[ძიუდო] რატომ ტირი ინუე? იაპონელთა საოლიმპიადე გუნდი.

ტოკიოს ოლიმპიადამდე დიდი დროც აღარ დარჩა - ივლისის მეორე ნახევარში იმართება, კორონავირუსის გამო საერთოდ თუ არ ჩაიშალა, იაპონიის ძიუდოს ფედერაციამ კი უკვე დაასახელა იქ მონაწილე ქალთა და ვაჟთა გუნდები. ოღონდ ვაჟებში ჯერჯერობით ერთი წონა - 66 კილოგრამი თავისუფალია და მის მონაწილეს აპრილში გასამართავი ქვეყნის პირველობის შემდეგ დაასახელებენ, ქალთა გუნდი კი უკლებლივ შეავსეს.


ვაჟები


60 კგ. ნაოჰისა ტაკატო

73 კგ. შოჰეი ონო

81 კგ. ტაკანორი ნაგასე

90 კგ. სოიჩირო მუკაი

100 კგ. აარონ ვოლფი

+100 კგ. ჰისაიოში ჰარასავა


ქალები


48 კგ. ფუნა ტონაკი

52 კგ. უტა აბე

57 კგ. ცუკასა იოშიდა

63 კგ. მიკუ ტაშირუ

70 კგ. არაი ჩიზურუ

78 კგ. შორი ჰამადა

+78 კგ. აკირა სონე

იაპონელებისთვის ერთ-ერთი მთავარი შესარჩევი შეჯიბრება შემოდგომაზე ოსაკაში ჩატარებული „დიდი მუზარადი“ იყო და ზოგიერთ წონაში დაეყრდნენ კიდეც მის შედეგებს, თუმცა არა ყველგან. მაგალითად, ტაკატო, ონო და ნაგასე იმ ტურნირის ჩემპიონები არიან, ხოლო მუკაიმ იაპონელებში საუკეთესო შედეგი აჩვენა. სამაგიეროდ, 100 და მძიმე წონებში იმ შეჯიბრების ჩემპიონები ვერ მოხვდნენ გუნდში - ამ წონებში უფრო მსოფლიოს ჩემპიონატის შედეგებმა იქონიეს გავლენა.

60 კილოგრამში მსოფლიოს სამგზის ჩემპიონმა, ოლიმპიურმა პრიზიორმა ტაკატომ ოსაკაში ფინალში მოუგო მთავარ კონკურენტ რიუჯუ ნაგაიამას. არადა, მსოფლიოს ჩემპიონატზე ნაგაიამამ ბრინჯაოს მედლისთვის პირადი შეხვედრა მოუგო ტაკატოს. სამაგიეროდ, როგორც გითხარით, მერე ოსაკაში ტაკატომ რევანში აუღო, თუმცა იმის შემდეგაც ყველა დიდ ტურნირზე წარმატებით იჭიდავა და ყველა კითხვის ნიშანი მოხსნა.

იგივე ითქმის ონოზეც - მსოფლიოს სამგზის და ოლიმპიურ ჩემპიონზეც: ეს ბიჭი მუდამ ამტკიცებს, რომ სულ სხვა პლანეტაა. არადა, იაპონელებს ამ წონაში კიდევ ორი უძლიერესი ფალავანი ჰყავთ: მსოფლიოს ჩემპიონი სოიჩი ჰაშიმოტო და კიდევ ერთი მსოფლიოს სამგზის ჩემპიონი, ორგზის ოლიმპიური ბრინჯაოს მფლობელი მასაში ებინუმა, თუმცა მან ეს ტიტულები ქვედა წონაში - 66 კილოგრამში მოიპოვა. ონო შარშან მსოფლიოს ჩემპიონი გახდა, ოსაკას ტურნირი კი ებინუმამ მოიგო და ფინალში ჰაშიმოტო დაამარცხა. სამაგიეროდ, ბოლო პერიოდში ონომ წარმოუდგენლად დიდი უპირატესობით მოიგო ყველა მნიშვნელოვანი ტურნირი, სადაც კი იჭიდავა. თამამად შეიძლება ითქვას: თანამედროვე ძიუდოში არის ონო და დანარჩენი სამყარო ანუ კითხვები არც ამ წონაში დარჩენილა.

