ძიუდო. მსოფლიოს რეიტინგები. მყარად სამეულეში, - თუშიშვილი პლანეტის უძლიერესია

სულ მალე ჩვენს ძიუდოისტებს მორიგი სოლიდური შეჯიბრება - მსოფლიოს მასტერსი ელოდებათ, რომელიც ჩინეთში გაიმართება.

ალბათ, უპრიანია, გადავხედოთ მსოფლიოს რეიტინგს, რომელიც დიდწილად განსაზღვრავს ჩვენებურთა სავარაუდო მეტოქეებს წლის ამ უმნიშვნელოვანეს შეჯიბრებაზე.

წინასწარ გეტყვით, რომ ქალებში ისევ არაფერი გვაქვს დასათვლელი რეიტინგში, ვაჟებიდან კი 6 წონაში ლიდერებში ვართ და კვლავაც ერთში - 81-ში გვაქვს ჩავარდნა. იმ 6-ეულიდან 5-ში მყარად ვართ სამეულში, ხოლო ორში კვლავინდებურად ვლიდერობთ და თანაც - დამაჯერებლად.

კიდევ ერთხელ შეგახსენებთ, რომ რეიტინგში ორი წლის წინანდელი შედეგები საერთოდ უქმდება, ხოლო ერთი წლისა - ნახევრდება, რაც პერიოდულად გარკვეულ ცვლილებებს ავტომატურადაც იწვევს.

60 კგ.
ევროპის ჩემპიონი და მსოფლიოს ორგზის მესამე პრიზიორი ამირან პაპინაშვილი ამჟამად მესამე პოზიციაზეა, თუმცა კვლავაც გვარიანდ ჩამორჩება იაპონელ მსოფლიოს ჩემპიონთა დუეტს. თუმცა უახლოეს ორ თვეში ეს სხვაობა შემცირდება პაპინაშვილის სასარგებლოდ, რადგან განულება-განახევრებით იაპონელები ბლომად ქულებს დაკარგავენ, მას კი პარიზის ტურნირამდე არაფერი აკლდება.

ჩვენებურს კვალში უდგას რუსთა სახელით მოჭიდავე ევროპის ჩემპიონი რობერტ მშვიდობაძე, ჩვენი ფალავნებიდან კი მასტერსის ზონაში ლუხუმ ჩხვიმიანიც შედის. 100-ეულში შედის უმცროსი პაპინაშვილიც - ამირანის პატარა ძმა ჯაბა პაპინაშვილი (45-ე ადგილი).

1. რიუჯუ ნაგაიამა (იაპონია) - 6970
2. ნაოჰისა ტაკატო (იაპონია) - 5700
3. ამირან პაპინაშვილი (საქართველო) - 5018
4. რობერტ მშვიდობაძე (რუსეთი) - 4800
15. ლუხუმ ჩხვიმიანი (საქართველო) - 2667
45. ჯაბა პაპინაშვილი (საქართველო) - 856

66 კგ.
100-ეულში ბევრი მონაწილე ჯერჯერობით არც ამ წონაში გვყავს. სამაგიეროდ, ევროპის ჩემპიონი და მსოფლიოს ბრინჯაოს მედალოსანი ვაჟა მარგველაშვილი რეიტინგში მეორეა. მეექვსეა უკრაინელთა ქართველი ევროპისა და მსოფლიოს ჩემპიონი გიორგი ზანთარაია, ჩვენებიდან კი 100-ეულში ბაგრატ ნინიაშვილი და ლაშა გიუნაშვილიც შედიან. რეიტინგის ლიდერი კი, რაღა თქმა უნდა, ფენომენალური იაპონელი მსოფლიოს ჩემპიონი ჰიფუმი აბეა.

