ძიუდო. ვის დარჩება გრან პრი ანტალიაში? მეტოქეები ცნობილია

გაიმართა ანტალიის გრან პრის წილისყრა, რომელიც 5-7 აპრილს გაიმართება თურქეთის საკურორტო ქალაქში. ტურნირი მეტად წარმომადგენლობითია - 75 ქვეყანა და 485 სპორტსმენი მონაწილეობს, რაც ბევრად აღემატება ერთი კვირის წინ გამართულ თბილისის ანალოგიურ შეჯიბრებას. ჩვენი ტურნირის მონაწილეთაგან თითქმის ყველა იქ წავიდა და სხვებიც დაემატნენ.

60 კგ.
ამ წონაში ორივე ჩვენებური პირველ წრეში თავისუფალია, თუმცა ჯაბა პაპინაშვილს წილისყრამ დიდად არ გაუმართლა - მეორე წრეში სლოვენიელ მატიას ტრბოვცსა და ტაივანელ იუნგ ვეი იანგს შორის მოგებულს შეხვდება. ირაკლი კუპატაძე პირველ შეხვედრას ჩეხ დევიდ პულკრაბეკთან ჩაატარებს, მოგების შემთხვევაში კი აზერბაიჯანელთა მსოფლიოს ფინალისტ ორხან საფაროვსა და ბრაზილიელ პან ამერიკის ჩემპიონ ერიკ ტაკაბატაკეს შორის უძლიერესს დაეჭიდება.

66 კგ.
აქ ჩვენებიდან პირველ წრეში მხოლოდ ივანე მახათაძე ჭიდაობს, ვისაც წილისყრამაც შედარებით გაუმართლა: ჯერ ბოტსვანელ გავინ მოგოპას ხვდება, შემდგომ ეტაზე გასვლისას კი ჩინელი ჭიქიან ვუ ელოდება.

ბაგრატ ნინიაშვილი პირველ ქვეჯგუფში მოხვდა უკრაინელთა ევროპისა და მსოფლიოს ჩემპიონ გიორგი ზანთარაიასთან, თუმცა მას მეოთხედფინალამდე არ ხვდება. ჩვენებური თავის პირველ შეხვედრას თურქ აბდულაჰ ბერკინ ოზქანსა და ამერიკელ ალაა ელ იდრისს შორის მოგებულთან ჩაატარებს.

73 კგ.
ბექა შავდათუაშვილი მონღოლ ჩოიჯილსურენ განბოლდს ხვდება, ამათში მოგებულს კი მეორე შეხვედრა თურქ მურად ბეკტაშსა და საუდის არაბეთის წარმომადგენელ აბდულელაჰ ალბალის შორის მოგებულთან მოუწევს.

ლაშა გიუნაშვილი თავიდან განელ ემანუელ ნარტეას გაეჯიბრება, მეორე წრის პაექრობამ კი, შესაძლოა, ფრანგ ბენჟამინ აქსუსთან მოუწიოს.

81 კგ.
დებიუტანტი ვლადიმერ ახალკაცი ჯგუფში თურქთა ქართველ მსოფლიოს მედალოსან ვედატ ალბაირაქისთან მოხვდა, თუმცა მთლად წილისყრის საჩუქარი არც პირველ წრეში ერგო - ჩვენი ტურნირის წლევანდელი ფინალისტი, გერმანელი ტიმო კაველიუსი. მას თუ მოუგებს, მერე ბერძენთა ქართველ ვასილიოს ბალამპანაშვილსა და კონგოს დემოკრატიული რესპუბლიკის ფალავან კალონჯი მბუის შორის უძლიერესს გაეჯიბრება.
ლუკა მაისურაძე პირველ წრეში ჰოლანდიელ ჯიმ ჰაიხმანს დაეჭიდება.

90 კგ.
ავთანდილ ჭრიკიშვილი პირველ წრეში ბრიტანელ ფრეზერ ჩამბერლაინს ხვდება, ამ დუეტის მოგებულს კი კანადელი მაქსიმ კოტე ელოდება. წესით, ჭრიკიშვილის შესაძლებლობების კაცს ამათი დამარცხება არ უნდა გაუჭირდეს, აი, მესამე წრეში კი, შესაძლოა, მონღოლ ალტანბაგანა განტულგას გადაეყაროს.
გიორგი პაპუნაშვილი მეორე წრიდან ჩაებმება შეჯიბრებაში, სადაც ყირგიზ ფარუხ ბულეკულოვს გაეჯიბრება.

100 კგ.
ეს წონა ჩვენს ვაჟთა ნაკრებში ერთადერთია, სადაც ერთი მონაწილე გვყავს - ზაურ კენჭაძე. ის მეორე წრეშია დაშვებული, სადაც წილისყრამ მაინცდამაინც ფრანგი ევროპის მედალოსანი ალექსანდრ იდირი არგუნა. +100 კგ.
გიორგი ქავთარაძე პირველივე წრეში რუს ინალ თასოევს ხვდება, ლევან მატიაშვილი - საუდის არაბელ რაკან ზაიდანს. თუმცა ორივე ჩვენებური საკმაოდ ძნელ ჯგუფშია.

ქალთა ნაკრები ანტალიაში 6 სპორტსმენითაა წარმოდგენილი, თუმცა რაკი მათ ჯერ სათანადო რეიტინგი არ აქვთ, წილისყრაც ძნელი ხვდებათ.
ნატალია ყიფშიძე (48) პირველივე წრეში ჩინელ იაო ქსიონგს ხვდება, ტატიანა ლევიცკა-შუკვანი (52) კი ასევე ჩინელთან - ლიპინგ ლიუსთან ჭიდაობს. მარიამ ჯანაშვილი ამჯერად 57 კილოგრამში იჭიდავებს, სადაც მეორე წრეშია დაშვებული და იქ ებრაელ მააიან გრეენბერგს გაეჯიბრება, ხოლო ამავე წონაში ეთერ ლიპარტელიანი გერმანელი საპო კობანს ხვდება.

მარიამ ჭანტურია (70) პირველსავე ეტაპზე ამერიკელ ჩანტალ ვრაიგტს დაეჭიდება. მძიმეწონოსანი სოფიო სომხიშვილი პირველ წრეში ესპანელ სარა ალვარესს ეჯიბრება.

ყოველდღიური სპორტული გაზეთი "ლელო"
1335
მკითხველის კომენტარები / 0 /
მსგავსი ამბები
რუბრიკის სხვა სიახლეები
;