ძიუდო. ნაკრების მწვრთნელი მინდია ბოდაველი: ჭრიკიშვილისა და ღვინიაშვილის ერთი შეხვედრით საუკეთესოს ვერ გამოავლენ!

ქართული ძიუდო მორიგი სკანდალის ზღვარზეა - მოგეხსენებათ, რომ ევროპის სამგზის და მსოფლიოს ჩემპიონი ავთანდილ ჭრიკიშვილი საწვრთნელო შტაბს მიკერძოებაში ადანაშაულებს და ამბობს, რომ დაუმსახურებლად უკეტავენ გზას მსოფლიოს ჩემპიონატისკენ. თუმცა, კაცმა რომ თქვას, ეს ჯერ კიდევ ჩაუმქრალი, ოდნავ მინავლებული წინა სკანდალის გაღვივება უფროა, და დღესავით ნათელია, რომ "ავგიას თავლად" ქცეულ ქართულ ძიუდოს დამშვიდება კარგა ხანს არ უწერია, რადგან ჰორიზონტზე ჯერაც არ უჩანს არც მითიური ჰერაკლე და არც - ჩვეულებრივი.

ჭრიკიშვილი ზემოაღნიშნულ განცხადებაში თანაგუნდელ ბექა ღვინიაშვილს დაუპირისპირდა, რადგან მწვრთნელებს მისი ლობირება დააბრალა. ეს კონფლიქტს ახალი, გაცილებით არასასურველი მიმართულებით გაღვივებას უქადის, რადგან აქამდე ჩვენი გუნდი შესაშური ერთსულოვნებით გამოირჩეოდა და სამაგალითო მეგობრული კოლექტივი იყო.

მოგეხსენებათ, ნაკრებს ჯერჯერობით მთავარი მწვრთნელი არ ჰყავს, სამწვრთნელო შტაბში კი ხუთი მწვრთნელია: გურამ მოდებაძე, ამირან ტოტიკაშვილი, მინდია ბოდაველი, გიორგი ბაინდუროვი და ნოდარ მეტრეველი. ისინი თანაბარი უფლებებით სარგებლობენ, საკითხები კი ხმათა უმრავლესობით წყდება.

რამდენად საფუძვლიანია ჭრიკიშვილის ხმაურიანი ბრალდებები, ამაზე ინტერვიუ მინდია ბოდაველს ვთხოვეთ, რომელთანაც ვარჯიშობს დღეს ღვინიაშვილიც, ოლიმპიური ჩემპიონი ლაშა შავდათუაშვილიც (73) და ევროპის ჩემპიონი, მსოფლიოს მედალოსანი ვაჟა მარგველაშვილიც (66).

- მსოფლიოს ჩემპიონატზე წამსვლელი შემადგენლობა უკვე გაირკვა, თუ რატომ დარჩა ჭრიკიშვილს შთაბეჭდილება, რომ იჩაგრება? რამ გამოიწვია მისი ეს განცხადება და რატომ არ წავიდა მინსკში საჭიდაოდ?

- საბოლოო შემადგენლობა ჯერ არაა გარკვეული. მათ შორის - არც 90 კილოგრამში და ჩემთვის გაუგებარია მისი ეს განცხადება. ორი დღის წინ ისე დავშორდით, რომ ჩაიაროს მინსკის ტურნირმა, კიდევ გავაკეთოთ ანალიზი და საბოლოოდ ჩამოვყალიბდეთ-თქო. კონკრეტულად რომ გვეთქვას, მორჩა, დამთავრდა შერჩევაო, ასეთი რამ ნამდვილად არ ყოფილა. იმაზე კი ნამდვილად ვბჭობთ, ამ წონაში რომელი ჯობია და ვისი წაყვანა აჯობებს მსოფლიოს ჩემპიონატზე - ავთანდილ ჭრიკიშვილის თუ ბექა ღვინიაშვილის. რაც შეეხება უშანგი მარგიანს, მას განაღდებული აქვს ადგილი ნაკრებში, როგორც მსოფლიოს პრიზიორს და თან ახლაც დამაჯერებლად იჭიდავა ბუდაპეშტში.

