცვლელია: ევროპის ჩემპიონი გურამ თუშიშვილი ისევ ინარჩუნებს მეორე ადგილს, პირველი კი კვლავაც ბრაზილიელი დავიდ მოურაა, მესამეზე - ლეგენდარული და დაუმარცხებელი ფრანგი, ორგზის ოლიმპიური, მსოფლიოს 10 და ევროპის 5-გზის ჩემპიონი ტედი რინერი, ვინც იშვიათად ჭიდაობს და ამიტომ დათმო ლიდერობა. ამ წონაში ორი ადგილით დაწინაურდა ევროპის პრიზიორი ლევან მატიაშვილი - 22-ზე გადმოვიდა, სამაგიეროდ, ამდენივე დაქვეითდა ევროპის ჩემპიონი და მსოფლიოს პრიზიორი ადამ ოქრუაშვილი - მე-18 პოზიცია.

ერთ დროს ჩვენთვის საუკეთესო წონად მიჩნეული 81 კილოგრამი ახლა ერთადერთია, სადაც 8 განთესილში არავინ გვყავს. ჩვენგან საუკეთესო კვლავაც ევროპის მედალოსანი ზებედა რეხვიაშვილია, თუმცა ამჯერად ორი ადგილით უკანაა - მე-14 საფეხურზე. 6 პოზიციით დაქვეითდა ევროპის ორგზის ფინალისტი ნუგზარ ტატალაშვილი - 59-ე, ამასობაში კი მას თამაზ კირაკოზაშვილმაც გადაუსწრო დიუსელდორფში მარცხის მიუხედავად.

სამწუხაროდ, ქალებში რეიტინგში ჯერ ისევ არაფერი გვაქვს საძიებელი. ისინი დიდ შეჯიბრებებში თბილისის ტურნირიდან ჩაებმებიან და ვნახოთ, ამ მხრივ მომავალი თუ შეიცვლება რამე.

60 კგ.
1. რიუჯუ ნაგაიამა (იაპონია) - 5080
2. ნაოჰისა ტაკატო (იაპონია) - 4550
3. რობერტ მშვიდობაძე (რუსეთი) - 4238
4. ფრანსისკო გარიგოსი (ესპანეთი) - 3899
5. ამირან პაპინაშვილი (საქართველო) - 3557
17. ლუხუმ ჩხვიმიანი (საქართველო) - 2075

66 კგ.
1. ტალ ფლიკერი (ისრაელი) - 4616
2. ჰიფუმი აბე (იაპონია) - 4000
3. ვაჟა მარგველაშვილი (საქართველო) - 3633
4. ბაულ ანი (კორეა) - 3460
5. კერლენ განბოლდი (მონღოლეთი) - 3290
26. ლაშა გიუნაშვილი (საქართველო) - 1236

73 კგ.
1. სოიჩი ჰაშიმოტო (იაპონია) - 6650
2. რუსტამ ორუჯოვი (აზერბაიჯანი) - 5338
3. ოდბაიარ განბაატარი (მონღოლეთი) - 4898
4. ჰიდაიეტ ჰეიდაროვი (აზერბაიჯანი) - 4021
5. ლაშა შავდათუაშვილი (საქართველო) - 4007

81 კგ.
1. ფრანკ დე ვიტი (ჰოლანდია) - 4530
2. ხასან ხალმურზაევი (რუსეთი) - 4500
3. საეიდ მოლაე (ირანი) - 4443
4. ალან ხუბეცოვი (რუსეთი) - 3870
5. ასლან ლაპინაგოვი (რუსეთი) - 3410
14. ზებედა რეხვიაშვილი (საქართველო) - 2194
55. თამაზ კირაკოზაშვილი (საქართველო) - 576
59. ნუგზარ ტატალაშვილი (საქართველო) - 612

90 კგ.
1. ალექსანდარ კუკოლი (სერბეთი) - 4361
2. ბექა ღვინიაშვილი (საქართველო) - 4320
3. ნიკოლოზ შერაზადიშვილი (ესპანეთი) - 4087
4. კრისტიან ტოტი (უნგრეთი) - 3598
5. კენტა ნაგასავა (იაპონია) - 3540
11. უშანგი მარგიანი (საქართველო) - 2741

100 კგ.
1. ვალერი ლიპარტელიანი (საქართველო) - 5800
2. მიხაილ კორელი (ჰოლანდია) - 5761
3. მიკლოშ ცირიენიჩი (უნგრეთი) - 4209
4. ელხან მამადოვი (აზერბაიჯანი) - 3882
5. კირილ დენისოვი (რუსეთი) - 3468

+ 100 კგ.
1. დავიდ მოურა (ბრაზილია) - 5565
2 გურამ თუშიშვილი (საქართველო) - 4760
3. ტედი რინერი (საფრანგეთი) - 3550
4. ლუკაშ კრპალეკი (ჩეხეთი) - 3076
5. რაფაელ სილვა (ბრაზილია) - 3000
18. ადამ ოქრუაშვილი (საქართველო) - 1936
22. ლევან მატიაშვილი (საქართველო) - 1488

1055
მკითხველის კომენტარები / 0 /
მსგავსი ამბები
რუბრიკის სხვა სიახლეები