ძიუდო. ლოთაობა ოლიმპიურ სოფელში! თვითმფრინავში ჩხუბამდეც იყო მძაფრი ინციდენტი

სამწუხაროდ, მეორე ევროპულ თამაშებზე საქართველოს ვაჟ ძიუდოისტთა ნაკრებმა თავი არა მარტო წარმატებით (7 მედალი და გუნდური პირველობა: 2 ოქრო, 1 ვერცხლი და 4 - ბრინჯაო), არამედ სკანდალებითაც გამოიჩინა - თვითმფრინავში მომხდარ ინციდენტზე უკვე ღიად საუბრობენ და მის გამოსაძიებლად საქართველოს ძიუდოს ფედერაციამ ჯერ საგანგებო განცხადებაც გაავრცელა, მერე კი აღმასკომის ასევე საგანგებო სხდომაც დანიშნა, თუმცა მანამდე კიდევ ერთი ინციდენტი თუ უსიამოვნო ეპიზოდი თავად მინსკში, ოლიმპიურ სოფელშიცაა მომხდარი.

არც ერთ მათგანს არათუ მე, მინსკში მყოფი ჟურნალისტთა კორპუსიდანაც კი არავინ შევსწრებივართ (თუმცა კი იქვე გავიგეთ, ოღონდ ორივე - სხვადახვა ვერსიებით) და დეტალებზე ზუსტად ვერ ვისაუბრებთ. შესაბამისად, კონკრეტული გვარ-სახელების დასახელებასაც მოვერიდებით თვითმფრინავის ინციდენტის გარდა, სადაც უკვე დასახელებულია კონკრეტული პიროვნებები.

იყო თუ არა ფიზიკური შეურაცხყოფა თვითმფრინავში? ძიუდოს ფედერაციის პრეზიდენტმა \'ზედმეტი ალკოჰოლი\' და \'სანქცია\' ახსენა

როგორც გითხარით, ორივე ამბავზე განსხვავებული ვერსიები არსებობს - ოფიციოზისა და თვითმხილველებისა, ოღონდ არც ერთი ვერსიით ეს კონფლიქტები ერთმანეთს არ უკავშირდება.

ამათგან ოფიციალურად გახმოვანებული "თვითმფრინავის ინციდენტია", სადაც ორი ვერსია არსებობს: ნასვამმა მწვრთნელმა გიორგი ბაინდურაშვილმა გუნდის დებიუტანტ ლუკა მაისურაძეს (81) დაარტყაო (სოციალურ ქსელებში წერენ, ხურდაც მიიღოო), თუმცა ფედერაციის ხელმძღვანელობა ამბობს, რომ გუნდის წევრებმა საქმე დარტყმამდე არ მიიყვანეს, მაგრამ შელაპარაკება და სიტყვიერი შეხლა-შემოხლა კი იყოო. ამბობენ, რომ თურმე ამაზე ბელარუსული ავიაკომპანია "ბელავიაც" კი აპირებდა განცხადების გაკეთებას, მაგრამ ჯერ მათგან მსგავსი არაფერი მოგვისმენია.

მეორე უსიამოვნო ეპიზოდი რამდენიმე საათით ადრე თავად მინსკში, ოლიმპიურ სოფელშია მომხდარი. მასზეც რამდენიმე ვერსია გავრცელდა, მაგრამ ყველაფერი იქაც დალევისა და სიმთვრალის ირგვლივ ტრიალებს. ოფიციალური ვერსიით, ნაკრების რამდენიმე მწვრთნელი მთვრალი დაბრუნდა სოფელში (ამ დროს ძიუდოისტთა შეჯიბრება უკვე დასრულებული იყო), უმეტესობამ ნომრებს მიაშურა და პატიოსნად დაიძინა, თუმცა ორი მათგანი გაზონზე წამოკოტრიალდა და მთვრალებისთვის დამახასიათებელი, ლამის დებოშამდე მისული ბილწსიტყვაობით კარგა ხანს ხმაურობდნენ, ამ ყველაფერს კი მთელი ოლიმპიური სოფელი უყურებდაო.

სპორტის სხვა სახეობების წარმომადგენლები ამბობენ იმასაც, რომ ერთ-ერთი მათგანი მწვრთნელ ლაშა გუჯეჯიანს წაეჩხუბა, ახალგაზრდულიდან ჩემი კონკურენტის დაწინაურება გსურსო(!) და ისეთი ამბავი იყო, სოფელში პოლიციაც გამოიძახესო, თუმცა ოფიციოზიდან ეს ვერსიები არავინ დაადასტურა - მათ მხოლოდ გაზონის ამბები გვითხრეს (გასათვალისწინებელია, რომ გუჯეჯიანი სოფელში არც ცხოვრობდა). სამაგიეროდ, ასევე ოფიციალურ დონეზე გვითხრეს, რომ თურმე სოფლის ადმინისტრაცია ამ კადრების დიდ ეკრანზე გაშვებას აპირებდა, მაგრამ ჩვენების თხოვნით განზრახვაზეც ხელი აიღეს და ის ჩანაწერებიც წაშალესო...

ყოველდღიური სპორტული გაზეთი "ლელო"
13321
მკითხველის კომენტარები / 6 /
arrsena
0
ისინი ლოთობენ და ჩხუბობენ და თქვენ კომენტარებსაც მალავთ და დებოშიორების სახელებსაც . რა ჟურნალისტებიც თქვენ ხართ ისეთივე სპორტსმენები ეგენი არიან და შესაბამისი თავრობაც გყავთ, ფერი ფერსაო და მადლი ღმერთსაო
უცნობი
0
ღმერთმა უკეთოს ხელები ლუკას,, მიაფარჩაკა, ისედაც ზნედაცემული ხეპრე ადამიანი ჩანს და აგერ ჰა გამოამჟღავნა თავისი თავი კიდევ ერთხელ
მსგავსი ამბები
რუბრიკის სხვა სიახლეები
;