1. ჰიფუმი აბე (იაპონია) - 6800
2. ვაჟა მარგველაშვილი (საქართველო) - 5326
3. ტალ ფლიკერი (ისრაელი) - 4268
4. ბაულ ანი (კორეა) - 4250
5. ბარუხ შმაილოვი (ისრაელი) - 4063
45. ბაგრატ ნინიაშვილი (საქართველო) - 1133
55. ლაშა გიუნაშვილი (საქართველო) - 878

73 კგ.
ოლიმპიური და ევროპის ჩემპიონი ლაშა შავდათუაშვილი ასევე მეორეა, წონას კი აქაც იაპონელთა მსოფლიოს ჩემპიონი ლიდერობს - სოიჩი ჰაშიმოტო. თებერვალში ჩვენებური უფრო დაუახლოვდება მას, რადგან იაპონელი განულება-განახევრებით გვარიანად დაკარგავს ქულებს, ლაშას კი არაფერი დააკლდება. კონკურენციის თვალსაზრისით, დიდად სახარბიელოდ არც ამ წონაში გვაქვს საქმე - ჩვენგან მეორე ნომერი ფრიდონ გიგანი მხოლოდ 76-ეა, 100-ეულში კი სხვა მონაწილეს ნურც ვეძებთ.

1. სოიჩი ჰაშიმოტო (იაპონია) - 6440
2. ლაშა შავდათუაშვილი (საქართველო) - 5451
3. ჩანგრიმ ანი (კორეა) - 5380
4. ტომი მაკიასი (შვედეთი) - 4746
5. ოდბაიარ განბაატარი (მონღოლეთი) - 4445
76. ფრიდონ გიგანი (საქართველო) - 534

81 კგ.
რეიტინგში ყველაზე ცუდი ვითარება კვლავაც ამ წონაში გვაქვს - მოწინავე ხუთეულს ვინ დაეძებს, მასტერსის ზონაშიც ვერ შევდივართ, ჩვენგან საუკეთესო რეიტინგის მქონე ევროპის მედალოსანი ზებედა რეხვიაშვილი კი მხოლოდ 22-ეა. არადა, მძიმე წონასთან ერთად, 100-ეულში ყველაზე მეტი - 6 მონაწილე აქ გვყავს.

მასტერსზე აბორიგენი ქართველები თუ ვერა, სამაგიეროდ, "მამლუქები" ხვდებიან: თურქეთის სახელით მოჭიდავე მსოფლიოს პრიზიორი ვედატ ალბაირაქი და ანრი ეგუტიძე პორტუგალიიდან. ამასთან, ესაა ვაჟთა პირველი წონა, სადაც იაპონელი ვერ ლიდერობს.

1. საეიდ მოლაე (ირანი) - 6693
2. ფრანკ დე ვიტი (ჰოლანდია) - 4946
3. სოტარო ფუჯივარა (იაპონია) - 4285
4. ხასან ხალმურზაევი (რუსეთი) - 4160
5. ალან ხუბეცოვი (რუსეთი) - 3834
22. ზებედა რეხვიაშვილი (საქართველო) - 2099
33. თამაზ კირაკოზაშვილი (საქართველო) - 1561
42. ნუგზარ ტატალაშვილი (საქართველო) - 1171
71. ტატო გრიგალაშვილი (საქართველო) - 544
89. ლუკა მაისურაძე (საქართველო) - 406
99. კობა მჭედლიშვილი (საქართველო) - 344

90 კგ.
ამ წონას ქართველი კი უდგას სათავეში, ოღონდ - "მამლუქი": ესპანელთა მსოფლიოს ჩემპიონი ნიკოლოზ შერაზადიშვილი, ჩვენების რეიტინგი კი თანდათან უარესდება. თუმცა ბექა ღვინიაშვილის შემთხვევაში ეს გასაგებიცაა - მსოფლიოს ჩემპიონატის შემდეგ მენისკის ოპერაცია გაიკეთა და ჯერაც არ განუახლებია ვარჯიში. ის მოწინავეთა შორის მაინც რჩება და წინასწარი ინფორმაციით, მასტერსზეც შეიძლება გამოვიდეს, თუმცა ამაზე საბოლოო სიტყვა ჯერ კიდევ ექიმებმა უნდა თქვან, აი, 27-28 დეკემბერს საქართველოს ჩემპიონატზე კი ნამდვილად იქნება. რაც შეეხება მსოფლიოს პრიზიორ უშანგი მარგიანს, ის ინარჩუნებს ადრინდელ პოზიციებს.

