ძიუდო. ზაგრებში 14 ქართველი იჭიდავებს... ველით პასუხებს კითხვებზე

26 ივლისს ზაგრებში "დიდი პრიზის" მორიგი ტურნირი იწყება ძიუდოში, რომელშიც საქართველოდან 14 სპორტსმენი გამოვა - 9 ვაჟი და 5 ქალი. ჩვენი ნაკრებისთვის ეს ფრიად მნიშვნელოვანი შეჯიბრებაა, რადგან დიდწილად ხორვატიაში გადაწყდება, მსოფლიოს ჩემპიონატზე რომელ წონებს გააორებს ჩვენი ნაკრების სამწვრთნელო შტაბი. წონების პირველი ნომრები, დიდწილად, უკვე გარკვეულია და არა გვგონია, ამ კუთხით რამე შეიცვალოს. ვეჭვობთ, 60 კილოგრამში მეორე ნომერიც გარკვეულია, თუმცა ასეც რომ იყოს (იქ ორი მაღალი დონის ფალავანი გვყავს), დარჩენილია კიდევ ერთი კვოტა, რაც ზაგრებში გაირკვევა.

ცოტა განსხვავებული მდგომარეობა გვგონია 90 კილოგრამში: სავარაუდოდ, მწვრთნელები ამ წონის გაორებას არც აპირებენ დ იქ პირდაპირ პირველი ნომრის საკითხი ირკვევა ბექა ღვინიაშვილსა და გიორგი პაპუნაშვილს შორის. ბოლო პერიოდში უტიტულო პაპუნაშვილს ტიტულოვან კონკურენტებთან პაექრობაში დადებითი ბალანსი აქვს, თუმცა მეორე ევროპულ თამაშებზე მაინც ვერ ენდნენ და უფრო გამოცდილი ღვინიაშვილი ამჯობინეს. მან იმედები ვერ გაამართლა და ახლა კიდევ ერთხელ დგება სასწორზე მისი და პაპუნაშვილის კონკურენცია.

დიდწილად ასეთმა რეალობამ განსაზღვრა ხორვატიაში გაგზავნილი შემადგენლობა: ლიდერები ახლა მზადების დასკვნით ეტაპზე არიან და მათ მსოფლიოსთვის ამზადებენ, ამ შეჯიბრების წინ ტურნირზე გამოსვლა კი არცთუ გამართლებულია. ამიტომ ლიდერთა ნაწილი ისვენებს (იმ წონების გარდა, სადაც კონკურენციაა გასარკვევი), მათ ნაცვლად კი ძირითადად სათადარიგოები მიჰყავთ, რომლებსაც მორიგ შანსს აძლევენ. სხვა საკითხია ქალთა ნაკრები, სადაც ახალგაზრდებს უფროსებშიც სცდიან და თან ტატიანა ლევიცკა-შუკვანი (52) სალიცენზიო ქულებსაც აგროვებს. ვაჟთა ნაკრებს ლიცენზიების მოპოვების პრობლემა არ უდგას - ჩვენები თითქმის ყველა წონაში მსოფლიოს რეიტინგის სათავეში არიან და საგზურების მოპოვება არ გაუჭირდებათ. შესაბამისად, აღარც ქულებზე სდევნა სჭირდებათ ტურნირიდან ტურნირამდე.

თემურ ნოზაძე (60) ერთ-ერთი მათგანია, ვისაც ამ ეტაპზე უფრო გამოცდილების მისაღებად აჭიდავებენ. ის ზაგრებში პირველ წრეში ისვენებს, მეორეში კი სენეგალელ მუსა დიოპს შეხვდება. წესით, მას უნდა მოუგოს, მერე კი მერვედფინალში ფრანგთა მსოფლიოს ჩემპიონ ვალიდე ხიარის, კორეელი ინ-ჰიუკ ჩოისა და ავსტრიის სახელით მოჭიდავე კიმრან ბორჩაშვილის ტრიოდან გასულს შეხვდება. ამავე ბადეშია ბრიტანელი ევროპის მედალოსანი ეშლი მაკენზიც.

