[ძიუდო. პარიზის ტურნირის შეჯამება] ფიზიკაშიც ჩამოვრჩით და რეიტინგშიც... შეცდომები მალე უნდა გამოსწორდეს

პარიზულმა „მუზარადმა“ ორმაგი შედეგით ჩაიარა - იყო გარკვეული მისასალმებელი ტენდენციებიც, თუმცა დასაფიქრებელი უფრო მეტი გვაჩვენა. გვესმის, რომ გვაკლდნენ ლიდერები, ხოლო ფალავნები ჯერ შორს არიან სასურველი ფორმისგან, მაგრამ აქ გამოვლენილი შეცდომები სამომავლოდ აუცილებლად უნდა გავითვალისწინოთ და გამოვასწოროთ.

თანაც, ბოლო პერიოდის წარუმატებლობების შემდეგ მსოფლიოს რეიტინგში მთელ რიგ წონებში ვთმობთ პოზიციებს და უკვე რამდენიმეგან განთესვის ზონაც კი დავტოვეთ. არადა, რეიტინგი, როგორც არასდროს, ახლა ისეა საჭირო, რათა კარს მომდგარ ოლიმპიადაზე ხელსაყრელი განთესვა მივიღოთ. 

შეგახსენებთ, რომ პარიზში ჩვენი მონაგარი ვალერი ლიპარტელიანის (100) მიერ მოპოვებული ვერცხლის მედალი აღმოჩნდა. ჩვენმა ლიდერმა დამაჯერებლად იჭიდავა და რომ არა მსაჯთა გადაწყვეტილება ფინალში, მეოთხედ გახდებოდა ამ პრესტიჟული ტურნირის გამარჯვებული. სამწუხაროდ, პეტერ პალჩიკთან პაექრობის დამატებით დროში მსაჯებმა ქართველის გდება სიცოცხლისთვის სახიფათო ქმედებად მიიჩნიეს და მესამე გაფრთხილებით მოხსნეს. ეგრეთ წოდებული „თავზე გადავლა“ მართლაც აიკრძალა რამდენიმე წლის წინ, აქაოდა, უფროსებისთვის არაა საშიში, მაგრამ ამას ბავშვებიც უყურებენ, ისინიც გადაიღებენ და მათთვის შეიძლება სახიფათო აღმოჩნდესო, თუმცა შიგადაშიგ მაინც ვხედავთ ხოლმე, როცა ამაზე სხვებს „თვალს წაუხუჭავენ“ ხოლმე. არადა, ჩვენები ბევრჯერ დაუსჯიათ ამისთვის.

მან მანამდე ყველა შეხვედრა დამაჯერებლად ჩაატარა და საკმაოდ ძლიერ მეტოქეებს მოუგო. ოღონდ დანარჩენთაგან მაინც რუს არმან ადამიანთან მოგებას გამოვარჩევთ, ვისთანაც მეორე ევროპული თამაშების ფინალში წააგო, თუმცა შემდეგ იმავე მასტერსზეც აჯობა და პარიზშიც შებოჭა, როცა ადამიანმა გაბედა და შებოჭვა დაუპირა. მწვრთნელებს პარიზის ტურნირის მიხედვით უნდა გადაეწყვიტათ ტოკიოს ოლიმპიადისთვის ლიპარტელიანის მოსამზადებელი გეგმა - თუ იქ კარგად გამოვიდოდა, მაშინ ორი კვირის შემდეგ დიუსელდორფში აღარ წაიყვანდნენ. დიდი შანსია, ასეც მოიქცნენ.

კიდევ ერთ დადებით მომენტად ალეკო მამიაშვილის (73) გამოსვლას დავასახელებთ. მართალია, ციდან ვარსკვლავები მას არ მოუკრეფია, მაგრამ დებიუტანტის და ამ დონის ტურნირის კვალობაზე, ურიგოდ არ უჭიდავია. რა დასამალია და, ამ წონაში საკადრო კრიზისი გვაქვს - ოლიმპიურსა და ევროპის ჩემპიონ ლაშა შავდათუაშვილს ღირსეული კონკურენტი არ უჩანს.

