ძიუდო. ვინ ვის შეხვდება იაპონიაში? თუშიშვილის შანსი, შავდათუაშვილის უიღბლობა

ტოკიოში გაიმართა ძიუდოისტთა მსოფლიოს ჩემპიონატის წილისყრა, რომლის საპრიზო ფონდიც 1 მილიონი დოლარია. უკვე დაზუსტებულია, რომ ჩემპიონატში მონაწილეობას მსოფლიოს 147 ქვეყნის 841 ძიუდოისტი მიიღებს: 510 ვაჟი და 331 ქალი.

წილისყრამ ჩვენთვის საინტერესო რამდენიმე მომენტიც მოგვცა: ლუხუმ ჩხვიმიანი (60) მალევე ხვდება ისევ ესპანელ ფრანსისკო გარიგოსს, ვისაც მეორე ევროპული თამაშების ფინალში მოუგო, თანაც ჯგუფში ქართველებთან მოხვდა; ოლიმპიური ჩემპიონი ლაშა შავდათუაშვილი (73) ბადეში იაპონელ მსოფლიოს ჩემპიონ შონეი ონოსთანაა; ევროპული თამაშების მესამე პრიზიორი ლუკა მაისურაძე (81) ახლოსაა თურქთა ქართველყოფილ მსოფლიოს ბრინჯაოს მედალოსან ვედატ ალბაირაქთან; ევროპის მედალოსანი ბექა ღვინიაშვილთან ბადეში იაპონელი სოიჩირო მუკაი მოხვდა...

ძლიერი განუთესავი ერგო მსოფლიოსა და ევროპის ჩემპიონ გურამ თუშიშვილსაც (+100) - ჰოლანდიელი ევროპის სამგზის ჩემპიონი, მსოფლიოს სამგზის ფინალისტი და ორგზის ოლიმპიური ბრინჯაოს მფლობელი ჰენკ ხროლი. არასასიამოვნოა ისიც, რომ იაპონელებს ორი განუთესავი ჰყავდათ და ორივე ჩვენებთან მოხვდა...

60 კგ. 74 მონაწილე

ევროპული თამაშების ჩემპიონი ჩხვიმიანი განუთესავია და პირველ წრეში იჭიდავებს, სადაც ჰონგ კონგელ იუ ლინ ლაის ხვდება, ხოლო მასთან მოგების შემთხვევაში ელოდება გარიგოსთან ჭიდაობა, ვისთანაც უარყოფითი ბალანსი აქვს - ექვსი შეხვედრიდან მხოლოდ ბოლო მოუგო, მინსკში. ჩხვიმიანს გარიგოსთან მოგების შემთხვევაშიც ძლიერი კონკურენტი ელოდება - ბრაზილიელი ერიკ ტაკაბატაკე, ვისაც მანამდე არ უნდა გაუჭირდეს ტუნისელი ფრაი დოუბის დამარცხება.

ამავე ჯგუფში არიან რუსთა სახელით მოჭიდავე ევროპის ჩემპიონი და მსოფლიოს შარშანდელი ფინალისტი რობერტ მშვიდობაძე და ლუკა მხეიძე საფრანგეთიდან, თუმცა ჩხვიმიანი მათ მეოთხედფინალამდე არ ხვდება. ისე კი იქამდე არც იმათ ელოდებათ იოლი გზა, რადგან ბრიტანელი ევროპის მედალოსანი ეშლი კოული და უზბეკი დიორბეკ უროზბოევიც მათ მხარეს არიან.

ევროპის ჩემპიონი, მსოფლიოს ორგზის ბრინჯაოს მედალოსანი ამირან პაპინაშვილი პირველ წრეში ისვენებს, როგორც განთესილი, მისი პირველი მეტოქე კი ურუგვაელი ლენინ პრიციადო იქნება. ჩვენებურს არ უნდა გაუჭირდეს ამ ბარიერის გავლა, მერე კი მალაველ მარტინ კუპირისა და ბელგიელ ჟორე ვერსტრაეტენს შორის მოგებულს დაეჭიდება.

