[ძიუდო] კორონავირუსი თბილისის ტურნირსაც უტევს. ძიუდოისტთა „დიდ პრიზს“ საფრთხე ემუქრება

სამწუხაროდ, ახალი კორონავირუსი მსოფლიოსთვის დღითიდღე უფრო და უფრო მოუთოკავი უბედურება ხდება, ხოლო ორმაგად სამწუხაროა, რომ მისი მასშტაბები საქართველოშიც თანდათან იზრდება. მსოფლიოს სხვა ქვეყნებისგან განსხვავებით, ჯერჯერობით ჩვენთან სპორტული ღონისძიებები ისე მასობრივად არ გაუქმებულა, თუმცა უკვე დაიწყო საუბარი იმაზე, რომ მან, შესაძლოა, საფრთხე შეუქმნას საქართველოში გასამართავ ერთ-ერთ ყველაზე მასშტაბურ ღონისძიებას - ძიუდოს „დიდ პრიზს“, რომელიც თბილისის სპორტის ოლიმპიურ სასახლეში 27-29 მარტს უნდა ჩატარდეს.

დიახ, ეს ვადები ჯერ ისევ ძალაშია, თუმცა არაა გამორიცხული, ეს ტურნირი მოგვიანებით გადაიტანონ ან სულაც გაუქმდეს. ახლა ჯერი ქვეყნის ხელისუფლებაზეა, რომელიც საბოლოო გადაწყვეტილებას უახლოეს ორ-სამ დღეში მიიღებს.

ერთ-ერთ ალტერნატივად ისიც განიხილება, რომ შეჯიბრება მაყურებელთა გარეშე ჩატარდეს; სამაგიეროდ, გაურკვეველია ეგრეთ წოდებული მაღალი რისკის მქონე ქვეყნების მონაწილეობის საკითხია ანუ იმ გუნდების დაშვება-არდაშვება, სადაც კორონავირუსმა ეპიდემიური აფეთქების მასშტაბები მიიღო. არადა, ტურნირში უკვე დარეგისტრირებულია 89 ქვეყანა, მათ შორის კი ასეთი ეპიდაფეთქების ჯგუფში შემავალი სამხრეთ კორეა, იტალია და თვით მსოფლიოს ამ ახალი თავსატეხის სამშობლო ჩინეთიც არიან. ისე, ადრე იტალიელები დიდად არ იკლავდნენ ჩვენთან ჩამოსვლით თავს, ახლა კი 21 მონაწილე ჰყავთ დარეგისტრირებული. თუმცა აპენინელები პერიოდულად მაინც ჩამოდიოდნენ, აი, ჩინელები კი მათზე უფრო იშვიათად გვსტუმრობდნენ. მათ ამჯერად 13 მონაწილე ჰყავთ განაცხადში.

სავარაუდოდ, ჩვენი ტურნირისადმი ასეთი მაღალი ინტერესი იმითაა გამოწვეული, რომ გაუქმდა ერთი მნიშვნელოვანი ტურნირი - რაბათის „დიდი პრიზი“, მომავალში კი მის ბედს რამდენი გაიზიარებს, კაცმა არ იცის. თუმცა უახლოეს უქმეებზე - 13-15 მარტს დანიშნული ეკატერინბურგის „დიდი მუზარადი“ ნამდვილად ტარდება და იქ ჩვენი ნაკრებიც იასპარეზებს, რუსებმა ვირუსის საფრთხიდან გამომდინარე,  რაღაც ახალი აკრძალვები თუ არ დააწესეს. ისე კი თავიდან მთელი რიგი სამედიცინო გამოკვლევის შედეგები და სხვა რამ საბუთები მოუთხოვიათ, რაც მოგვიანებით გაუუქმებიათ.

369
მკითხველის კომენტარები / 0 /
მსგავსი ამბები
რუბრიკის სხვა სიახლეები
;