მამიაშვილი პირველ წრეში ისვენებდა, მეორეში კი ვაზარით მოუგო მაროკოელ აჰმედ ელ მეზიატის - შეხვედრის მიწურულს გარეფეხიდან უკან გადააგდო პირდაპირ ბეჭებზე. აი, ამის შემდეგ საკმაოდ ძლიერ მეტოქეს - ფრანგ გიიომ ჩაინეს შეხვდა, ვისაც არათუ რაიმე დაუთმო, აჯობა კიდეც: შეხვედრის შუაწელში ტაქტიკურად სწორი მიდგომით კარგად მოუმზადა ილეთი და დგომიდან ზურგსუკან ვაზარზე გადააგდო. მან დარჩენილ დროშიც კარგად დაიცვა თავი და ანგარიში წარმატებით შეინარჩუნა. ამის შემდეგ მამიაშვილი ყაზახთა მომავალ ფინალისტ ჟანსაი სმაგულოვთან დამარცხდა დამატებით დროში. ვფიქრობთ, ამ პაექრობაში ჩვენს ფალავანს ფიზიკური მომზადება დააკლდა. ალბათ - ცოტა ხასიათიც, რადგან თითქოს ჟინი, შემართება აკლდა, თუმცა ხშირად ესეც გადაღლის ბრალია.

სამწუხაროდ, ამის მეტს დადებითს ჩვენი გუნდების გამოსვლიდან ვერაფერს დავასახელებთ, ქალთა ნაკრების ორი წევრის მიერ თითო-ოროლა შეხვედრის მოგებას თუ არ დავასახელებთ, რაც გარკვეულ იმედს მაინც გვიტოვებს.

მთავარი მინუსი, რაც ჩვენს გუნდებს - ვაჟებსაც და ქალებსაც პარიზში გამოაჩნდათ, არასაკმარისი ფიზიკური მომზადებაა - არ ჰყოფნიდათ სუნთქვა-გამძლეობა, თითქმის ყველამ წააგო დამატებით დროში გაგრძელებული შეხვედრა, ბევრს შეხვედრის ჩამთავრებაც კი გაუჭირდა. რაც ყველაზე უფრო ცუდია, ამ მხრივ ახალგაზრდებმა გამოავლინეს ბევრი ხარვეზი. ვფიქრობთ, დიდწილად სწორედ ამან დააზარალა ვლადიმერ ახალკაცი (81) უზბეკ კამოლიდინ რასულოვთან, თუმცა მანამდეც ცოტა მძიმედ მოძრაობდა ფრანგ იბრაჰიმ კეიტასთან.

საბოლოოდ ის ბრუნით მშვენიერ იპონზე კი მოისროლა, მაგრამ მეტიც შეუძლია. იმ ეპიზოდამდე კი ფრიად დაძაბული პაექრობა გაიმართა და მეტოქეებმა თითო ილეთი მიითვალეს. ვერც ონისე სანებლიძემ (100) შეძლო ფიზიკურად მომატება, თუმცა ამ მხრივ ყველაზე დიდი ნაკლი მაინც გელა ზაალიშვილმა (+100) გვაჩვენა ნახევარფინალში ჰოლანდიელ ჰენკ ხროლთან. არადა, მანამდე ბევრად უფრო თავისუფლად ჩაატარა სამი პაექრობა და კიდევ ერთი ჰოლანდიელი, მსოფლიოს პრიზიორი როი მეიერი, აგრეთვე ბრაზილიელთა მსოფლიოს ფინალისტი დავიდ მოურა დაამარცხა. ზაალიშვილს ხშირად საყვედურობენ ხასიათის გამო - აკლია ჟინი, მობილიზება, შემართებაო და ამის გამოძახილად უნდა მივიჩნიოთ ის ფაქტიც, მწვრთნელები მთელი შეხვედრის განმავლობაში რომ უყვიროდნენ, იჭიდავე, თორემ წააგებო. ამაოდ - ამან ეგრეც ვერ გამოაცოცხლა. ვგონებთ, ვერაა კარგის ნიშანი 34 წლის ხროლი 20 წლის კაცს გამძლეობაში რომ ჯობია და ბოლო წუთებზე ბევრად მეტი ენერგია შერჩება.

