ძიუდო. თორნიკე ნაგლიაშვილის ვერცხლი პრაღაში

პრაღაში ჩატარებული ძიუდოისტთა "ევროპის ღია თასი" ჩვენმა ნაკრებმა ერთადერთი მედლით, თუმცა კი ვერცხლით დაამთავრა, რომელიც თორნიკე ნაგლიაშვილმა (66) მოიპოვა.

ეს ტურნირი უფროსთა შორის იმართება, თუმცა ჩვენგან იქ ახალგაზრდებით დაკომპლექტებული ექსპერიმენტული გუნდი გამოვიდა, რომელსაც სპეციალური პროგრამით ამზადებენ. ექსპერიმენტი უფროსებში მათ ეტაპობრივად, თანდათანობით გადასვლასაც ითვალისწინებს და ახლა ამიტომ აჭიდავეს უფროსებში, ოღონდ შედარებით დაბალი რანგის და სიძლიერის "ღია თასი" შეარჩიეს და არა რომელიმე დიდი ტურნირი.

მიზეზთა გამო, ნაგლიაშვილი შეჯიბრებებში აქამდე ვერ ჩაერთო, ახლა კი პრაღაში უპრობლემოდ მივიდა ფინალამდე. ჯგუფურ ეტაპზე ჩვენებურმა ფრანგი ფრანკ ვერნე და ჰოლანდიელი მატიის ვან ჰარტენი ვაზარით დაამარცხა, ხოლო უნგრელი ბენცე ბოროსი ბეჭებზე დააგდო.

მეოთხედფინალში გამოცდილ ბელარუს დმიტრი მინკოუსაც იგივე დღე აყარა, თუმცა მანამდე კიდევ ერთი გდება აუღო. არადა, მინკოუ ბევრად გამოცდილია, თუმცა ნაგლიაშვილი მოგების გარდა სხვას არაფერს დაგიდევდათ.

მან ნახევარფინალში კიდევ ერთი იპონი მიითვალა ყაზახ კაირატ აგიბაევთან, თუმცა მეტის გაკეთება ვეღარ შეძლო, ოქროსკენ მიმავალ გზაზე იმდენად ძლიერი კონკურენტი გადაეღობა: ქვედა წონიდან ამონაცვლებული იაპონელი, მსოფლიოს ორგზის ჩემპიონი და ოლიმპიური მედალოსანი ნაოჰისა ტაკატო, ვისთანაც ჩვენებურმა ვეღარ "ინაგლა". თუმცა კი ბევრიც არაფერი დაუთმო, ერთადერთი გდება გაუშვა და ვაზარით დამარცხდა.

სამწუხაროდ, ჩვენი გუნდის სხვა წევრები წარუმატებლად გამოვიდნენ. ეტყობა, ახალ წონაში გადასული ორი ნიჭიერი ახალგაზრდა - თანატოლებში ევროპისა და მსოფლიოს ბრინჯაოს მედალოსანი ტატო გრიგალაშვილი (81) და ევროპის ფინალისტი ლუკა მაისურაძე (90) ჯერ კიდევ ადაპტაციას გადიან, რადგან პირველმა მხოლოდ ერთი შეხვედრა მოიგო, მეორემ კი პირველივე პაექრობა დათმო.

ძალიან დასანანი მარცხი იწვნია ახალგაზრდებში მსოფლიოს ჩემპიონმა ჯაბა პაპინაშვილმა (60) - ბელარუს კონრად შოკასა და ბელგიელ ნაოფალ ეზ ზერადთან გამარჯვებების შემდეგ ჰოლანდიელ როი კოფიხბერგთანაც იგებდა, მაგრამ უფრო გამოუცდელობით წააგო.

დასანანია ნიჭიერი ახალგაზრდის - ზაურ კენჭაძის (100) წარუმატებლობაც. ესპანელ პედრო პატინო ხიმენესთან წარმატების შემდეგ ბელარუსთა მომავალ ჩემპიონ მიკიტა სვირიდთან წააგო.

პრაღაში ჩვენგან ასევე გამოდიოდნენ ზურაბ კახნიაშვილი (60), ბაგრატ ნინიაშვილი (66), ალეკო მამიაშვილი (73), ტრისტან მოსახლიშვილი (81) და იმედა გოგოლაძე (100), თუმცა წარუმატებლად იჭიდავეს.

ყოველდღიური სპორტული გაზეთი "ლელო"
477
მკითხველის კომენტარები / 0 /
მსგავსი ამბები
რუბრიკის სხვა სიახლეები