ძიუდო. სოფიაში გამოჩნდება, ვისი იმედი უნდა გვქონდეს უახლოეს მომავალში

13 სექტემბერს სოფიაში ახალგაზრდა ძიუდოისტთა ევროპის ჩემპიონატი იწყება. გთავაზობთ დღეს გამართული წილისყრის შედეგებს, რომლის შედეგადაც გაირკვა ქართველთა მეტოქეები.

55 კილოგრამში ჭაბუკებში მსოფლიოს მესამე პრიზიორი ვანო ხუბაშვილი პირველ პაექრობას მერვედფინალში გამართავს, სადაც თურქ ოგუზან ოზისიკთან გამართავს, მოგების შემთხვევაში კი მეოთხედფინალში იტალიელი მატია მარტელონის, რუსი მურად მირზაჟანოვისა და რუმინელი ბოგდან დრიმბას სამეულიდან გასული ელოდება.

60-ში ჭაბუკებში ევროპის ვიცე-ჩემპიონ თემურ ნოზაძეს პირველი წრეში მეტოქედ კვიპროსელი ლოუკა ლოუკასი ერგო, ამათში მოგებულს კი შემდეგ ეტაპზე საკმაოდ ძლიერი რუსი კონსტანტინ სიმეონიდისი ელოდება.

პირველივე წრეში კვიპროსელს ხვდება ახალგაზრდებში მსოფლიოს შარშანდელი ჩემპიონი ჯაბა პაპინაშვილიც, თუმცა ქართველს - გიორგი ბალარჯიშვილს. ამ წყვილის გამარჯვებულს მეორე ეტაპზე რეიტინგის ერთ-ერთი ფავორიტი თურქი სამეტ კუმტასი ელოდება.
ახალგაზრდებში მსოფლიოს შარშანდელი მესამე პრიზიორი ბაგრატ ნინიაშვილი (66) პირველ წრეში ისვენებს, მისი პირველი მეტოქე კი ჩერნოგორიელი მარკო გუსიჩი ან ბელარუსი ზმიტრი მუჟაილა იქნება - ვნახოთ, რომელი იმარჯვებს ამათ პაექრობაში.

73 კილოგრამში მონაწილე არ გვეყოლება, 81-ში კი ერთბაშად ორი ძლიერი ახალგაზრდა გვყავს - ტატო გრიგალაშვილი და ლუკა მაისურაძე.
ამ ასაკში ევროპის შარშანდელი ფინალისტი მაისურაძე პირველ წრეში ბოსნიელ ვუკ ელეზს დაეჭიდება, ამათში მოგებულს კი მომდევნო ეტაპზე ჩერნოგორიელ ალექსანდრ ტომიჩსა და ესტონელ ასლანბეკ მაგომედკარიმს შორის უმჯობესი შეხვედება.

პირველივე წრეში იჭიდავებს თბილისის "დიდი პრიზზე" ბრინჯაოსთვის ნაჭიდავები გრიგალაშვილიც - გერმანელ ემილ ჰენებახთან, გამარჯვების შემთხვევაში კი ბოსნიელ ბოჟიდარ ვუკურევიჩსა და ჰოლანდიელ იან რაიხნტინს შორის მოგებულს გაეჯიბრება.

წლევანდელი სეზონის ერთ-ერთი მთავარი ტრიუმფატორი ლაშა ბექაური, ვინც წლეულს 73-დან ერთბაშად 90-ში აინაცვლა, ახალ წონაში პირველ ოფიციალურ ტურნირს ჭიდაობს, შეჯიბრებაში კი მეორე წრიდან ჩაებმება, სადაც რუს მანსურ ლორსანოვს გაეჯიბრება. ამავე წონაში ვინმე ილია ხაბულიანიც გამოდის ესპანეთიდან, ოღონდ ის სხვა ქვეჯგუფშია.

100-შიც ორი მონაწილე გვეყოლება. თბილისის "დიდი პრიზის" წლევანდელი მესამე პრიზიორი ონისე სანებლიძე თავდაპირველად ფრანგ პაულ დევოს გაეჯიბრება, ამ წყვილის გამარჯვებულს კი მეორე წრეში საკმაოდ ძლიერი ჰოლანდიელი სიმეონ კატარინა ელოდება. ამავე ჰგუფშია აზერნაიჯანელი ადილ კარიმლიც და უკრაინელი იევჰენ ვეჰერაც - სანებლიძეს საკმაოდ დიდი ბრძოლა ელოდება, თუმცა თავად ისიც ფავორიტთა შორისაა.

ზაურ კენჭაძე პირველ პაექრობას შვეიცარიელ დანიელ აიხთან გამართავს, მოგების შემთხვევაში კი, რაც სავსებით ხელეწიფება, დანიელ მატიას მადსენს შეხვდება.

მძიმე წონაში გელა ზაალიშვილი მეორე წრიდან ჩაებმება პაექრობაში, სადაც უკრაინელი ვლადისლავ ბერეჟკას ძლევას შეეცდება.
გოგოების ტურნირში სულ ხუთი მონაწილე გვეყოლება. ნატალია ყიფშიძე (48) პირველ პაექრობას საკმაოდ ძლიერ ავსტრიელ იასქულეინა სპრინგერთან ჩაატარებს.

გოგოებში ორი მონაწილე მხოლოდ 57 კილოგრამში გვეყოლება. ორივე ჭაბუკებში ევროპის ჩემპიონია და პირველ წრეში ორივე ისვენებს. მეორეში ეთერ ლიპარტელიანი მეორე წრეში მაკედონიელ ბერნა შერიფოვსკასთან იჭიდავებს, ხოლო მზია ბებოშვილი - ავსტრიელ ლისა გრაბნერთან.

თბილისის "დიდი პრიზის" მესამე პრიზიორი და ახალგაზრდებში მსოფლიოს ბრინჯაოს მედალოსანი მარიამ ჭანტურია (70) პირველივე ეტაპზე ბერძენ იოანა-არისტეა დიმოუს ხვდება, ამათში მოგებულს კი საკმაოდ ძლიერი კონკურენტი ელოდება - ჩერნოგორიელ იოვანა პეკოვიჩსა და ჭაბუკებში ევროპის წლევანდელ ჩემპიონს, იტალიელ მარტინა ესპოზიტოს შორის გამარჯვებული.

სოფიო სომხიშვილი (+78) მეორე წრეში იჭიდავებს ბულგარელ დარინა სტოიჩევასთან. ამ ჯგუფში კიდევ ორი მონაწილეა - პოლონელი ჯულია სვიატკივიჟი და ჩეხი მარკეტა პაულუსოვა, რომლებიც თავდაპირველად ერთმანეთს ხვდებიან.

1422
მკითხველის კომენტარები / 0 /
მსგავსი ამბები
რუბრიკის სხვა სიახლეები
;