ძიუდო. ლეგიონი: ორი ქართველი გერმანიის ვიცე-ჩემპიონია

გერმანიაში დამთავრდა ძიუდოს საკლუბო ჩემპიონატი, რომელმაც საბოლოო წარმატება ჰამბურგულ კლუბს მოუტანა, ქართველი ძიუდოისტები - ვაჟა მარგველაშვილი (66) და ვალერი ლიპარტელიანი (100) კი გერმანიის ვიცე-ჩემპიონები გახდნენ.

ჩვენებურთა კლუბი - "ესლინგენი" ლაიპციგში გამართულ ფინალურ პაექრობაში "ჰამბურგთან" 4:10 დამარცხდა. არადა, "ესლინგენში" საქართველოს ეროვნული ნაკრების წევრთა უმეტესობაა დასაქმებული, მაგრამ ამჯერად ამ ორის გარდა, არავინ დაუხმარებიათ, ისე კი კლუბში ირიცხებიან ამირან პაპინაშვილი (60), ლაშა გიუნაშვილი (66), ლაშა შავდათუაშვილი, ფრიდონ გიგანი (ორივე - 73), ლევან გუგავა, ნუგზარ ტატალაშვილი (81), ავთანდილ ჭრიკიშვილი (90) და ლევან მატიაშვილი (+100), ხოლო "მამლუქებიდან" აქვე გამოდიან ბეკირ ოზლუ (60, ბეთქილ შუკვანი) თურქეთიდან, რამაზ მუთოშვილი (73) უკრაინიდან, სანდრო მაქაცარია გერმანიიდან და ნიკოლოზ შერაზადიშვილი (ორივე - 81) ესპანეთიდან.

ბუნდესლიგის დასკვნითი - ფინალური ეტაპი ლაიპციგში გაიმართა, სადაც ნახევარფინალები და ფინალური პაექრობები ერთ დღეს ჩატარდა. იქ მონაწილეობის უფლება მასპინძელთა კლუბმა, "ჰამბურგმა", ერთ დროს ევროპული ძიუდოს ფლაგმანმა "აბენსბერგმა" და "ესლინგენმა" მოიპოვეს.

ნახევარფინალში "ესლინგენს" მასპინძლებთან მოუწიათ ფინალური საგზურისთვის ბრძოლამ. ბუნდესლიგაში ყველა წონაში ორ-ორი პაექრობა იმართება, თუმცა, რაღაც მოსაზრებებით, ჩვენებურთა მწვრთნელმა მარგველაშვილი ფინალისთვის შემოინახა და ლაიპციგელებთან საერთოდ არ უჭიდავებია, ლიპარტელიანი კი მხოლოდ პირველ შეხვედრაში დააყენა რენე კირსტენთან. არადა, დასვენება მას უფრო სჭირდებოდა. ასეა თუ ისე, გერმანელი კირსტენი ნამდვილად არაა ის დონე, ჩვენებურს მისი დამარცხება გაუჭირდეს და აკი, ლიპარტელიანმა ვადამდე მოიპოვა წმინდა გამარჯვება.

"ესლინგენმა" მასპინძლებს ტექნიკური ქულებით მოუგო. ურთიერთშეხვედრებში საყაიმო ანგარიში იყო: 7:7, მაგრამ ჩვენებურთა კლუბმა ქულებით 64:58 იმარჯვა და ფინალში გავიდა.

მეორე ნახევარფინალში "ჯუდო თიმ ჰამბურგერმა" შედარებით იოლად დაამარცხა გერმანიის რეკორდსმენი "აბენსბერგი": 9:5. აბენსბერგელთა შემადგენლობაში ამჯერად მხოლოდ ზებედა რეხვიაშვილი (81) გამოვიდა და წარმატებითაც გაისარჯა - თავისი წილი პაექრობა წმინდად მოუგო გერმანელ დომინიკ რესელს, ვინც ვაზარის შემდეგ მოახსნევინა, ბექა ღვინიაშვილს (90) კი ამჯერად არ უასპარეზია. აბენსბერგელთა შემადგენლობაში ორივე შეხვედრა ჩაატარა რუსთა ქართველმა ევროპის ჩემპიონმა რობერტ მშვიდობაძემ (60), მაგრამ ორივე პაექრობა დათმო.

ფინალში მწვრთნელებმა ლიპარტელიანთან ერთად მარგველაშვილიც დაიხმარეს, მაგრამ მხოლოდ პირველ შეხვედრაში აზერბაიჯანელთა მსოფლიოს პრიზიორ ნიჯატ შიხალიზადასთან, ვისაც დამაჯერებლად მოუგო.

სამაგიეროდ, ორჯერ იჭიდავა ლიპარტელიანმა, თუმცა მეორედ - მძიმე წონაში. თავდაპირველად 100-ში წარმატებით ეპაექრა ქვედა წონიდან ამოწეულ ჯულიენ აპელტს და მასთანაც ვადამდე მოიპოვა წმინდა გამარჯვება. ჩვენებური მეორე წრეშიც მაგრად დაუდგა გერმანელთა ოლიმპიურსა და მსოფლიოს ორგზის მესამე პრიზიორ დმიტრი პეტერსს, მაგრამ ძალა აღმართს ხნავს და ვაზარით მაინც წააგო.

"ჰამბურგერმა", რომლის შემადგენლობაშიც ლუხუმ ჩხვიმიანი (60) და გერმანიის სახელით მოჭიდავე ვინმე ირაკლი ჩაჩავაც (90) ირიცხებიან, 10:4 მოიგო. როგორც ვხედავთ, ესლინგენელთა 4 მოგებიდან ორი ჩვენების ანგარიშზეა.

"ჰამბურგმა" და "ესლინგენმა" მოიპოვეს ევროპის საკლუბო ჩემპიონატში გამოსვლის უფლება, რომელიც 25 ნოემბერს ვუპერტალში ჩატარდება.

ყოველდღიური სპორტული გაზეთი "ლელო"
1061
მკითხველის კომენტარები / 0 /
მსგავსი ამბები
რუბრიკის სხვა სიახლეები