- ანუ მსოფლიოს შარშანდელ მედალოსნებს - ვაჟა მარგველაშვილს, მარგიანს და ვალერი ლიპარტელიანს განაღდებული ჰქონდათ მსოფლიოს წლევანდელ პირველობაზე გამოსვლა?

- ზოგადად, ევროპის ჩემპიონატის შემდეგ მთელ ნაკრებს ვაყენებდით კონკურენციაში, სადაც ვიღაცას მეტის დამტკიცება დასჭირდებოდა, ვიღაცას - ნაკლების. ეს - იმ შემთხვევაში, როცა ჯანსაღი ვითარება იქნებოდა, მსოფლიომდეც დიდი პერიოდი გაქვს, კონკურენციაში რომ ჩასვა, შეჯიბრებებში მიიღო მონაწილეობა და ასე შემდეგ. იმ არეულობებიდან გამომდინარე, როცა ესენი ჯერ არ ვარჯიშობდნენ და ამბობდნენ, რომ ტურნირებში არ აპირებდნენ გამოსვლას;

ეს არეულობა დიდხანს გაგრძელდა და მსოფლიომდე ცოტა დრო რჩებოდა, თითქმის გარკვეული იყო ყველაფერი. მე, როგორც მწვრთნელი, უპირველესად, შედეგს ველოდები, სხვა დანარჩენი კი მეათეხარისხოვანია, რადგან მე ვარ პასუხისმგებელი შედეგზე და მინდა, წავიყვანი ისეთი ადამიანი, ვინც მზადაა იმ მომენტისთვის. ჩემთან მოვარჯიშე სამეული - მარგველაშვილი, შავდათუაშვილი და ღვინიაშვილი, ევროპის ჩემპიონატის მეორე დღიდანვე იყვნენ ჩართულნი სავარჯიშო პროცესებში და თავს იკლავდნენ ვარჯიშით.

  #ავთანდილ ჭრიკიშვილი: ვიჩაგრები იმის გამო, რომ დავუპირისპირდი დავით ქევხიშვილს

მოგვიანებით, როცა შეიცვალა ვითარება და გარკვეული პერიოდის შემდეგ ამათაც განაახლეს ვარჯიში, გამოვნახეთ ის ოპტიმალური ვარიანტი, რაც გუნდისთვის უკეთესი იქნებოდა; რომ უფრო უკეთეს გუნდს მიეღო მონაწილეობა მსოფლიოს ჩემპიონატში. აქედან გამომდინარე ვთქვი, რომ რაღაც კატეგორია გამოვყოთ წინასწარ, წლევანდელი შედეგებიდან გამომდინარე დავაყენოთ გუნდში, რომ ფიზიკური შეკრების გავლაც მოესწროს და სხვა დანარჩენი ეტაპებისაც, რათა მსოფლიოზე ღირსეულად გამოვიდეთ, თორემ იგივე სიტუაცია გვექნება, რაც ევროპის შემდეგ მივიღეთ-მეთქი, დანარჩენები კი ჩაბმულიყვნენ კონკურენციაში ვაკანსიების შესავსებად.

მსოფლიოს ჩემპიონატისა და წლევანდელი შედეგებიდან გამომდინარე, გუნდში შვიდი კაცი ხვდებოდა, დანარჩენები კი იმ ორი ადგილისთვის ჩაბმულიყვნენ კონკურენციაში, მიეღოთ ამ ორ "დიდ პრიზზე" მონაწილეობა და ორი საუკეთესო დამატებოდა ამ შვიდეულს.

- და მაგ შვიდ კაცში მარგიანი და ღვინიაშვილი არ ხვდებოდნენ? ანუ ჭრიკიშვილს ჰქონდა მსოფლიოზე მოხვედრის შანსი?