66 და 73 კილოგრამებში მონაწილე არ გვყავს, 81-ში კი ორი ქართველი იჭიდავებს. ტატო გრიგალაშვილი ჯგუფში ირანელ მსოფლიოს ჩემპიონ საეიდ მოლაესთან მოხვდა, თუმცა მათი გზები მეოთხედფინალამდე არ იკვეთება. ისე კი გრიგალაშვილს მასთან თითო მოგება-წაგება აქვს.

გრიგალაშვილი პირველ წრეში თავისუფალია, მისი პირველი მეტოქე კი არგენტინელი ემანუელ ლუკენტისა და ხორვატთა ევროპის მედალოსან დომენიკ დრუზეტას პაექრობაში გაირკვევა. გრიგალაშვილი ბოლო ერთ თვეში მესამე ტურნირს ჭიდაობს: ჯერ მსოფლიოს უნივერსიადაზე ბრინჯაო მოიპოვა, მერე კი გაიმარჯვა ბუდაპეშტის "დიდ პრიზზე". ვეჭვობთ, გადაღლილი არ იყოს, თორემ წესით, მეოთხედფინალში გასვლა არ უნდა გაუჭირდეს.

ევროპის მედალოსანი ზებედა რეხვიაშვილი ხანგრძლივი პაუზის შემდეგ უბრუნდება ნაკრებს. წილისყრამაც დაინდო და ზაგრებში პირველ წრეში "გასახურებელი" მეტოქე არგუნა - ბურუნდელი სამუელ კვიტონდა. ზებედას მისი ძლევა არ უნდა გაუჭირდეს, მერე კი მეტოქედ ჩვენი ტურნირის წლევანდელ გერმანელ ვიცე-ჩემპიონ ტიმო კაველიუსსა და ისლანდიელ სვეინბიორნ იურას შორის მოგებული ეყოლება. მეოთხედფინალისკენ სავალ გზაზე ჩვენებურს ბელგიელი სამი ჩოუჩიც ელოდება, ხოლო ჯგუფის ფავორიტი რუსთა ევროპის ჩემპიონი ალან ხუბეცოვია.

ამ წონაში ჯგუფში ორივე ჩვენებურს ავსტრიელთა სახელით მოჭიდავე ბორჩაშვილები ჰყავს: გრიგალაშვილთან ადამ ბორჩაშვილი მოხვდა, რეხვიაშვილთან - შამილ ბორჩაშვილი.

ღვინიაშვილი ურთულეს ბადეში მოხვდა, სადაც მასთან ერთად არიან იაპონელი მსოფლიოს მესამე პრიზიორი კენტა ნაგასავა, იმავე სინჯის მედლის მფლობელი ფრანგი აქსელ კლერჯე და შვედი მარკუს ნიმანი. ოღონდ ისინი ბადის ქვედა მხარეს არიან და ღვინიაშვილი მათ მეოთხედფინალამდე არ შეხვდება, მანამდე კი იმათ ერთმანეთში უნდა გაარკვიონ უძლიერესი.

