ძიუდო. ნაკრები. ოსაკაში - ძველი კადრებით

ნოემბერი ძალიან დატვირთულია ძიუდოს დიდი ტურნირებით - უახლოესი სამი უქმეების განმავლობაში მიყოლებით ტარდება სამი დიდი შეჯიბრება ტაშკენტში, ჰააგასა და ოსაკაში.

თუმცა ჩვენები 9-11 ნოემბერს უზბეკეთის გრან პრიზე არ გამოვლენ, მომდევნო ორში წასაყვანი წინასწარი შემადგენლობები კი უკვე გამოცხადებულია.

16-18 ნოემბერს ჰოლანდიაში, ასევე გრან პრიზე, ეროვნული ნაკრების მხოლოდ ხუთი წევრია დარეგისტრირებული: ევროპის ჩემპიონი, მსოფლიოს პრიზიორი ვაჟა მარგველაშვილი (66), ოლიმპიური და ევროპის ჩემპიონი ლაშა შავდათუაშვილი (73), ევროპის მესამე პრიზიორი ზებედა რეხვიაშვილი (81), ევროპის სამგზის და მსოფლიოს ჩემპიონი ავთანდილ ჭრიკიშვილი (90) და ევროპის სამგზის გამარჯვებული, მსოფლიოს ორგზის და ოლიმპიადის ვიცე-ჩემპიონი ვალერი ლიპარტელიანი (100).

ჩვენი ჯერაც უმთავარმწვრთნელო ნაკრებისთვის მთავარი შეჯიბრება 23-25 ნოემბერს იაპონურ ოსაკაში გასამართავი ძიგორო კანოს სახელობის გრანდ სლემი იქნება, სადაც 11 ფალავანია დარეგისტრირებული. მათ შორის ზემოთ დასახელებული ხუთეულიცაა, მათ კი შემდეგი ფალავნები ემატებიან:

ევროპის ჩემპიონი, მსოფლიოს ორგზის ბრინჯაოს მედალოსანი ამირან პაპინაშვილი, ლუხუმ ჩხვიმიანი (ორივე - 60), ფრიდონ გიგანი (73), ევროპის ორგზის ფინალისტი ნუგზარ ტატალაშვილი (81), მსოფლიოს პრიზიორი უშანგი მარგიანი (90) და ევროპისა და მსოფლიოს ჩემპიონი გურამ თუშიშვილი (+100).

როგორც ვხედავთ, სამწვრთნელო საბჭო კვლავაც ძველ კადრებს ეყრდნობა, ახალი თაობა კი ნაკლებადაა წარმოდგენილი. არადა, ისინი ნამდვილად იმსახურებენ სალიცენზიო ტურნირებში გამოსვლას - მათი დიდი ნაწილი მზადაა, კონკურენცია გაუწიოს ძველებს, რაც ორივე მხარისთვის კარგია. თანაც, იაპონურ შემადგენლობაში ბევრ წონაში ადგილები გვაქვს. იმედია, საბჭო მხოლოდ იმას ითვალისწინებს, რომ ახალგაზრდებს ძალიან დატვირთული შემოდგომა ჰქონდათ და ამიტომ ასვენებს მათ და სხვა მიზეზი არაა. მით უფრო, 23-იანთა პირველობა ბოლო უქმეებზე დამთავრდა. თუმცა აქვე კიდევ ერთხელ განვმარტავთ, რომ ეს წინასწარი შემადგენლობაა და მონაწილის შეცვლა დასაშვებია. აი, გაზრდა-დამატებაზე კი რა გითხრათ - ჩვენი ინფორმაციით, ფედერაციას ბიუჯეტი ამოწურული აქვს.

რაც შეეხებათ ქალებს, ისინი წლეულს აღარსად გამოვლენ და შეჯიბრებებში მხოლოდ მომავალი წლიდან ჩაებმებიან.

ყოველდღიური სპორტული გაზეთი "ლელო"
888
მკითხველის კომენტარები / 0 /
მსგავსი ამბები
რუბრიკის სხვა სიახლეები