ძიუდო. მეორე წერილი მსოფლიოს ფედერაციაში ნუგზარ ტატალაშვილთან დაკავშირებით

საქართველოს ძიუდოს ფედერაციამ მეორე წერილი გაგზავნა მსოფლიოს ფედერაციაში ევროპის ორგზის ფინალისტ ნუგზარ ტატალაშვილთან (81) დაკავშირებით, რადგან პირველზე აქამდე არ მოსვლიათ პასუხი.

შეგახსენებთ, რომ გორელ ფალავანს არაბთა გაერთიანებულ საამიროებში სურს გადასვლა და ჩასულიც იყო იქ, მაგრამ ჩვენი ფედერაცია წასვლის ნებას არ აძლევს.

ეს ინფორმაცია თავდაპირველად ჰოლანდიურმა პორტალმა გაავრცელა, რომელიც იუწყებოდა, რომ სპორტსმენს წასვლის ნება ქართულმა ფედერაციამ დართო და ამიტომ საერთაშორისოც დასტურს აძლევსო, მაგრამ ჩვენმა ფედერაციამ ეს ინფორმაცია მყისვე უარყო და მას ჭორი უწოდა, დასახმარებლად კი საერთაშორისო ფედერაციას მიმართა, საიდანაც ჯერ პასუხი არ მოსულა.

საქართველოს ძიუდოს ფედერაცია მსოფლიოს ფედერაციისგან მეორე საკითხზეც ელოდება გარკვეულ პასუხს - მისცემენ თუ არა უკრაინიდან გადმოყვანილ ტატიანა შუკვანს (52) სექტემბერში ბაქოში გასამართავ მსოფლიოს ჩემპიონატზე გამოსვლის ნებას? ეს საკითხი თითქოს პრობლემური არ უნდა გახდეს, რადგან უკრაინის ძიუდოს ფედერაციამ უკვე მისცა თავის აწ უკვე ყოფილ სპორტსმენს ტატიანა ლევიცკას საქართველოს სახელით გამოსვლის უფლება.

ახლა ჯერი საერთაშორისო ფედერაციაზეა, რომელმაც უნდა მისცეს დასტური სპორტსმენს მსოფლიოს ჩემპიონატზე გამოსასვლელად. შეგახსენებთ, რომ ლევიცკა თურქეთში გადასული ევროპის ფინალისტის - ბეთქილ შუკვანის მეუღლეა და იმის მიუხედავად, რომ ის თურქეთში ბეკირ ოზლუს სახელით გამოდის, ტატიანა შუკვანის გვარს ატარებს.

იმედია, საერთაშორისო ფედერაცია მის გადმოსვლას არ დაბლოკავს, რადგან ამაში არანაირი, არც ერთი მხარის წინააღმდეგობა არაა, ტატალაშვილის საქმე კი სხვაგვარადაა. როგორც გითხარით, მას ქართული ფედერაცია წასვლის ნებას არ აძლევს.

ყოველდღიური სპორტული გაზეთი "ლელო"
868
მკითხველის კომენტარები / 0 /
მსგავსი ამბები
რუბრიკის სხვა სიახლეები