ძიუდო. ინტერვიუ გია თენაძესთან: ასე კი არაფერი გამოვა და ყოველთვის მსგავს შედეგს მივიღებთ

თბილისის გრან პრი განსაკუთრებით მნიშვნელოვანი საქართველოს ქალ ძიუდოისტთა ნაკრებისთვის იყო.

მწვრთნელს ამ ტურნირის მიხედვით უნდა გადაეწყვიტა, ვინ გააგრძელებს ასპარეზობას ქალთა ნაკრებში და ვინ დაუბრუნდება ახალგაზრდულ გუნდს. როგორ აფასებს გრან პრის და რა გეგმები აქვს ქართულ ქალთა ძიუდოს, ამაზე ნაკრების მთავარი მწვრთნელი გია თენაძე გვესაუბრება...

- ვიცით, რომ ამ ტურნირს დიდ მნიშვნელობას ანიჭებდით სამომავლო სტრატეგიის განსაზღვრის თვალსაზრისით... როგორ აფასებთ თქვენი შეგირდების გამოსვლას?

- მარიამ ჭანტურია უკვე შემოიჭრა ძიუდოს სამყაროში, რადგან ასეთ ასაკში შეუძლებელი შეძლო და დროის მოკლე მონაკვეთში ბრინჯაოს მედალი მოიპოვა. ის შარშან გადმოვიდა ჭაბუკებიდან, თუმცა ჯერ ახალგაზრდული ნაკრებიც არ გაუვლია.

მარიამმა თან წონა შეიცვალა, რასთან შეგუებასაც ერთი სეზონი მაინც სჭირდება, ჭანტურიამ კი რამდენიმე თვეში შეძლო ახალ წონაში ადაპტირება და მედალიც მოიპოვა, რაც ჩვენთვისაც სასიხარულოა და მისი თანაგუნდელებისთვისაც დიდი სტიმული იქნება.

როცა შრომა გიფასდება და შედეგი გაქვს, სხვანაირად მუშაობ. ვფიქრობ, ჭანტურია სულ მალე ლიდერებში იქნება.

- მედლების მოპოვების შანსი სხვებსაც ჰქონდათ?

- მედლის მოპოვების რეალური შანსი კიდევ ორ წონით კატეგორიაში გვქონდა. არ ვლაპარაკობ ოქროს მედალზე - ეს მართლაც არარეალური იქნებოდა, მაგრამ სხვა სინჯის მედლების მოპოვება შეგვეძლო.

52 კილოგრამში მარიამ ჯანაშვილს ბრინჯაოს მოპოვება თავისუფლად შეეძლო, თუმცა კონცენტრირება ვეღარ მოახდინა, ვერ განეწყო მოსაგებად. თან მეტოქეც უხერხული შეხვდა - ტაჯიკი გულბადამ ბაბამურატოვა ძიუდოში მსოფლიო პირველობაზე მეხუთეზე გავიდა, სამბოში კი მოქმედი მსოფლიოს ჩემპიონია.

ნამდვილად არაა ხელწამოსაკრავი მეტოქე, მაგრამ მობილიზების შემთხვევაში, მარიამს მასთან მოგება თავისუფლად შეეძლო.

წილისყრიდან გამომდინარე, მზია ბებოშვილსაც 63-ში ასევე ჰქონდა კვარცხლბეკზე ასვლის რეალური შანსი. ორ შიდოს იგებდა კიდეც პოვესანასთან, მაგრამ ერთი პატარა შეცდომა საბედისწეროდ ექცა. ბრიტანელმა მერე ბრინჯაო მოიპოვა ანუ ჩვენც გვქონდა იგივე შანსი.

- შევაფასოთ სხვების ჭიდაობაც...

- ვფიქრობ, თავისი მონაცემებიდან გამომდინარე, ნინო ოძელაშვილსაც შეუძლია 78 კილოგრამში წარმატებების მოპოვება, მაგრამ ამისთვის ძალიან დიდი შრომა სჭირდება და თან შრომა - აუცილებლად ძიუდოში, თორემ დღეს ის სამბოში გამოდის, ასე კი არაფერი გამოვა და ყოველთვის მსგავს შედეგს მივიღებთ.

როგორც ვატყობ, მას სიმპათია უფრო სამბოსკენ აქვს. რაც შეეხება ელენე ქებაძეს, მისი ბუნებრივი სტილი სამბოსია. მე რომ მკითხოს ვინმემ, ვეტყოდი, რომ მან სამბოს მიაქციოს ყურადღება. ძიუდოში მას ბევრად უფრო გაუჭირდება, ვიდრე, მაგალითად - ოძელაშვილს.