1. ნიკოლოზ შერაზადიშვილი (ესპანეთი) - 5819
2. ალექსანდრ კუკოლი (სერბეთი) - 5088
3. კრისტიან ტოტი (უნგრეთი) - 4813
4. ივან ფელიპე სილვა მორალესი (კუბა) - 4255
5. დონჰან გვაკი (კორეა) - 4161
7. ბექა ღვინიაშვილი (საქართველო) - 3877
13. უშანგი მარგიანი (საქართველო) - 3165
44. ავთანდილ ჭრიკიშვილი (საქართველო) - 1016
60. ლაშა ბექაური (საქართველო) - 700
64. გიორგი პაპუნაშვილი (საქართველო) - 644

100 კგ.
აქ რეიტინგის ლიდერობას კვლავაც ინარჩუნებს ევროპის სამგზის ჩემპიონი, მსოფლიოს სამგზის და ოლიმპიადის ფინალისტი ვარლამ ლიპარტელიანი, თუმცა მას თანაგუნდელები საგრძნობლად ჩამორჩებიან. ლიპარტელიანი კიდევ კარგა ხანს იქნება რეიტინგის სათავეში, რადგან უახლოეს თვეებში მისი მდევრები გაცილებით მეტ ქულას დაკარგავენ, ხოლო მასტერსზე თავადაც თუ წარმატებით იჭიდავებს, მაშინ კიდევ უფრო "გაექცევა" კონკურენტებს.

1. ვარლამ ლიპარტელიანი (საქართველო) - 6558
2. მიხაელ კორელი (ჰოლანდია) - 5706
3. გუჰამ ჩო (კორეა) - 4896
4. პეტერ პალჩიკი (ისრაელი) - 4582
5. ჟორჟე ფონსეკა (პორტუგალია) - 3793
47. ონისე სანებლიძე (საქართველო) - 953
50. ლაშა ტაველური (საქართველო) - 850
89. ნემსაძე იასონ (საქართველო) - 324

+100 კგ.
რეიტინგს ამ წონაშიც ვლიდერობთ - მსოფლიოს ჩემპიონი გურამ თუშიშვილი გვარიანად უსწრებს კონკურენტებს, ხოლო მასტერსზეც თუ წარმატებით იჭიდავებს, კიდევ დიდხანს იქნება ცხრილის სათავეში. არადა, ქულების განულება-განახევრებით არც მას აკლდება ბევრი და არც მის მდევრებს.
სამწუხაროდ, ამ წონაში ჩვენი სხვა მონაწილეები თანდათან შორდებიან ლიდერებს და მასტერსზე გამოსვლაც სხვას არავის "ემუქრება".

1. გურამ თუშიშვილი (საქართველო) - 7202
2. ლუკაშ კრპალეკი (ჩეხეთი) - 5221
3. დუურენბაიარ ულზიბაიარი (მონღოლეთი) - 3928
4. დავიდ მოურა (ბრაზილია) - 3778
5. კოკორო კაგეურა (იაპონია) - 3200
37. ადამ ოქრუაშვილი (საქართველო) - 1228
43. ლევან მატიაშვილი (საქართველო) - 1089
55. გელა ზაალიშვილი (საქართველო) - 756
56. ონისე ბუღაძე (საქართველო) - 750
82. გიორგი ქავთარაძე (საქართველო) – 364

ყოველდღიური სპორტული გაზეთი "ლელო"
2545
მკითხველის კომენტარები / 1 /
777
0
ჭრიკიშვილს რა დაემართა ვინმემ თუ იცის დაწერეთ რა. ძალიან მაგარი იყო ყოველთვის
მსგავსი ამბები
რუბრიკის სხვა სიახლეები
;