პაპინაშვილისთვის დაუძლეველი არც ეს ბარიერი გვგონია, რითაც მერვედფინალში გავა, იქ კი სავარაუდო მეტოქეთა შორის ყველაზე ძლიერები ბრაზილიელი ოლიმპიური პრიზიორი ფელიპე კიტადაი და ყაზახი გუსმან ყირგიზბაევი გვგონია. ამავე ჯგუფში არიან მონღოლთა მსოფლიოს ვიცე-ჩემპიონი ამარტუვშინ დაშდავაა და კორეელი ინ ჰუკ ჩოიც, თუმცა ისინი ქართველს მეოთხედფინალამდე ვერ შეხვდებიან. რეიტინგიდან გამომდინარე, ნახევარფინალში ამ ჯგუფის გამარჯვებულის სავარაუდო მეტოქეთა შორის იაპონელთა სამგზის მსოფლიოს ჩემპიონი და ოლიმპიური მედალოსანი ნაოჰისა ტაკატოცაა. ფინალის საგზურისთვის ბრძოლაში პაპინაშვილის მთავარ კონკურენტადაც ის მიგვაჩნია, თუმცა იქამდე მისასვლელადაც დიდი ბრძოლაა საჭირო.

66 კილოგრამი. 92 მონაწილე

ყველაზე მეტი მონაწილე ამ წონაშია - 92 კაცი.

ევროპის ჩემპიონი და მსოფლიოს მედალოსანი ვაჟა მარგველაშვილი რეიტინგის ლიდერია და პირველ წრეში ისვენებს, მისი მეტოქე კი არგენტინელი ტალ ალმოგისა და ეგვიპტელი აჰმედ აბელრაჰმანის პაექრობაში გაირკვევა. მესამე წრის სავარაუდო მეტოქეთა შორის კორეელ ლიმვან კიმს და გერმანელ სებასტიან საიდლს გამოვარჩევთ, რომლებიც სწყის ეტაპზევე ერთმანეთს ხვდებიან, ამათში მოგებული კი თურქმენ მუჰამეტ კოსეკოვს ხვდება. თუმცა ვინც უნდა შეხვდეს, მასთან თურქმენი განწირული გვგონია, აი, თურქმენთან მოგებული კი უკვე მარგველაშვილს ხვდება.

გერმანელი ძველი და სერიოზული მეტოქეა ქართველისთვის - სწორედ მასთან დამარცხდა მსოფლიოს შარშანდელ პირველობაზე, ისე კი ერთმანეთს ხუთჯერ შეხვდნენ და მარგველაშვილმა სამჯერ მოიგო, ორჯერ დამარცხდა. ჩვენებური ამ ეტაპსაც თუ გაივლის, მერვედფინალში გავა, იქაურ სავარაუდო მეტოქეთა შორის კი ძლიერი არავინაა. ამავე ჯგუფში არიან თურქი სინან სანდალი, ყაზახი იელდოშ ჟუმაკანოვი და ბრაზილიელი დანიელ კარგნინი, თუმცა მარგველაშვილი მათ მეოთხედფინალამდე არ ხვდება. ზოგადადაც, ზემოხსენებულ კორეულ-გერმანულ წყვილს თუ არ ჩავთვლით, ჩვენებურს ცუდი ბადე არა აქვს.

სასტიკად არ გაუმართლა ევროპული თამაშების მესამე პრიზიორ ნინიაშვილს - პირველივე წრეში იჭიდავებს კორეელთა მსოფლიოს ჩემპიონ ბაულ ანთან, ჯგუფში კი იაპონელთა მიჯრით ორგზის მსოფლიოს ჩემპიონ ჰიფუმი აბესთან მოხვდა.

73 კგ. 90 მონაწილე

შავდათუაშვილის უიღბლობა ისევ გრძელდება - ჯგუფში იაპონელთა მსოფლიოსა ორგზის და ოლიმპიური ჩემპიონი შოჰეი ონო ჩაუჯდა, ვინც განუთესავი იყო... თანაც, მათი გზები მერვედფინალში იკვეთება ანუ მათ შორის წაგებული საერთოდ ეთიშება შეჯიბრებას, მედლისთვის ბრძოლის ყოველგვარ შანსს ჰკარგავს...

