ძიუდო. მსოფლიოს რეიტინგი უკვე ცნობილია 

ძიუდოისტთა მსოფლიოს ჩემპიონატი სტარტს 25 აგვისტოს ტოკიოში აიღებს. მანამდე მსოფლოს რეიტინგში აღარაფერი შეიცვლება და უკვე ვიცით, განთესილთაგან ვინ იქნებიან ჩვენი ფალავნების მეტოქეები.

უფრო სწორად, ჩვენებურთა შესაძლო მეტოქეები ვინ იქნებიან დასკვნით სტადიებზე, რადგან 7 წონიდან 6-ში მოწინავეთა შორის - ხუთეულში ვართ. ერთადერთი წონითი კატეგორია, სადაც განთესილ რვა კაცში ვერ შევდივართ, 81 კილოგრამია.

ვაჟებში მსოფლიოს რეიტინგში 7 წონიდან 5-ს ქართველები ლიდერობენ. აქედან ორი უცხო ქვეყნის ღირსებას იცავს - ევროპის ჩემპიონი და მსოფლიოს ფინალისტი რობერტ მშვიდობაძე (60) რუსეთის სახელით გამოდის, ხოლო მსოფლიოს ჩემპიონი ნიკოლოზ შერაზადიშვილი (81) - ესპანეთის.

„აბორიგენთაგან“ თავიან წონებს ლიდერობენ ევროპის ჩემპიონი, მსოფლიოს მედალოსანი ვაჟა მარგველაშვილი (66), ევროპის სამგზის ჩემპიონი, მსოფლიოს სამგზის და ოლიმპიადის ფინალისტი ვალერი ლიპარტელიანი (100) და მსოფლიოს, ევროპისა და ევროპული თამაშების ჩემპიონი გურამ თუშიშვილი (+100). 

60 კგ. 
ამ წონაში ტოკიოში ორი მონაწილე გვყავს: ევროპული თამაშების ჩემპიონი ლუხუმ ჩხვიმიანი და ევროპის ჩემპიონი, მსოფლიოს ორგზის მესამე პრიზიორი ამირან პაპინაშვილი. ამათგან განთესილ რვა კაცში მხოლოდ პაპინაშვილი შედის, ჩხვიმიანი მეცხრეა და განუთესავი იქნება. 

პაპინაშვილი რეიტინგში მესამეა, ანუ მეოთხედფინალში განთესილთაგან მისი პოტენციური მეტოქე მონღოლთა მსოფლიოს ფინალისტი ამარტუვშინ დაშდავაა, ხოლო მას მოუწევს, ნახევარფინალში იაპონელთა მსოფლიოს სამგზის ჩემპიონსა და ოლიმპიურ პრიზიორ ნაოჰისა ტაკატოსა და უზბეკ შარაფუდდინ ლუტფილაევს შორის მოგებულთან შეხვედრა. 

პაპინაშვილს დაშდავაასთან პაექრობის დიდი გამოცდილება აქვს - ერთმანეთს 8-ჯერ შეხვდნენ და პაპინაშვილმა 6-ჯერ მოუგო. მათ შორის - ბოლო სამი ორთაბრძოლაც. სამაგიეროდ, ჩვენებურს ტაკატოსტან აქვს მკვეთრად უარყოფითი ბალანსი - 4-დან მხოლოდ ერთი შეხვედრა მოუგო და ისიც - რიო დე ჟანეიროს ოლიმპიადის მეოთხედფინალში, თუმცა საბოლოოდ ტაკატო მესამეზე გავიდა, ჩვენებური კი - მეხუთეზე. პაპინაშვილს უზბეკთანაც უარყოფითი ბალანსი აქვს - სამი პაექრობიდან მხოლოდ ბოლო შეხვედრა მოუგო. 

1. რობერტ მშვიდობაძე (რუსეთი) - 6110 ქულა
2. ნაოჰისა ტაკატო (იაპონია) - 5550
3. ამირან პაპინაშვილი (საქართველო) - 5216
...9. ლუხუმ ჩხვიმიანი (საქართველო) - 3619

66 კგ.
ესეც მეორე წონა, რომელსაც ნაკრების სამწვრთნელო შტაბი ნოდარ მეტრეველის ხელმძღვანელობით აორებს. თუმცა განთესილებში მარგველაშვილი შედის, ვინც, როგორც გითხარით, ლიდერობს კიდეც მსოფლიოს რეიტინგს, ხოლო ევროპული თამაშების მესამე პრიზიორი ბაგრატ ნინიაშვილი განუთესავი იქნება.