- კი, მარგიანი და ღვინიაშვილიც ხვდებოდნენ, მაგრამ ღვინიაშვილსაც მივეცით შანსი. მოგეხსენებათ, ევროპის ჩემპიონატის შემდეგ ის ევროპის თასზე უნდა გამოსულიყო, მაგრამ აეროპორტში არ გამოცხადდა, თბილისში დარჩა და აბუნტებულებს შეუერთდა. ლოგიკას ვერც ამაში ვხედავ: წადი, იჭიდავე იმ შეჯიბრებაზე, დაამტკიცე შენი და მერე გინდა აქციებზე იარე, ან - სადაც მოგესურვება. სანაცვლოდ მან ელემენტარული მიზეზი დაასახელა - სანამ ფედერაციის პრეზიდენტი არ გადადგება, არ ვიჭიდავებო, მაგრამ ამ შემთხვევაში მე, როგორც მწვრთნელმა, რა გავაკეთო? მე მწვრთნელი ვარ და მომზადებული გუნდი მაინტერესებს.

აქედან გამომდინარე, ჭრიკიშვილი გამოეთიშა კონკურენციას, გუნდში კი მარგიანი და ღვინიაშვილი დავაყენეთ. თუმცა როცა ამბოხებულები იაპონიაში გაემგზავრნენ შეკრებაზე გიორგი ბაინდუროვის ხელმძღვანელობით, იქიდან მირეკავს ბაინდუროვი და ასეთ რამეს მეუბნება: ჭრიკიშვილმა ორივე ტურნირი რომ იჭიდაოს - ხორვატიაშიც და უნგრეთშიც, ზაგრებში ჩემპიონი რომ გახდეს, ბუდაპეშტში კი, მინიმუმ, ფინალში გავიდეს, მაშინაც არ ექნება შანსიო და მთავაზობს, რომ სამივე - ჭრიკიშვილიც, ღვინიაშვილიც და მარგიანიც ვაჭიდაოთ მინსკში და ამათგან ორი საუკეთესო დავაყენოთ მსოფლიოზეო. მეც დავეთანხმე იქიდან გამომდინარე, რომ მსოფლიოს ჩემპოიონი კაცია, ტიტულოვანი სპორტსმენი და იჭიდაოს-მეთქი. თან თუ ასეთ შედეგებს დადებდა დ დაგვანახებდა, რომ მსოფლიოზე შედეგს მოიპოვებდა, მით უფრო... კარგი, დაგირეკავო, მითხრა, თუმცა მერე არ დაურეკავს.

   #ძიუდო. პროტესტი: კირაკოზაშვილი, ჭრიკიშვილი და პაპუნაშვილი მინსკში არ იჭიდავებენ

საბოლოოდ ჭრიკიშვილმა იჭიდავა ხორვატიაში და მოიგო, შედეგი დადო, მაგრამ გადავხედოთ, როგორ ხალხს მოუგო! წონის დღევანდელ ლიდერებთან არ უჭიდავია. მეტოქეთაგან საამიროების წარმომადგენელი სერგიუ ტომა ოლიმპიადისა და მსოფლიოს მესამე პრიზიორია, ფინალში კუბელი მსოფლიოს ექს-ჩემპიონი ეშლი გონსალესი დაამარცხა, ფრანგი აქსელ კლერჟე ევროპის ვიცე-ჩემპიონია, მაგრამ მათ ეს მედლები წინა წლებში მოიპოვეს. ვისაც შეხვდა, იმათგან რეიტინგში საუკეთესო კლერჟეა, ვინც მე-14 ადგილზეა, გონსალესი სულაც 30-ეა და ასე შემდეგ. წონის ლიდერებთან მას არ უჭიდავია. ამიტომაც იყო საჭირო, მას უნგრეშიც ეჭიდავა, რასაც ჩვენი შეთანხმებაც ითვალისწინებდა, მაგრამ ამის ნაცვლად, არიქა, ჩემპიონი გავხდი და სალაპარაკო მომეცაო, არ იჭიდავა.

ამასწინათ ამ თემაზე ფედერაციაში ბაინდუროვთან მქონდა შეხვედრა, სადაც ჭრიკიშვილიც შემოვიდა. მას ავუხსენი ვითარება და ვკითხე, რატომ არ იჭიდავე მეორე ტურნირი, ამით შენ მოიჭერი მსოფლიომდე მისასვლელი გზა-მეთქი. ყოველ შემთხვევაში, ამ ეტაპზე-მეთქი. მიუბრუნდა ბაინდუროვს და ეუბნება, მე ხომ გითხარი, ორივე ტურნირის ჭიდაობა მინდა და რატომ არ მაჭიდავეო. იმან ფედერაციის გენერალურ მდივან გიორგი ათაბეგაშვილს გადააბრალა, მან ასე მითხრა, პაპუნაშვილს ვერ ჩავანაცვლებო.