პირველ წრეში შავდათუაშვილიც ისვენებს, მისი მეტოქე კი ავსტრალიელი კელვინ კნოსტერი ან სენეგალელი ტიდიანე დიოპი იქნება. ლაშას იოლი მეტოქე არც მოგების შემთხვევაში ეყოლება - არაბთა გაერთიანებული საემიროების ნატურალიზებულ მოლდოველ მსოფლიოს პრიზიორ ვიქტორ სკვორტოვსა და ამერიკელ ნიკოლას დელპოპოლოს შორის უძლიერესი. აქაც შეიძლებოდა, სკვორტოვზე უფრო სუსტი შეხვედროდა, მაგრამ...

81 კგ. 82 მონაწილე

ამ წონის ციფრობრივი ოდენობა ზუსტად შეესაბამება მონაწილეებისას - ირანელი მსოფლიოს ჩემპიონი საიდ მოლაი წილისყრაში კია შეტანილი, მაგრამ არ ჭიდაობს. აქვე გეტყვით, რომ გათესილებში მხოლოდ ამ წონაში არა ვართ.

როგორც თავშივე გითხარით, ლუკა მაისურაძეს ბადეში ახლოს ჰყავს სამპასპორტა (ადრე საბერძნეთის და საქართველოს სახელითაც ჭიდაობდა) ალბაირაქი, მაგრამ მთვარია, რომ ასცდა მისთვის უხერხულ ბელგიელს, ევროპული თამაშების ჩემპიონ მატიას კასეს, იაპონელ მსოფლიოს ფინალისტ სოტარო ჰუჯივარას და ებრაელ ევროპის ორგზის ჩემპიონ საგი მუკის. თუმცა ფუჯივარას და მუგის ნახევარფინალაში გასვლის შემთხვევაში შეიძლება შეხვდეს, ოღონდ იმათგან - ერთ-ერთს, რადგან მათი გზები მეოთხედფინალში იკვეთება (ფუჯივარა იქამდე გერმანელთა მსოფლიოს ჩემპიონ ალექსანდრ ვიჩზერზაკსაც ხვდება), კასეს კი ფინალამდე ვერ დაეჭიდება. განუთესავის კვალობაზე, მაისურაძეს მაინც ხელსაყრელი ბადე შეხვდა.

ის პირველ პაექრობას სამოელ პენიამინა პერცივალთან ჩაატარებს, ამათში მოგებულს კი ალბაირაქი ელოდება. ამ წყვილიდან გასულს მესამე წრეში ანგარიშგასაწევი სავარაუდო მეტოქე ჰყავს - მონღოლი უუგანბაატარ ოდგონბაატარი, ჯგუფის ამავე მხარეს კი იტალიელი ენრიკო პარლატი და ბელგიელთა ევროპის შარშანდელი ფინალისტი სამი ჩოუჩიც არიან.

ჯგუფის ზედა მხარესაა ჰოლანდიელი რეიტინგფავორიტი ფრენკ დე ვიტი და პორტუგალიელთა ქართველი ენრი ეგუტიძე, რომლებსაც მაისურაძე მეოთხედფინალში თუ შეხვდება...

90 კგ. 69 მონაწილე

მორიგი განუთესავი იაპონელი - სოიჩირო მუკაი ღვინიაშვილს ერგო ჯგუფში! თუმცა ღვინიაშვილს ნამდვილად არ უჭირს იაპონეებთან ჭიდაობა და მუკაისაც სამიდან ორი შეხვედრა მოუგო.

ის ერთი ავბედითი პაექრობაც შარშან წააგო პარიზის ტურნირის ფინალში, როცა გდებისას მძიმე ტრავმაც მიიღო, რამაც მერე ლამის მთელი სეზონი გააცდენინა.
ღვინიაშვილი მეორე წრიდან ჩაებმება შეჯიბრებაში, სადაც ინდოელ აიაი დევილალ მისტრის ხვდება, მოგების შემთხვევში კი ჰოლანდიელ იესპერ სმინკსა და უკრაინელ ქუნჯაუ ნჰაბალის წყვილიდან გასულს დაეჭიდება. მერვედფინალის სავარაუდო მეტოქეებში მუკაი ჰყავს, მთავარი ბრძოლა კი მეოთხედფინალში ელოდება კუბელთა მსოფლიოს შარშანდელ ფინალისტ ივან ფელიპე სილვა მორალესთან.