სოფიო სომხიშვილი ასაკით ჯერ პატარაა. თუმცა მასაც მიჰყავდა შეხვედრა ფრანგთა მომავალ მესამეპრიზიორ ანა მ"ბაიროსთან, მაგრამ გამოუცდელობით შეცდა

- ფეხი დაუდგა ისე, როგორც არ უნდა დაედგა და წააგო. ის ამ შეცდომებს ნელ-ნელა გამოასწორებს. მისგანაც დიდ წარმატებას ველოდებით.

თბილისში რამდენიმე ახალგაზრდაც გამოვიყვანეთ გამოცდილების მისაღებად, რადგან არანაირი ხარჯი არ გვიჯდებოდა. იქნებ, ქომაგს არ მოეწონა მათი სუსტი გამოსვლა, მაგრამ ჩვენ ვფიქრობთ, ამ ახალგაზრდებისთვის კარგი სტიმულის მიმცემი იქნებოდა აქ ჭიდაობა და ამიტომ შევიყვანეთ გუნდში.

- სამომავლოდ რა გიჩვენათ ამ ტურნირმა, როგორ დაალაგეთ გეგმები - ისინი რომელ ასაკში გააგრძელებენ გამოსვლას, უფროსებსა თუ ახალგაზრდებში?

- ბევრისთვის ჯერ ცოტა ადრეა, ევროპის წლევანდელ პირველობაზე რომ ვაჭიდაოთ. ჯერ პატარები არიან უფროსებთან საპაექროდ. თან ჭანტურიას თბილისის გრან პრიზე მიღებული ტრავმაც მოსაშუშებელი აქვს. ჯერ დაველოდოთ მათ ამ სეზონის ბოლომდე და მერე ჩავრთოთ უფროსებში. თან, ახალგაზრდული ტურნირებიც აქვთ საჭიდაო.

ამიტომ წლეულს ევროპის პირველობაზე ორი გოგონას წაყვანას ვფიქრობ - მარიამ ჯანაშვილის და მზია ბებოშვილისას. ორშაბათს ეს საკითხი ძიუდოს ფედერაციის პრეზიდენტ დავით ქევხიშვილთანაც შევათანხმე. აღმოჩნდა, რომ ისიც ამავეს ფიქრობდა.

ევროპის ჩემპიონატისთვის ისინი უკეთეს ფორმაში იქნებიან, რადგან ამ ტურნირისთვის მოსამზადებელ ციკლში ვირუსებმა შეგვიშალეს ხელი.

თუმცა ევროპის გუნდურ პირველობაზე, რომელიც მოგვიანებით - ზაფხულში ტარდება, ჭანტურიაც იჭიდავებს და სომხიშვილიც. მათ დასახმარებლად ჯანაშვილის ან ბებოშვილის წაყვანაც შეიძლება, მაგრამ ვნახოთ.

- ქალთა ნაკრების უახლოესი გეგმები როგორია?

- ის ექვსი ძიუდოისტი, რომლებიც თავდაპირველად სალიცენზიო შეჯიბრებებისთვის შევარჩიეთ, ამ კვირის ბოლოს ანთალიაში გაემგზავრება, სადაც მორიგი დიდი ტურნირი ტარდება.

თუმცა ისინი შეჯიბრებაში არ გამოვლენ, მხოლოდ ერთობლივ შეკრებაში მიიღებენ მონაწილეობას. ესენია ნატალია ყიფშიძე (48), ჯანაშვილი, ეთერ ლიპარტელიანი (57), ბებოშვილი, ჭანტურია და სომხიშვილი.

ამათგან ჯანაშვილის გარდა, ყველას უწევს ახალგაზრდებში გამოსვლა. გვინდა, ისინი ლიტვაში გამოვიყვანოთ ევროპის ახალგაზრდულ თასზე. ევროპის ჩემპიონატამდე გვინდა, კიდევ ერთი სტარტი მივცეთ ან შეკრება მოვუწყოთ.

კონტინენტის პირველობამდე ერთი სტარტი ნამდვილად გვჭირდება, რადგან უფროსებში გამოსვლა სხვაა, ახალგაზრდებთან კი სულ სხვა სტილია.

ჭაბუკები ამ თვის ბოლოს ჩეხეთში გამოვლენ, სადაც ასევე ხუთი გოგონაა გამოკვეთილი. დღეს ჩავლილი ეტაპია ის დრო, როცა შეკრებები არ გვქონდა და ტურნირზე წასვლა გვენატრებოდა.

ფედერაცია ყველანაირად ცდილობს ჩვენს დახმარებას და ამის დამსახურებაა ჭანტურიას ეს მედალიც და ის შედეგებიც, რასაც ჩვენი გოგონები ბოლო პერიოდში აღწევენ.

ყოველდღიური სპორტული გაზეთი "ლელო"
826
მკითხველის კომენტარები / 0 /
მსგავსი ამბები
რუბრიკის სხვა სიახლეები