არადა, ათაბეგაშვილისთვის მე ცალკე მქონდა დანარეკი, რომ რაკი ჭრიკიშვილი არ რეგისტრირდებოდა, პაპუნაშვილი დაარეგისტრირე-მეთქი, რადგან მერე ჩანაცვლება მარტივად ხდება. პაპუნაშვილი სწორედ ამიტომ დავარეგისტრირეთ. თუმცა მთავარი ისაა, რომ ბაინდუროვმაც დაურეკა ათაბეგაშვილს, რომ არ დაგვიანდეს, მეორე კაციც დავარეგისტრიროთ და მე დავურეკავ ბოდაველსაც, მოდებაძესაც და გადავწყვიტავთ, იჭიდაოს თუ არა ჭრიკიშვილმაო. არადა, არც ერთთან დაურეკავს, ათაბეგაშვილმა კი სიტყვა-სიტყვით გაახსენა ყველაფერი. ახლა ჭრიკიშვილს ერთი შანსი დარჩა, საკონტროლო შეხვედრა ჩავატაროთ ერთმანეთშიო, თუმცა არც ეს გამოდის სამართლიანი.

- ჭრიკიშვილი თავის განცხადებაში საუბრობს მწვრთნელებთან დადებულ შეთანხმებაზე. თუ იცით, ამ შეთანხმებას გულისხმობს?

- ის გულისხმობს, ევროპის ჩემპიონატის შემდეგ ხომ შემპირდით, რომ კონკურენციაში ჩავერთვებოდიო. მე ვუხსნი, ჩართვა რომ გვინდოდა, იმიტომ გაჭიდავებდით ევროპის თასს და გეჭიდავა, ხოლო იქ წაუსვლელობის შემდეგ მაინც მოგეცით შანსი, მერე კი ერთად გაჭიდავებდით ორივეს-მეთქი.
არ გამოვრიცხავ, ეს განცხადება ახალი არეულობის შემოტანას ემსახურება. გუშინ წინ არ დავშორებივართ ისეთი განწყობით, რომ მსგავსი განცხადებების გაკეთების საბაბი ჰქონოდა.

- თუმცა ფედერაციაში ბუდაპეშტის ტურნირამდეც დამდგარა ღვინიაშვილის მსოფლიოდან დატოვების საკითხი. მაშინ მწვრთნელებს შორის რაღაც შეთანხმებაც კი გაფორმებულა, რომ უნგრეთის შეჯიბრებამდე არ განხილულიყო ეს საკითხი.

- არა, ეს საკითხი ასე მწვავედ არ დამდგარა, მაგრამ მაშინ ვითხოვდი, რომ ჭრიკიშვილს უნგრეთშიც ეჭიდავა. საბოლოოდ ისე გამოვიდა, რომ მაინც არ იჭიდავა.

- დღეს მათ შორის საკონტროლო შეხვედრას გამორიცხავთ?

- არ მგონია, ამით საუკეთესო გამოვავლინოთ. ჭრიკიშვილმა ჯერ კონკურენცია უნდა გაიაროს და დაამტკიცოს, რომ 90 კილოგრამშიც შეუძლია შედეგების მოპოვება. ამ ერთი შეჯიბრებით მაგას ვერ დაამტკიცებდა, პირადი შეხვედრა კი სულ სხვა რამეა. ერთი შეხვედრის ჩატარება სხვაა, შეჯიბრებისა - სულ სხვა. ამით ვერ გამოავლენ საუკეთესოს.

- მაგრამ მარგიანიც თუ თანახმაა ამ საკონტროლო შეხვედრებში მონაწილეობაზე, როგორც ჭრიკიშვილი ამბობს თავის განცხადებაში, მაშინ იქნებ ამ სამში გაგემართათ?

