ძიუდო. ნაკრები. ღვინიაშვილს მუხლმა უმუხთლა

უკვე რამდენიმე დღეა, ძიუდოისტთა ნაკრების რამდენიმე წევრი მწვრთნელ მინდია ბოდაველის ხელმძღვანელობით ბაკურიანში გადის საერთო ფიზიკური მომზადებისთვის განკუთვნილ შეკრებას.

იქ ოთხი სპორტსმენია: ამირან პაპინაშვილი (60 კგ.), ვაჟა მარგველაშვილი (66), ლაშა შავდათუაშვილი (73) და უშანგი მარგიანი (90).

ეს კვარტეტი იანვარში შეკრებაზე ვერ გაჰყვა გუნდს: პაპინაშვილი - გაციების გამო, ხოლო დანარჩენი სამეული ვალერი ლიპარტელიანთან (100) ერთად ავსტრიულ მიტერსილში ვარჯიშობდა ერთობლივ კემპზე.

ამიტომ იმ დანაკლისს ახლა ივსებენ. შეგახსენებთ, რომ ათიოდ დღის წინ პაპინაშვილმა პარიზში იჭიდავა და გერმანულ ტურნირზე წინასწარ განაცხადშიც შეიყვანეს, თუმცა მისი და ლიპარტელიანის წასვლა მაინც გაურკვეველი იყო.

საბოლოოდ, მწვრთნელთა საბჭომ ლიპარტელიანის გერმანიაში ჭიდაობა მიზანშეწონილად მიიჩნია, პაპინაშვილი კი სახლში დატოვეს და ევროპის ჩემპიონატისთვის საგანგებო პროგრამით ამზადებენ.

იყო იმედი, რომ ბოლო დღეებში ამ კვარტეტს ბაკურიანში ევროპის ბრინჯაოს პრიზიორი ბექა ღვინიაშვილიც (90) შეუერთდებოდა, მაგრამ ის ტრავმის გამო ვერ გაემგზავრა.

სამწუხაროდ, გუნდის ერთ-ერთი ლიდერი ჯერჯერობით კვლავაც ვერ ახერხებს ვარჯიშს. ამ დღეებში მას პარიზის ტურნირის ფინალში ნატკენი მუხლი გაუშუქეს, რის შემდეგაც გაირკვა, რომ მუხლი ნაწილობრივ ამოვარდნილია, ამან კი, თავის მხრივ, მყესების დაჭიმვა გამოიწვია.

ღვინიაშვილს უკვე დაენიშნა მკურნალობის 10-დღიანი კურსი და მის განხორციელებასაც შეუდგა. ბოდაველი იმედოვნებს, რომ ამ ვადის გასვლის შემდეგ ის ნაკრებს შეუერთდება და გააგრძელებს ვარჯიშს.

ამასობაში, პარიზიდან დაბრუნებული ნაკრების დანარჩენი წევრები თბილისში აგრძელებენ ვარჯიშს. მათი ძირითადი მიზანი ჯერ მარტი-აპრილის გასაყარზე გასამართავი თბილისის ტურნირი, მერე კი ევროპის ჩემპიონატია, რომელიც 26-28 აპრილს თელ ავივში ჩატარდება.

ყოველდღიური სპორტული გაზეთი "ლელო"
1292
მკითხველის კომენტარები / 0 /
მსგავსი ამბები
რუბრიკის სხვა სიახლეები
;