ძიუდო. თბილისის გრან პრი: კვარცხლბეკზე მხოლოდ ქართველები არიან...

* ვაჟთა 7 წონიდან 5-ში ქართველმა ძიუდოისტებმა გაიმარჯვეს.
 * 2010 წლის შემდეგ პირველად თბილისის ტურნირზე ქართული
კვარცხლბეკი მივიღეთ.

საქართველოს ძიუდოისტთა ნაკრებმა წარმატებით ჩაატარა თბილისის გრან პრი და 14 მედალი მოიპოვა: 5 ოქრო, 3 ვერცხლი და 6 ბრინჯაო. ამათგან ერთი ბრინჯაო ქალთა ნაკრებმა მოიპოვა. გუნდური ჩათვლაც ჩვენმა ნაკრებმა მოიგო.

ამ ტურნირზე ბევრი რამე მოხდა ჩვენთვის საინტერესო: ქალებში მოპოვებული მართლაც ფასეული მედალი; მთლიანად "ქართული" კვარცხლბეკი;

პირველი ორი დღის განმავლობაში ბიჭებში მოპოვებული ოთხივე ოქრო და ორი დღის მანძილზე ზედიზედ გამართული ორი ქართული ფინალი; კონკურენციის თვალსაზრისით, უაღრესად საინტერესოდ განვითარებული მოვლენები 60-ში და 81-ში;

მძიმე წონაში გურამ თუშიშვილის მორიგი გაელვება და დატრიალებული "გრიგალი", თუმცა ამ მხრივ ევროპის შარშანდელი ჩემპიონატი მაინც გამორჩეული იყო. ისე, შიდა კონკურენციის თვალსაზრისით და მეორე ნომრის საკითხის გასარკვევად, მძიმე წონაშიც საინტერესოდ განვითარდა მოვლენები.

ქართული ფინალები 60 და 73 კილოგრამებში გაიმართა. პირველში ლუხუმ ჩხვიმიანმა ამირან პაპინაშვილი დამატებით დროში დაამარცხა, მეორეში კი ლაშა შავდათუაშვილმა ბევრად იოლად აჯობა ფრიდონ გიგანს.

დანარჩენ ოქროებს ვაჟა მარგველაშვილი (66), თამაზ კირაკოზაშვილი (81) და გურამ თუშიშვილი (+100) დაეუფლნენ, ჩვენი გუნდის კიდევ ერთი ვერცხლის მედალოსანი კი გიორგი პაპუნაშვილი (90) გახდა.

ვაჟებში ბრინჯაოს მედლებს ლაშა ჩადუნელი, თემურ ნოზაძე (ორივე - 60), ნუგზარ ტატალაშვილი (81), ონისე სანებლიძე (100) და ლევან მატიაშვილი (+100) დაეუფლნენ. ქალებში მესამეზე მარიამ ჭანტურია (70) გავიდა.

ქართული კვარცხლბეკი

2010 წლის შემდეგ პირველად მოხდა, როცა ჩვენს ტურნირზე კვარცხლბეკი მთლიანად ქართველებმა შეავსეს. მაშინ ეს 81 კილოგრამში მოხდა, ამჯერად - 60-ში. ამ წონაში კონკურენციაც ძალიან საინტერესოდ განვითარდა - ლუხუმ ჩხვიმიანმა კიდევ ერთხელ დაამარცხა ამირან პაპინაშვილი.  წინასწარი შეხვედრები ორივემ საკმაოდ მაღალ დონეზე ჩაატარა.

მართალია, ჩხვიმიანმა რუსი ეგორ ცვეტკოვი გაფრთხილებებით კი მოახსნევინა, მაგრამ მისი ახლანდელი გამოსვლა მაინც ბევრად განსხვავდებოდა დიუსელდორფული შეჯიბრებისგან, სადაც ბრინჯაომდე მხოლოდ გაფრთხილებებით მივიდა.

ამჯერად გაცილებით უფრო შემტევ სტილში ჭიდაობდა და ბევრი გდება თუ ვერ გააკეთა, ხშირად ნამდვილად სცადა. მან უზბეკი დონიორ სულთანბაევი ბოლო წამებზე დაიჭირა და შებოჭა, აზერბაიჯანელი ორუჯ ვალიზადა კი გვარიანად გაუძალიანდა, მაგრამ დამატებითში მაინც მოახერხა ერთ მომენტში მისი ვაზარიზე გადაგორება.

დაახლოებით ასევე მოუგო პაპინაშვილსაც ფინალი, თან იქვე ჯენტლმენური ჟესტიც გამოავლინა და წაქცეულ მეტოქეს ხელი გაუწოდა წამოსაყენებლად.

პაპინაშვილიც კარგად, თამამად ჭიდაობდა, მაგრამ ჩხვიმიანთან უკვე მორიგი გადამწყვეტი ფინალი დათმო. ვფიქრობთ, ამ წონაში ევროპის პირველობაზე წამსვლელი ერთი კანდიდატი უკვე გამოიკვეთა.