- ელემენტარული გათვლაა - ყველაფერს ისე აკეთებენ, ოღონდ კი სათქმელი ჰქონდეთ. ასე თავისი ნებით ჩაიყენეს კონკურენციაში თავი ლიპარტელიანმა და ჩხვიმიანმა. საბოლოოდ ორივემ წააგო, მაგრამ არ წავიყვანოთ ლიპარტელიანი მსოფლიოზე? თან ლიპარტელიანმა ევროპაზეც მალევე წააგო.
მათ სურთ, ყველანაირი სიტუაცია ისე მოაწყონ, როგორც თავად სურთ და ეს რანაირი მსჯელობაა, ვერ ვხვდები.

- ღვინიაშვილის ტურნირებში გამოუსვლელობა ცოტა აუხსნელ ამბად ჩანს. იქნებ ჯობდა, ან ერთად ეჭიდავათ სადმე, ან - ცალ-ცალკე, რომ შედარების საშუალება ყოფილიყო?

- ეგეც კონკურენციიდან გამომდინარეობს: რადგან ჭრიკიშვილმა არ იჭიდავა ის შეჯიბრებები და ღვინიაშვილს მოვიაზრებდით გუნდში, მომზადების განსხვავებული სტრატეგია ავირჩიეთ. ერთი სიტყვით, ვიმოქმედეთ შექმნილი ვითარებიდან გამომდინარე. მზადების მსგავსი პრაქტიკა გვაქვს: შარშან ევროპის ჩემპიონატის შემდეგ მარგველაშვილს მსოფლიომდე შეჯიბრება არ ჰქონდა ნაჭიდავები, მაგრამ ერთ-ერთი საუკეთესო ტურნირი ჩაატარა და მედალიც მოიპოვა.

- თამაზ კირაკოზაშვილი რატომ არ წავიდა მინსკში, ესეც პროტესტი იყო?

- კი, ისიც პროტესტს აცხადებს, უსამართლოდ მომექცნენ ეგენიო, ამბოხებულებზე ამბობს. მოგეხსენებათ, ის ჯგუფი ბაინდუროვთან ვარჯიშობდა, ჩვენ არ გვცნობდნენ. ყველაზე მთავარი ისაა, რომ თვითონ ბაინდუროვიც ამბობს, ბიჭებმა გადაწყვიტეს, 81 კილოგრამში სამომავლოდ კონკურენცია ასე უნდა გაგრძელდესო. გასაგებია, ვინ ბიჭებზეა საუბარი. თურმე კირაკოზაშვილი და რეხვიაშვილი მინსკში თანაბარ პირობებში უნდა წავიდნენ საჭიდაოდ, როცა კირაკოზაშვილმა პირადი შეხვედრაც მოუგო მას, საქართველოს ჩემპიონიცაა და თბილისის ტურნირის გამარჯვებულიც, რეხვიაშვილს კი ერთი მედალი აქვს.
ახლა კირაკოზაშვილი ჩემთან მოდის, იმათ დამჩაგრესო, თუმცა არა მხოლოდ ის, სხვებიც მირეკავენ.

- მწვრთნელთა 5-კაციანი საბჭო როგორი მოსაზრებაა, ერთსულოვნებაა ამ საკამათო საკითხებზე?

- ამ 5 კაციდან 4 ერთ აზრზე ვართ, მეხუთე - ბაინდუროვი კი არც იმას ამბობს, არც - ამას. თუმცა ხმათა უმრავლესობა მაინც გამოკვეთილია. ამის მიუხედავად, მაინც ვცდილობთ, ბოლო მომენტამდე არ დავასახელოთ შემადგენლობა.

- საბოლოო პასუხისმგებლობას ვინ აიღებს შემადგენლობაზე, შედეგზე?

- ჯერჯერობით ასეა - ყველაფერი წყდება ხმათა უმრავლესობით.

5162
მკითხველის კომენტარები / 13 /
Karakala
0
ქევხიშვილთან ერთად, ყაველაშვილმა და ჩოჩელმაც უნდა აგოს ამ მარაზმზე პასუხი!
ჯაბა
0
სანამ ჩოჩელს არ მოაშორებთ,ძიუდოს არაფერი ეშველება
მსგავსი ამბები
რუბრიკის სხვა სიახლეები
;