ძიუდო. კორონავირუსმა თბილისის გრანპრიც შეიწირა

სამწუხაროდ, ძიუდოს ქომაგთა შიში გამართლდა და 27-29 მარტს თბილისში გასამართავი ძიუდოისტთა "დიდი პრიზი" საბოლოოდ ჩაიშალა. თუმცა მისი ჩატარება აქამდე თუ ქვეყნის ხელისუფლების ნება-სურვილზე იყო დამოკიდებული, ახლა დირექტივა "ზემოდან" წამოვიდა - კორონავირუსის გავრცელების შიშით ძიუდოს საერთაშორისო ფედერაციამ გააუქმა მარტ-აპრილში მისი ეგიდით ჩასატარებელი ყველა შეჯიბრება როგორც უფროსებში, ასევე ასაკობრივ ნაკრებთა დონეზე. თანაც, გააუქმა არა მარტო მთავარი საერთაშორისო შეჯიბრებები - "დიდი პრიზები" და "დიდი მუზარადები", არამედ - ღია კონტინენტური თასებიც და ძიუდოს თასებიც. ამასთან, აკრძალვა ეხება უკლებლივ ყველა კონტინენტს და არა მხოლოდ ევრაზიას.

იმ შეჯიბრებებში, რომლებშიც ტოკიოს ოლიმპიადისთვის მოსამზადებლად და სალიცენზიო ქულების მოსაპოვებლად ჩვენი ეროვნული ნაკრები უნდა გამოსულიყო, აკრძალულთა სიაში მოხვდნენ არა მარტო ჩვენი ტურნირი, არამედ ამ უქმეებზე - 13-15 მარტს გასამართავი ეკატერინბურგის "დიდი მუზარადი" და ჩვენს შემდეგ დანიშნული ანტალიის "დიდი პრიზი". საერთაშორისო ფედერაციის ზემოაღნიშნულ გადაწყვეტილებაში ჯერჯერობით არაფერია ნათქვამი 1-3 მაისს პრაღაში ჩასატარებელ ევროპის ჩემპიონატზე, როგორც სხვა რეგიონალურ პირველობებზე.ა არადა, მათი უმეტესობა - აფრიკის, აზია-ოკეანისა და პან-ამერიკის ჩემპიონატები სწორედ აპრილშია დანიშნული, მხოლოდ ევროპისა უნდა გაიმართოს მაისში. სავარაუდოდ, მათ შესახებ გადაწყვეტილებას შესაბამისი რეგიონალური ფედერაციები მიიღებენ.

მაისში კიდევ ორი დიდი შეჯიბრება უნდა გაიმართოს, რომელშიც ჩვენებიც აპირებდნენ ასპარეზობას - 8-10 მაისს ბაქოს "დიდი მუზარადი" და 28-30 მაისს დოჰაში ჩასატარებელი "მსოფლიოს მასტერსი". ჯერჯერობით არც მათ ბედზეა არაფერი ცნობილი, რადგან ზემოხსენებული აკრძალვა მაისში ჩასატარებელ ტურნირებზე არ ვრცელდება, თუმცა იმავე განკარგულებაში მითითებულია, რომ მათი ბედი დიდწილად კორონავირუსის აქტივობაზე იქნება დამოკიდებული.
ჯერჯერობით არაფერია ცნობილი სალიცენზიო რეიტინგზე და ლიცენზიების გაცემაზე - ძიუდოში ლიცენზიები ხომ ამ შეჯიბრებებზე დაგროვებული ქულებით გამოითვლება.

ცნობილი მხოლოდ ისაა, რომ სალიცენზიო პერიოდი ერთი თვით გახანგრძლივდა - ის 30 მაისს, დოჰას მასტერსით უნდა დამთავრებულიყო, მაგრამ ახალი განკარგულებით, 30 ივნისს დამთავრდება. ამით სალიცენზიო სტატუსი მიიღო 12-14 ივნისს გასამართავმა ბუდაპეშტის "დიდმა პრიზმა" და 26-28-ში ჩინურ ჰოჰოტში ჩასატარებელმა "დიდმა პრიზმა", თუმცა ჩინეთში ჩასვლას ვინ გაბედავს, ეს კიდევ საკითხავია. ამასთან, ბუდაპეშტის ტურნირი "დიდ მუზარადად" გადაკეთდა, რადგან იქ უფრო მეტი ქულა გაიცემა. თუმცა კიდევ ვიმეორებთ - ამ ტურნირების ბედიც კორონავირუსის აქტივობაზეა დამოკიდებული. ამასთან, ქულათა განახევრება-განულების 1 და 2-წლიანი ციკლი უცვლელად დარჩება.

ტუნირების გაუქმება გასაგებია, თუმცა ჯერჯერობით არაფერია ნათქვამი, ისინი ამ ეტაპისთვის გაუქმდა თუ მოგვიანებით გაიმართება, თუმცა, სავარაუდოდ, საერთოდ გაუქმდა. ეს შეჯიბრებები სალიცენზიო ქულებს იძლევა, თავად ოლიმპიადა კი ივლისის ბოლოს უნდა ჩატარდეს (ისიც თუ არ გაუქმდა). იქამდე არც ისე დიდი დროა. თანაც, მთავარ ტურნირამდე წინარე ერთთვიანი მონაკვეთი ძირითადად ეგრეთ წოდებული მისაყვანი პერიოდია ანუ ათლეტები მაშინ უნდა გავიდნენ ფორმის პიკში, ამ დროს კი შეჯიბრებებში გამოსვლა არაა რეკომენდებული. აქედან გამომდინარე, ამ ტურნირთა ჩასატარებელი დრო კიდევ უფრო მცირდება.

სხვაგვარად რომ ვთქვათ, საერთაშორისო ფედერაციას აკრძალულ შეჯიბრებათა ჩასატარებლად დროც აღარ რჩება, ეს ყველაფერი კი გვაფიქრებინებს, რომ ისინი საერთოდ გაუქმდა, მაგრამ არაა გამორიცხული, ვირუსის ლოკალიზების შემთხვევაში ისინი კალენდარში თავისუფალ უქმეებზე ჩასვან - გუნდები ხომ ყველა შეჯიბრებაზე ისედაც არ გამოდიან და ასეთი სიმჭიდროვე მომზადებაში ხელს არ შეუშლით.

482
მკითხველის კომენტარები / 0 /
მსგავსი ამბები
რუბრიკის სხვა სიახლეები
;