ამ წონაში ძალიან იყოჩაღა ნოზაძემ, ვინც ჯერ ისევ ახალგაზრდული ნაკრების წევრია, ხოლო ცალკე აღნიშვნის ღირსია ჩადუნელი, რომელმაც საკმაოდ ძლიერი აზერბაიჯანელი ვალიზადა დაამარცხა.

მართალია, სუსტი არც რუსი ალბერტ მონგუში იყო - ნოზაძის მეტოქე დამამშვიდებლის ფინალში, მაგრამ ვალიზადა გაცილებით ჭკვიანი "ტაქტიკოსია". ნამდვილად მისასალმებელია ახალი თაობის ასეთი კარგი გამოსვლა. მით უფრო, ამ წონაში ახალგაზრდების მსოფლიოს ჩემპიონი ჯაბა პაპინაშვილიც გვყავს.

ჩემპიონი თავის სიმაღლეზე

დამაჯერებლად გამოვიდა ლაშა შავდათუაშვილიც, თუმცა ამჯერად არ გამოვიდნენ მისი მთავარი კონკურენტები - აზერბაიჯანელები და იაპონელები.

ამის მიუხედავად, თავად მისი ჭიდაობის ხარისხი იყო დამაკმაყოფილებელი და მთავარიც ესაა. თან, ჯერ კიდევ მოსამზადებელი პერიოდია და ევროპის ჩემპიონატს ბევრად უკეთეს ფორმაში შეხვდება.

ძალიან კარგი იყო გიგანის გამოსვლაც - ახლა ვისურვოთ, მან უცხოეთშიც ასეთივე შემართებით გააგრძელოს ჭიდაობა.

კონკურენცია 81-ში

ძალიან დაიძაბა შიდა კონკურენცია 81-შიც. აქ კირაკოზაშვილმა კიდევ ერთხელ მოუგო ტატალაშვილს, თუმცა ესეც, თავის მხრივ, ისევ იხვეჭს ქომაგთა სიმპათიებს კარგი, დამაჯერებელი ჭიდაობით.

ამ ტურნირის შემდეგ საგრძნობლად გაძლიერდა კონკურენცია მეორენომრობისთვისაც, ამ დავაში კი 81 კილოგრამი ერთ-ერთი ყველაზე ანგარიშგასაწევია. მწვრთნელებს გასაორებელი წონების ასარჩევად ბევრი ფიქრი მოუწევთ.

ზებედა რეხვიაშვილმა ბოლომდე ისევ ვერ გაამართლა იმედები, კობა მჭედლიშვილს კი ჯერ კიდევ სჭირდება გარკვეული ეტაპები უფროსებში წარმატებით საჭიდაოდ.

თუშიშვილიისევ შეუჩერებელია

თუშიშვილი კვლავ ძლიერად გამოვიდა და ფინალამდე დამაჯერებლად მივიდა. მათ შორის - ლევან მატიაშვილთანაც იოლად მოიგო, თუმცა ფინალში საკმაოდ დიდი წინააღმდეგობა შეხვდა ირანელი ჯავად მაჰჯუბისგან.

ჩვენებური რეალურად დადგა წაგების საფრთხის წინაშე. კიდევ კარგი, თავისი საფირმო ილეთებით მაინც იმარჯვა.

ფიზიკურად ძალიან ძლიერი ირანელი კარგად დაუდგა ჩვენებურს და მართლაც რომ ტოლ-სწორი მეტოქე აღმოჩნდა. ის ვაზარითაც დაწინაურდა, როცა სწორედ ფიზიკურად დაჩაგრა ჩვენებური - ვერ გადმოიღო მეტოქე, რომელმაც იქით მოახერხა მისი უკან გადაგდება.

აქამდე იყო ორი ეპიზოდი, როცა მაჰჯუბს ერთხელ ვაზარი გაუუქმეს, მერე კი გდება არ შეუფასეს, თუმცა მსაჯები ორივე შემთხვევაში მართლები იყვნენ.

მაგალითად, პირველ ეპიზოდში თუშიშვილმა იდაყვი დაასწრო - ეს მომენტი ზუსტად იგივე იყო, რაც ტედი რინერის ვარდნა მსოფლიოს ჩემპიონატზე.

ჩამორჩენამ თუშიშვილს თითქოს მეტი სტიმული მისცა და მეტოქე თავის საფირმო კისრულზე წამოიღო. მართალია, გდება ვერ დაასრულა, მაგრამ ირანელი ტატამზე კი გაშხლართა და მაშინვე ზედ დაახტა შებოჭვაზე. ირანელმა თავის დაღწევა ვეღარ შეძლო...

