ძიუდო. ორი ჩემპიონი - ახალკაცი და ბექაური

საქართველოს ძიუდოისტთა ახალგაზრდულმა ნაკრებმა დღეს ბერლინის თანატოლთა ევროპის თასზე გუშინდელზე უკეთესად იჭიდავა და ორი ოქრო მოიპოვა: ვლადიმერ ახალკაცმა (81) და ლაშა ბექაურმა (90). დღესვე ბრინჯაოს მოპოვება სამ ჩვენებურსაც შეეძლო, მაგრამ სოსო ებილაშვილი (81), ზაურ კენჭაძე (100) და ამირან წიქორიძე (+100) მეხუთე ადგილებზე დარჩნენ.

შეგახსენებთ, რომ ლაშა გუჯეჯიანის შეგირდებმა გუშინ ერთი ვერცხლი და ორი ბრინჯაოც მოიპოვეს. ფინალში ალეკო მამიაშვილი (73) დამარცხდა, ხოლო მესამეზე ივანე ხუბაშვილი (55) და გიორგი ნიაზაშვილი (66) გავიდნენ.

ამდენად, ჩვენმა ნაკრებმა ბერლინში გამოსვლა ხუთი მედლით დაასრულა: ორი ოქრო, ამდენივე ბრინჯაო და ერთიც ვერცხლი.

ახალკაცმა ბერლინში გამართული ექვსი შეხვედრიდან ხუთი იპონით მოიგო. მან ვაზარით მხოლოდ პირველ მეტოქეს სძლია - გერმანელ ფრედერიკ შრაიბერს, უნგრელი როლანდ გოზი, ფრანგი პაულ ლივოლი, მეოთხედფინალში რუსი დმიტრი ხარიტონოვი, ნახევარფინალში ბრაზილიელი გილერმე შმიდტი და ფინალში კიდევ ერთი მადიარი, რობერტ რაიკაი კი ბეჭებზე დააგდო. თან, ამ ექვსი პაექრობიდან, მან მხოლოდ ერთში გაუშვა გდება - ხარიტონოვთან. სამაგიეროდ, ფრანგსა და ბრაზილიელს იპონამდე კიდევ გაუკეთა თითო ილეთი.

73 კილოგრამიდან წლეულს "ამომხტარმა" ბექაურმა "ზედაზენის თასზე" გამარჯვების შემდეგ კიდევ ერთხელ გაგვაოცა დამაჯერებელი ჭიდაობით და ექვსივე შეხვედრა წმინდად, გდებებით მოიგო. მისი უპირატესობა იმდენად დიდი იყო, რომ ერთი გაფრთხილებაც არ მიუღია და ქულა ამანაც მხოლოდ ერთხელ დაკარგა. სამაგიეროდ, წააგო მისმა მოგვარემ და ამ წონის შარშანდელმა ლიდერმა მიხეილ ბექაურმა.

ლაშამ გერმანულ ტატამს მიყოლებით გააკრა გერმანელი მარკ ჰერტელი, ჰოლანდიელი მარტინ ვან დე ვენი, მერვედფინალში ყაზახი იერასულ ბოლატი (ქულაც ამასთან დაკარგა), მეოთხედფინალში - ბრაზილიელი მათეუს ასისი, ნახევარფინალში - მიხელ ბექაურის მომგები და მომავალი ბრინჯაოს მედალოსანი, აზერბაიჯანელი ელად ალახვერდიევი, ფინალში კი სერბი დარკო ბრასნიოვიჩი დაამარცხა.

2952
მკითხველის კომენტარები / 0 /
მსგავსი ამბები
რუბრიკის სხვა სიახლეები
;