ღვინიაშვილი პირველ წრეში ისვენებს, მისი მეტოქე კი ბელარუსი ვიკტარ კლიავუსაუსა და სლოვენიელი ნარსეი ლაცკოვიჩის პაექრობაში გამოვლინდება.
პაპუნაშვილი პირველივე წრეში ხვდება ბელარუსს - იაჰორ ვარაპაეუს, ამათში მოგებულს კი მომდევნო ეტაპზე სლოვაკი მილან რანდლი ელოდება. ჯგუფის ამავე ნახევარშია აზერბაიჯანელი მამადალი მეჰდიევი, ხოლო ქვედა მხარეს - იაპონელი კანოს მემორიალის მესამე პრიზიორი სანშირო მურაო,
100-ში ონისე სანებლიძეს პირველივე წრეში მეტოქედ არაბთა გაერთიანებული საემიროების მოლდოველი მსოფლიოს პრიზიორი ივან რემარენკო ერგო, ამათში უძლიერესს კი მეორე წრეში ირლანდიელი ბენჯამინ ფლეტჩერი ელოდება. ლაშა ტაველურიც ასევე პირველივე წრეში ჭიდაობს ძიუდოს საერთაშორისო ფედერაციის სახელით მოასპარეზე ადნან ხანკანთან, მოგებულის მეტოქე კი ახლავეა ცნობილი - ებრაელი პეტერ პალჩიკი. ტაველურს გერმანელი მსოფლიოს ფინალისტი კარლ-რიხარდ ფრეიც ახლოს ჰყავს ჯგუფში.

მძიმე წონაში ორი საყურადღებო ფალავანი გვყავს - უფროსებში ევროპის მედალოსანი ლევან მატიაშვილი და ახალგაზრდებში მსოფლიოს ჩემპიონი გელა ზაალიშვილი. ისინი მეორე წრიდან ჩაებმებიან შეჯიბრებაში, თუმცა წილისყრამ დიდად არ გაუმართლათ: მატიაშვილი აზერბაიჯანელთა ქართველ მსოფლიოს ფინალისტ უშანგი კოკაურს ხვდება, ზაალიშვილი - რუს ანტონ ბრაჩევს. გარდა ამისა, მატიაშვილს ბადეში იაპონელი ოლიმპიადის ფინალისტი და მსოფლიოს მესამე პრიზიორი ჰისაიოში ჰარასავაც ჰყავს, ზაალიშვილს კი - პირველი ევროპული თამაშების ებრაელი ვიცე-ჩემპიონი ორ სასონი. თანაც, მათი გზები მერვედფინალში იკვეთება, მატიაშვილი კი ჰარასავას მერვედფინალამდე ვერ შეხვდება.

ნატალია ყიფშიძე (48) პირველ წრეში იტალიელ ფრანჩესკა მილანის ხვდება, ამათში მოგებულს კი მეორე წრეში ჩინელი იაო ქსიონგი ელოდება. ლევიცკა-შუკვანი ჯგუფში იაპონელ ნაცუმი ცუნოდასთან კი მოხვდა, მაგრამ მას მეოთხედფინალამდე ვერ გაეჯიბრება, იქამდე მისასვლელად კი ჯერ გვინეა ბისაუელი ტაციანა ცეზარი უნდა დაამარცხოს, მერე - კანადელი ეკატერინა გუიკასა და სლოვაკ ანდრეა კრისანდოვას დუეტის გამარჯვებულიც.

ახალგაზრდებში ევროპის ფინალისტი ეთერ ლიპარტელიანი (57) მეორე წრეშია დაშვებული, თუმცა იქ კანადელთა მსოფლიოს მედალოსან კრისტა დეგუჩის შეხვდება. თბილისის ტურნირის მედალოსანი მარიამ ჭანტურიას (70) პირველი შეხვედრა გაბონელთა აფრიკის პრიზიორ კარენე აგონო ვორასთან ექნება. სამაგიეროდ, მოგების შემთხვევაში კორეელ ჰიე ჯინ ჯეონსა და ხორვატ ევროპის მედალოსან ბარბარა მატიჩს შორის უძლიერესს შეხვდება. ახალგაზრდებში ევროპის ჩემპიონი და მსოფლიოს პრიზიორი სოფიო სომხიშვილი (+78) ასევე პირველ ეტაპზე ლიეტუველ სანტა პაკენიტეს დაეჭიდება, მოგების შემთხვევაში კი პოლონელ ანა ზალეჟნას გაეჯიბრება.

948
მკითხველის კომენტარები / 0 /
მსგავსი ამბები
რუბრიკის სხვა სიახლეები
;