შეხვედრის შემდეგ თუშიშვილმა განაცხადა: "ბუნებრივია, ჩემპიონობა ძალიან გამიხარდა. მით უფრო, წინა ორი დღე ძალიან წარმატებული იყო ჩვენი ნაკრებისთვის - ოთხი ოქრო მოვიპოვეთ, დღეს კიდევ ორი გავედით ფინალში და მაყურებელი მიჩვეული იყო წარმატებებს. ამიტომ ძალიან გვინდოდა ჩემპიონობა და ღმერთის წყალობით, კიდეც მივაღწიეთ მიზანს.

ფინალში ირანელისგან დიდ წინააღმდეგობას ნამდვილად ველოდი, რადგან ფიზიკურად ძალიან ძლიერი ბიჭია. მას შევხვედრივარ კიდეც, მაგრამ ძალიან ადრე, მაშინ პატარა ვიყავი. საბედნიეროდ, ისე მოვახერხე, რომ ის მოჰყვა შებოჭვაზე. რა თქმა უნდა, ის გასათვალისწინებელი მეტოქეა, მაგრამ სამომავლოდ ვეცდები, აღარ გავიმეორო ის შეცდომები, რაც ახლა დავუშვი ფინალში. უფრო ფიზიკური კონდიციების გაუმჯობესების კუთხით გვექნება სამუშაო".

სხვა წონებიდან, რაღა თქმა უნდა, გამოვარჩევთ მარგველაშვილის სტაბილურ გამოსვლას, თუმცა ფინალში მასაც ძალიან გაუჭირდა ბრაზილიელ დანიელ კარნინთან, ვისაც დამატებითში მოუგო. ძირითად დროში ჩვენებურმა ერთი გდება გააკეთა, მაგრამ სამართლიანად გააუქმეს და კიდეც გააფრთხილეს, რადგან ეს "დათვის ჩავლებით" გააკეთა. დამატებითში უკვე თვითონაც, თითქოს, დაეცა, მაგრამ ესეც ერთი შეხედვით, თორემ შეფასებას არც ის გდება იმსახურებდა.

ასევე აღსანიშნავია ონისე სანებლიძის სტაბილურობა, ომარ ნიაზაშვილის (73), ონისე ბუღაძის (ამათი უმედლოდ დარჩენის მიუხედავად), ოზბეთელაშვილის და მატიაშვილის გამოსვლა.

პაპუნაშვილიც ქებას იმსახურებს - სხვას თავი დავანებოთ, როცა ამ წონაში არ ჭიდაობდა 3 ლიდერი და მაინც ფინალში გავედით, უკვე დიდი წარმატებაა, თუმცა საწყენია, რომ მან ლამის ისევ ისეთივე შეცდომებით წააგო, როგორც ავსტრიაში დამარცხდა.

ვაჟები

60 კგ
1. ლუხუმ ჩხვიმიანი; 2. ამირან პაპინაშვილი; 3. თემურ ნოზაძე, ლაშა ჩადუნელი (ოთხივე - საქართველო).

66 კგ
1. ვაჟა მარგველაშვილი (საქართველო); 2. დანიელ კარნინი (ბრაზილია); 3. შახრამ ახმადოვი (უზბეკეთი), დანიელ ჟანი (საფრანგეთი); 5. ლაშა გიუნაშვილი; 7. ნიკოლოზ ჭიკაიძე (ორივე - საქართველო).

73 კგ
1. ლაშა შავდათუაშვილი; 2. ფრიდონ გიგანი (ორივე - საქართველო); 3. ნილს შტუმპი (შვეიცარია), სამ ვან ვესტენდე (ჰოლანდია); 7. ომარ ნიაზაშვილი (საქართველო).

81 კგ
1. თამაზ კირაკოზაშვილი (საქართველო); 2. ანრი ეგუტიძე (პორტუგალია); 3. ნუგზარ ტატალაშვილი (საქართველო), სერგეი კრივჩაჩი (უკრაინა); 7. ზებედა რეხვიაშვილი (საქართველო).

90 კგ
1. რაფაელ მაჩედო (ბრაზილია); 2. გიორგი პაპუნაშვილი (საქართველო); 3. ლი კოჩმანი (ისრაელი), პიოტრ კუჩერა (პოლონეთი).

100 კგ
1. პეტერ პალჩიკი (ისრაელი); 2. მერაბ მარგიევი (რუსეთი); 3. ონისე სანებლიძე (საქართველო), ჟორჟე ფონსეკა (პორტუგალია); 7. დავით ოზბეთელაშვილი (საქართველო).

+100 კგ
1. გურამ თუშიშვილი (საქართველო); 2. ჯავად მაჰჯუბი (ირანი); 3. ლევან მატიაშვილი (საქართველო), იურ სპიკერსი (ჰოლანდია); 5. ონისე ბუღაძე; 7. ადამ ოქრუაშვილი (ორივე - საქართველო).

ყოველდღიური სპორტული გაზეთი "ლელო"
402
მკითხველის კომენტარები / 0 /
მსგავსი ამბები
რუბრიკის სხვა სიახლეები