მარგველაშვილის პოტენციური მეტოქე მეოთხედფინალში ბრაზილიელი დანიელ კარგნინია, ნახევარფინალში - მოლდოველ დენის ვიერუსა და ებრაელ ბარუხ შმაილოვს შორის მოგებული. მარგველაშვილს სამივესთან დადებითი ბალანსი აქვს: კარგნინს სამივე პაექრობა მოუგო, შმაილოვს - ორივე, ვიერუსთან კი ოთხიდან სამში იმარჯვა. 

ჩვენთვის უთუოდ კარგია ის გარემოება, რომ ამ წონაში იაპონელებს ორი მონაწილე ჰყავს - მსოფლიოს ორგზის ჩემპიონი ჰიფუმი აბე და ჯოშირო მარუიამა, თუმცა ისინი მარგველაშვილს ფინალამდე არ შეხვდებიან. 

1. ვაჟა მარგველაშვილი (საქართველო) - 5645
2. ჯოშირო მარუიამა (იაპონია) - 5095
3. ჰიფუმი აბე (იაპონია) - 4885
...23. ბაგრატ ნინიაშვილი (საქართველო) - 2195

73 კგ.
ოლიმპიური და ევროპის ჩემპიონი ლაშა შავდათუაშვილი რეიტინგში მეოთხეა, თუმცა მსოფლიოს ჩემპიონატზე მეორე ნომრად იქნება განთესილი. შავდათუაშვილი მეოთხედფინალში რეიტინგის მეცხრე ნომერს, მონღოლ ოდბაიარ განბაატარს შეხვდება, ვინც მსოფლიოს რეიტინგში მეშვიდეა.

არადა, იქნებ, ჯობდა, იმ ორსაც ეჭიდავათ და ჩვენებური მეოთხე ყოფილიყო - ამ შემთხვევაში შავდათუაშვილი მონღოლის ნაცვლად კანადელ არტურ მარგელიდონს ხვდებოდა, ვისაც ერთხელ შეხვდა და ისიც მოუგო. თანაც, მონღოლი კანადელზე ძლიერი გვგონია და ჩვენს ოლიმპიურ ჩემპიონს მასთან უარყოფითი ბალანსი აქვს - ოთხი პაექრობიდან მხოლოდ ერთში იმარჯვა, ბოლო შეხვედრაში შარშან, ჩინეთის მასტერსზე. 

1. რუსტამ ორუჯოვი (აზერბაიჯანი) - 6159
2. სოიჩი ჰაშიმოტო (იაპონია) - 5963
3. ჩანგრიმ ანი (კორეა) - 5680
4. ლაშა შავდათუაშვილი (საქართველო) - 5603

81 კგ. 
აქ განუთესავი ლუკა მაისურაძე გვეყოლება, ვინც რეიტინგში 29-ეა 1956 ქულით და შეუძლებელია სავარაუდო მეტოქეთა წინასწარ პროგნოზირება. მაისურაძეს ნებისმიერთან შეუძლია წარმატებით ჭიდაობა. ერთადერთი უხერხული მეტოქე ბელგიელი ევროპული თამაშების ჩემპიონი მატიას კასეა, ვისთანაც რატომღაც ვერ აწყობს ჭიდაობას. იმედია, ის, მინიმუმ, მეოთხედფინალამდე არ შეხვდება. 

1. საიდ მოლაი (ირანი) - 6179
2. საგი მუკი (ისრაელი) - 5695
3. ფრანკ დე ვიტი (ჰოლანდია) - 5190
...22. ტატო გრიგალაშვილი (საქართველო) - 2263
...29. ლუკა მაისურაძე (საქართველო) - 1956 

90 კგ.
ევროპის მესამე პრიზიორი ბექა ღვინიაშვილი რეიტინგის მეექვსე ნომრად ჩადის ტოკიოში და მეოთხედფინალში მესამე ნომერი, კუბელთა მსოფლიოს ფინალისტი ივან ფელიპე სილვა მორალესი ელოდება. მას თუ გასცდა, მერე უნგრელთა ასევე მსოფლიოს ფინალისტ კრისტიან ტოტსა და სერბთა ევროპის ჩემპიონ ალექსანდრ კუკოლის ჯგუფიდან გასულს შეხვდება. ღვინიაშვილისთვის მთავარი საფრთხე კუბელი გვგონია, ვისთანაც წლეულს ბუდაპეშტის „დიდ პრიზზე“ წააგო, თორემ სხვებთან შეგვიაძლია, მშვიდად ვიყოთ: სერბს ოთხი შეხვედრიდან ყველა მოუგო, ხოლო ტოტთან გამართული 8 პაექრობიდან მხოლოდ ერთხელ დამარცხდა და ისიც შორეულ 2014 წელს. 