ღვინიაშვილს მასთან რევანში აქვს ასაღები - მათი გზები მხოლოდ წლეულს გადაიკვეთა ბუდაპეშტში და კუნძულელმა მოუგო. ჯგუფის იმ მხარეს კუბელის შემჩერებელი არავინ გვეგულება.

100 კგ. 62 მონაწილე

ევროპის სამგზის ჩემპიონი, ერთი ოლიმპიადისა და მსოფლიოს სამი ფინალის წამგები ვალერი ლიპარტელიანიც მეორე წრიდან ჩაებმება ჩემპიონატში, სადაც ჩინელ ჰემიბატუ ერისა და ესტონელ გრიგორი მინასკინს შორის მოგებულს შეხვდება.

მერვედფინალის სავარაუდო მეტოქეთა შორის უნგრელი მიკლოშ ცირიენიჩი დაფრანგი ევროპის მედალოსანი ალექსანდრ იდირი ჰყავს, რომლებიც ერთმანეთს ხვდებიან, მეოთხედფინალისაში - პორტუგალიელი ჟორჯე ფონსეკა, თუმცა, წესით, ამ ჯგუფის გავლა და ნახევარფინალში გასვლა არ უნდა გაუჭირდეს.

იქ ყველა სავარაუდო კანდიდატთა შორის ჰოლანდიელ მიხეილ კორელს, გერმანელ მსოფლიოს ფინალისტ კარლ-რიხარდ ფრეის, მონღოლ ოტგონბაატარ ლხაგვასურენს და იმ რუს არმან ადამიანს დავასახელებთ, ვისთანაც მინსკში მეორე ევროპული თამაშების ფინალი წააგო.

+100 კგ. 41 მონაწილე

ბუნებრივია, პირველ წრეში მსოფლიოს მოქმედი ჩემპიონი, ევროპისა და ევროპული თამაშების გამარჯვებული გურამ თუშიშვილიც თავისუფალია, როგორც რეიტინგის ლიდერი, მეორეში კი ინდოელ შუბამ კუმარს შეხვდება. მასთან მოგებით მერვედფინალში გავა, სადაც ყველაზე სოლიდური სავარაუდო მეტოქე ბელარუსი ალექსანდრ ვახავიაკია. ამავე ჯგუფშია კორეელთა მსოფლიოს მედალოსანი სუნგმინ კიმი, ყირგიზი იური კრაკოვეცკი და რაც მთავარია, ჰოლანდიელი ხროლი. თუშიშვილმა მას მხოლოდ წლეულს მოუგო - მინსკში, ევროთამაშებზე, მანამდე კი ორჯერ დამარცხდა.

ისე კი ჩვენებურს ნახევარფინალში გასვლის შემთხვევაშიც ძლიერი მეტოქე ეყოლება - მასპინძელი ოლიმპიადის ფინალისტი და მსოფლიოს მედალოსანი ჰისაიოში ჰარასავა, მონღოლთა ოლიმპიური ჩემპიონი ტუვშინბაიარ ნაიდანი, აზერბაიჯანელთა ქართველი მსოფლიოს ფინალისტი უშანგი კოკაური... თუმცა რაკი ფრანგი ტედი რინერი არ ჭიდაობს, ქართველმა ეს შანსი აუცილებლად უნდა გამოიყენოს.

52 კგ. 57 მონაწილე

ტატიანა ლევიცკა-შუკვანი განუთესავი იყო და ჯგუფში ფრანგთა მსოფლიოს ჩემპიონ ამანდინე ბუშართან მოხვდა, ოღონდ მათი გზები მერვედფინალში იკვეთება. ჩვენებური პირველ წრეში პოლონელ ალექსანდრა კალეტას ხვდება, ამათში მოგებული კი ვიეტნამელი ტჰიუ ნგუენისა და ყაზახი ანა კაზულინას წყვილიდან უძლიერესს დაეჭიდება.

4945
მკითხველის კომენტარები / 0 /
მსგავსი ამბები
რუბრიკის სხვა სიახლეები
;