ვფიქრობთ, გუნდის დებიუტანტ თორნიკე გვიჩიანს (73) დიდხანს დაამახსოვრდება იაპონელთა მსოფლიოს სამგზის ჩემპიონსა და ორგზის ოლიმპიურ პრიზიორ მასაში ებინუმასთან შეხვედრა და, რაც მთავარია, სწორ დასკვნებს გამოიტანს აქედან. ერთ ეპიზოდში მან კარგი ხასიათი გამოავლინა -  ზემოდან მოექცა ტატამზე გულაღმა წაქცეულ მეტოქეს და შებოჭვა მოუნდომა, თუმცა ებინუმამ გადმოატრიალა და იქით შებოჭა... შემტევი სტილი და სითამამე ნამდვილად დასაფასებელია, მაგრამ ისწავლის, რომ იაპონელებთან ასეთი სითამამე, გახსნილი ჭიდაობა დამღუპველია და სიფრთხილეა საჭირო.

ფიზიკური მომზადება ნაკლად ქალთა ნაკრებსაც გამოაჩნდა და თანაც - კიდევ უფრო დიდ ნაკლად. განსაკუთრებით - მარიამ ჭანტურიას (70) და სოფიო სომხიშვილს (+78). შედარებით დადებითი მომენტია ტატიანა ლევიცკა-შუკვანისა (52) და ეთერ ლიპარტელიანის (57) მოგებები. შუკვანი ახლოსაა სალიცენზიო ზონასთან და ქულები სჭირდება, თუმცა უკვე მაღალ ადგილებზე გასვლა თუ გაუზრდის რეიტინგს, რათა სალიცენზიო ჩათვლაში უკვე არსებული ხუთი შედეგიდან რომელიმეს გადააჭარბოს და წინ წაიწიოს.

პარიზში მან თავდაპირველად მონღოლი ხორლოოდოი ბიშლერტი დაამარცხა ვაზარით, როცა ხელი დაუჭირა და მოგვერდზე გადააგორა. მეორე შეხვედრაში ჩვენებურმა გვინეა-ბისაუელი ტაციანა ცესარიც ვაზარით დაამარცხა, როცა შეხვედრის შუაწელში ვარდნაში გამოცერა კიდეც, შემდეგ კი უკვე თვითონ დამარცხდა ფრანგ ანაის მოდისთან, როცა ბოლო წამებზე ვაზარი გაუშვა. მას ცოტა სარისკო სტილი აქვს, რიკის ზღვარზე ჭიდაობს, რადგან დაცვაში მოიკოჭლებს და თუ შეტევა ვერ დაასრულა, შეიძლება, იოლად მოყვეს კონტრზე.

ლიპარტელიანმა პირველ შეხვედრაში ფრანგი ვერონიკა მანდე დაამარცხა - კისრულის მორიგი მცდელობა დაუხურა მეტოქეს და თავად ჩააბრუნა საიპონედ. სამწუხაროდ, ლიპარტელიანი ებრაელ ტიმნა ნელსონ ლევისთან დამატებით დროში დამარცხდა ვაზარით, ძირითადში კი მეტოქეებმა თითო ვაზარი გაცვალეს.

ჭანტურია უზბეკ გულნოზა მატნიაზოვასთან ვაზარით კი დაწინაურდა, მაგრამ სასტიკად დაიღალა და უპირატესობა ვერ შეინარჩუნა - დასრულებამდე 10 წამით ადრე მეტოქემ გაათანაბრა, დამატებით დროში კი ჭანტურია მესამედ გააფრთხილეს.

სომხიშვილმა თავისი კოლოსალური ფიზიკური უპირატესობა ვერ გამოიყენა ალჟირელ სონია ასელასთან შეხვედრაში - თავიდან ჯიქურ უტევდა და არაბი ერთთავად გაურბოდა, რისთვისაც მალევე გააფრთხილეს. ჭანტურიასი არ იყოს, საბოლოოდ არც მას ეყო  ფიზიკური მომზადება, თუმცა მსაჯებმაც არ უღალატეს ჩვეულებას და პირველი გაფრთხილება, უბრალოდ, მოიგონეს. იმ ეპიზოდში არბიტრმა ორივე გააფრთხილა, რაც ჩვეულებრივი ხრიკია, თორემ სომხიშვილი მაშინაც უტევდა. თუმცა, ვიმეორებთ, რომ გაცილებით მეტი აქტიურობა მართებდა. განსაკუთრებით მას შემდეგ, რაც მეორე გაფრთხილება მიიღო.

1438
მკითხველის კომენტარები / 0 /
მსგავსი ამბები
რუბრიკის სხვა სიახლეები
;