ძიუდო: მებრძოლმა ბრინჯაოსთვის იბრძოლა

შარშანდლისგან განსხვავებით, წლეულს ძიუდოში ევროპის საკლუბო პირველობაში მხოლოდ ერთი გუნდით ვიყავით წარმოდგენილი: უმაღლეს, "ოქროს ლიგაში" მხოლოდ შინაგან საქმეთა სამინისტროს კლუბი "მებრძოლი" გამოვიდა, შარშან კი 3 გვყავდა, ხოლო სულ ლიგაში 8 გუნდი გამოდიოდა.

წლეულს არ გამოვიდნენ შარშანდელი გამარჯვებული "საგარეჯო სუპერსტარი" (ჩვენი ინფორმაციით, ის საერთოდ დაიშალა) და "შევარდენი", თუმცა დიდი წარმატებით ვერც "მებრძოლი" გამოვიდა, ბრინჯაოს დასჯერდა.

ჯგუფურ ეტაპზე ჩვენი კლუბი რუსულ "ნიუ სტირმთან" დამარცხდა: 1:4, სანუგეშოში კი ჩერნოგორიულ "აკადემიკას" "მშრალი" ანგარიშით, 5:0 მოუგო, ბრინჯაოსთვის პაექრობაში კი ფრანგულ "ძიუდოს" 3:2 აჯობა.

რუსებთან შეხვედრაში ჩვენებიდან მხოლოდ "საგარეჯოდან" გადაყვანილმა ბექა ღვინიაშვილმა (90) წმინდად იმარჯვა დმიტრი დოვგანთან პაექრობაში, ვაჟა მარგველაშვილი (66) კი აბდულა აბდულჟალილოვთან დამარცხდა, ფრიდონ გიგანი (73) - ოდბაიარ განბაატართან, ნუგზარ ტატალაშვილი (81) - ალან ხუბეცოვთან, ხოლო ადამ ოქრუაშვილმა (+90) ალექსანდრ მიხაილინთან წააგო.

ჩერნოგორიელებთან მარგველაშვილი ამირან პაპინაშვილმა შეცვალა და მარკო გუსიჩს ვაზარითაც მოუგო. შეიცვალა მონაწილეც 81-ში და იქაც წარმატებით: ზებედა რეხვიაშვილმა მსოფლიოს ფინალისტი სრდჯან მრვალჯევიჩი ვაზარით დაჯაბნა, დანარჩენ წონებში კი ისევ ძველი ფალავნები დადგნენ და სამივემ წმინდად მოიგო: გიგანმა - ნიკოლა გუსიჩთან, ღვინიაშვილმა - პრედრაგ სტანჩევიჩთან, ოქრუაშვილმა კი - ანტონ დუბრეტასთან.

ფრანგებთან შეხვედრაში შემადგენლობაში დაბრუნდა მარგველაშვილი და დავიდ ლაროსეს ვაზარითაც მოუგო. სამწუხაროდ, გიგანი იპონით დამარცხდა ჟულიენ ლა როკასთან (თუმცა ვაზარი კი აუღო) და ფრანგებმა საერთო ანგარიში გაათანაბრეს:

1:1. სამაგიეროდ, რეხვიაშვილმა ისევ დაგვაწინაურა, როცა კიდევ ერთხელ გვაჩვენა საფირმო ილეთად ქცეული მტკივნეული ნახტომი ქუენტინ ჟუბერთან: 2:1. ამჯერად სრულიად მოულოდნელად დამარცხდა ღვინიაშვილი, ვის მოგვერდსაც ჟულიან კერმარეკი მომზადებული დახვდა და კონტრშეტევით იპონზე ჩაატრიალა: 2:2 საერთო ანგარიში.

ამ კრიტიკულ ვითარებაში კიდევ ერთხელ გვიხსნა ოქრუაშვილმა, ვისაც მსგავს სიტუაციაში არაერთხელ მოუგია გადამწყვეტი პაექრობა. ამჯერადაც ასე მოიქცა და სედრიკ ოლივარი დააიპონა. საბოლოოდ 3:2 ჩვენების სასარგებლოდ და "მებრძოლი" ბრინჯაოს პრიზიორი გახდა, ტურნირი კი რუსთა ზეობით წარიმართა: ფინალში იქაურმა "იავარა-ნევამ" 4:1 აჯობა "ნიუ სტრიმს".

609
მკითხველის კომენტარები / 0 /
მსგავსი ამბები
რუბრიკის სხვა სიახლეები