ღვინიაშვილს ფინალამდე არ ხვდებიან შერაზადიშვილი და კორეელთა მსოფლიოს ჩემპიონი დონჰან გვაკი, თუმცა განუთესავთა შორისაც რამდენიმე სახიფათო მეტოქეა. მაგალითად, იაპონელი სოჩირო მუკაი, ჰოლანდიელი ნოელ ბვან ტ ენდი... იმედია, ამათგან ვინმე წინასწარ შეხვედრებში არ მოხვდება ჩვენებურთან, ხოლო რუსები არ აჭიდავებენ ევროპის ჩემპიონ მიხაილ იგოლნიკოვს - ისინი საერთოდ ტოვებენ ამ წონას. 

1. ნიკოლოზ შერაზადიშვილი (ესპანეთი) - 7415
2. კრისტიან ტოტი (უნგრეთი) - 5855
3. ივან ფელიპე სილვა მორალესი (კუბა) - 4945
...6. ბექა ღვინიაშვილი (საქართველო) - 4223

100 კგ.
ვალერი ლიპარტელიანი კარგა ხანია, რეიტინგის ლიდერია და კიდევ დიდხანს იქნება ასე. მით უფრო, ტოკიოშიც თუ წარმატებით იასპარეზა, რისი დიდი მოლოდინიც გვაქვს. მეტიც - მას ვაჟებში ყველა წონის ლიდერთა შორის ყველაზე მეტი ქულა აქვს.

მეოთხედფინალში მისი სავარაუდო მეტოქე ჯირკივით პორტუგალიელი ჟორჟე ფონსეკაა, ვისთანაც ლიპარტელიანს ერთი წაგება აქვს. თუმცა არ გვგონია, ეს საგანგაშო იყოს - მთავარია, თავად იჭიდავოს მაქსიმალურად კონცენტრირებულად. ნახევარფინალში ლიპარტელიანი ჰოლანდიელი მიხაელ კორელისა და მონღოლი ოტგონბაატარ ლხაგვასურენის ჯგუფზე გადის, მათ კი აქამდე მუდამ მუსრს ავლებდა - ორივეს ოთხ-ოთხჯერ შეხვდა და ყველა მოუგო!

1. ვალერი ლიპარტელიანი (საქართველო) - 7637
2. გუჰამ ჩო (კორეა) - 5898
3. პეტერ პალჩიკი (ისრაელი) - 4988

+100 კგ. 
გურამ თუშიშვილიც რეიტინგის ლიდერია და ტოკიოში მსოფლიოს ჩემპიონის ტიტულის დასაცავად ჩადის, ამ ბრძოლაში კი მისი მთავარი კონკურენტი იაპონელთა ოლიმპიადის ვიცე-ჩემპიონი და მსოფლიოს მესამე პრიზიორი ჰისაიოში ჰარასავა გვგონია, რადგან წინასწარი მონაცემებით, მსოფლიოს ამ ჩემპიონატსაც გამოტოვებს დაუმარცხებელი ფრანგი, ორგზის ოლიმპიური, მსოფლიოს 10-გზის და ევროპის 5-გზის ჩემპიონი ტედი რინერი. 

ჰარასავასთან თუშიშვილის გზა ნახევარფინალში იკვეთება. თუმცა იქამდე ჩვენებურმა ჰოლანდიელი ევროპის მესამე პრიზიორი როი მეირი უნდა დაამარცხოს, იაპონელმა კი - ბრაზილიელი მსოფლიოს ფინალისტი და ოლიმპიადის ორგზის ბრინჯაოს მედალოსანი რაფაელ სილვა. არც ერთს არ ელოდება იოლი ამოცანა, თუშიშვილს კი სამიდან სამივე პაექრობაში ჰყავს დანამარცხები მეიერი. სილვასთანაც ასევე სამივე პაექრობა აქვს მონაგები, ჰარასავას კი ჯერ არ შეხვედრია. 

1. გურამ თუშიშვილი (საქართველო) - 6876
2; ლუკაშ კრპალეკი (ჩეხეთი) - 4397
3. დავიდ მოურა (ბრაზილია) - 4332

52 კგ.
ქალთა ტურნირში მხოლოდ ერთი მონაწილე გვეყოლება - ტატიანა ლევიცკა-შუკვანი, ვინც განთესილებში არაა და აქაც მთლიანად წილისყრაზე ვართ დამოკიდებული. ჩვენებური 856 ქულით 49-ე ადგილზეა. 

ყოველდღიური სპორტული გაზეთი "ლელო"
2714
მკითხველის კომენტარები / 0 /
მსგავსი ამბები
რუბრიკის სხვა სიახლეები
;