[ძიუდო] მასტერსზე ჭრიკიშვილი ბექაურმა შეცვალა

ბუნებრივია, ოსაკას „დიდმა მუზარადმა“ მართლაც შეიტანა ცვლილებები ძიუდოისტთა მსოფლიოს რეიტინგში, რაც მსოფლიოს მასტერსზე მოსახვედრ ზონასაც შეეხო. თანაც, ეს ცვლილებები ჩვენც შეგვეხო, თუმცა მონაწილე არ დაგვკლებია, მხოლოდ 90 კილოგრამში შეიცვალა კონკრეტული კადრი.

შეგახსენებთ, რომ მსოფლიოს მასტერსი 12-14 დეკემბერს ჩინურ ქინგდაოში ტარდება, იქ მონაწილეობის უფლება კი წლეულს პირველად ეძლევა არა მსოფლიოს რეიტინგის 16 მოწინავე ძიუდოისტს, არამედ - 36-ს. ოღონდ ეს კია, რომ გადანაცვლება აიკრძალა და სათადარიგო სია აღარ იარსებებს - ვინც არაა 36-ს შორის, მას მონაწილეობის არანაირი შანსი არა აქვს.

ჩვენგან მასტერსზე გამოსვლა განაღდებული ჰქონდა 16 სპორტსმენს - 15 ვაჟს და 1 ქალს. ეს რაოდენობა დღესაც უცვლელია, ოღონდ 90 კილოგრამში გადანაცვლება მოხდა - ოსაკაში მარცხის შემდეგ რეიტინგში უკან დაიხია და 39-ე ადგილამდე ჩაინაცვლა ევროპის სამგზის და მსოფლიოს ჩემპიონმა ავთანდილ ჭრიკიშვილმა. სამაგიეროდ, ჯერ კიდევ ოსაკას ტურნირამდე შეაღწია სამასტერსე ზონაში ახალგაზრდებში ევროპისა და მსოფლიოს ჩემპიონმა ლაშა ბექაურმა. მას ახალგაზრდულ მსოფლიოზე მოპოვებული ქულებიც ეთვლება რეიტინგში, სადღეისოდ კი ზუსტად 36-ე ადგილზეა.

თუმცა ახლავე გადაჭრით შეიძლება იმის თქმა, რომ ქინგდაოში მასტერსის „ქართული ლეგიონი“ სრული შემადგენლობით არ იასპარეზებს და ყველა არ გამოვა, ვინც კი ჩვენგან 36 კაცში ხვდება. ასე მაგალითად, გადაწყვეტილია, რომ არ იჭიდავებს საქართველოს მოქმედი ჩემპიონი თემურ ნოზაძე (60), ვინც დეკემბრის ბოლოს გასამართავი ქვეყნის წლევანდელი პირველობისთვის ემზადება. დიდი ალბათობით, ხელის ტრავმის გამო არც მსოფლიოს, ევროპისა და ევროპული თამაშების ჩემპიონი გურამ თუშიშვილი (+100) გამოვა, ვინც აღნიშნულ ტრავმას უნდა უმკურნალოს, თუმცა ეს საკითხი თურმე ჯერ კიდევ არაა საბოლოოდ გადაწყვეტილი - დაელოდებიან, მოირჩენს თუ ვერა მანამდე თუშიშვილი ხელს. შეიძლება, ასევე არ იასპარეზოს ევროპული თამაშებისა და მსოფლიოს მესამე პრიზიორმა ლუკა მაისურაძემ (81), ვინც 23-წლიანთა ნაკრებთან ერთად ემზადება, და ევროპის ჩემპიონმა, მსოფლიოს მედალოსანმა ამირან პაპინაშვილმა (60).

დასასრულს, შეგახსენებთ, რომ, ზემოაღნიშნულთა გარდა, მსოფლიოს რეიტინგის 36-კაციან სიაში შედიან ევროპისა და მსოფლიოს ჩემპიონი ლუხუმ ჩხვიმიანი 60), ევროპის ჩემპიონი, მსოფლიოს ბრინჯაოს მედალოსანი ვაჟა მარგველაშვილი, ევროპული თამაშების მესამე პრიზიორი ბაგრატ ნინიაშვილი (ორივე - 66), ოლიმპიური და ევროპის ჩემპიონი ლაშა შავდათუაშვილი (73), ახალგაზრდებში ევროპის ჩემპიონი და მსოფლიოს წლევანდელი ბრინჯაოს მედალოსანი ტატო გრიგალაშვილი (81), ევროპის მესამე პრიზიორი და ოსაკას ტურნირის მომგები ბექა ღვინიაშვილი, საქართველოს ჩემპიონი გიორგი პაპუნაშვილი (ორივე - 90), ოლიმპიადის ვიცე-ჩემპიონი, ევროპის სამგზის ჩემპიონი და მსოფლიოს სამგზის ფინალისტი ვალერი ლიპარტელიანი (100), ევროპის ბრინჯაოს მედალოსანი ლევან მატიაშვილი, ახალგაზრდებში ევროპისა და მსოფლიოს ჩემპიონი გელა ზაალიშვილი (ორივე - +100) და ქალებში ახალგაზრდებში ასევე ევროპისა და მსოფლიოს მოქმედი გამარჯვებული ეთერ ლიპარტელიანი (57).

1248
მკითხველის კომენტარები / 0 /
რუბრიკის სხვა სიახლეები
;