მსოფლიოს 2015 წლის ჩემპიონი ნაგასე ოლიმპიური პრიზიორიცაა. მან მოიგო ოსაკას ტურნირი და თან ფინალში მთავარი კონკურენტი სატორო ფუჯივარა დაამარცხა. მართალია, ის იაპონელთა სხვა ვარსკვლავებივით დიდად არ ბრწყინავს და აგერ, დიუსელდორფში ტატო გრიგალაშვილმა მასთან ეპოქალური გამარჯვებაც მოიპოვა, მაგრამ იქაურებს უფრო ძლიერიც არავინ ჰყავთ. ახალგაზრდა მუკაის თითქოს ღირსეულ კონკურენციას კი უწევდნენ სანშირო მურაო და შედარებით ნაკლებად - კენტა ნაგასავა, მაგრამ ბოლოდროინდელი შედეგები მუკაის უკეთესი აქვს - ოსაკაშიც ხომ აჯობა თანაგუნდელებს, მსოფლიოს შარშანდელი ფინალისტიცაა. 100 კილოგრამში ოსაკას ტურნირი რიუნოსუკე ჰაგამ მოიგო, ხოლო კენტარო იიდამაც მსოფლიოს 2017 წლის ჩემპიონ ვოლფის მსგავსად, ბრინჯაო მოიპოვა. სამაგიეროდ, ვოლფი შარშან მსოფლიოს მესამე პრიზიორი გახდა, ხოლო მასტერსზე ფინალში გავიდა ანუ შედეგებით მანაც აჯობა კონკურენტებს და ბოლო ტურნირებში ყველგან შედეგი ჰქონდა.

იაპონელთა დასახელებულ შემადგენლობაში ყველაზე დიდ გაკვირვებას მძიმე წონა იწვევს, სადაც ბოლო პერიოდში მედლებით თითქოს უფრო კოკორო კაგეურა გამოირჩეოდა - ის, ვინც დაუმარცხებელ ფრანგ ტედი რინერს ბოლო 10 წელიწადში პირველი წაგება აწვნია, თუმცა მის ნაცვლად ოლიმპიადისა და მსოფლიოს ფინალისტი ჰისაიოში ჰარასავა დააყენეს... რას გაუგებ იაპონელებს... თუმცა აქ ერთი საინტერესო დეტალიც უნდა ვთქვათ - როცა ამ შემადგენლობას ასახელებდა და ჯერი ოლიმპიადის მიღმა დარჩენილ ვარსკვლავებზე მიდგა, იაპონელთა მთავარმა მწვრთნელმა, თავადაც უბადლო ძიუდოისტმა და როგორც ამ მაგალითით აღმოჩნდა - შესანიშნავმა პიროვნებამ, ოლიმპიურმა და მსოფლიოს სამგზის ჩემპიონმა კოსეი ინუემ ცრემლები ვერ შეიკავა... ვინ-ვინ და დიდმა სპორტსმენმა კარგად იცის, რას ნიშნავს გაწბილება, როცა სანუკვარ მიზანს ვერ აღწევ.

რაც შეეხება 66 კილოგრამს, აქ მსოფლიოს ორგზის ჩემპიონ ჰიფუმი აბეს კონკურენტად ასევე მსოფლიოს ჩემპიონი ჯოშირო მარუიამა ჰყავს. ისე კი ქალებში მისმა დამ - უტა აბემ უკვე გაინაღდა ოლიმპიადაზე მონაწილეობა. მარუიამა მსოფლიოს მოქმედი ჩემპიონია. თანაც - ნახევარფინალში მოუგო აბეს. სამაგიეროდ, აბემ რევანში ოსაკას „დიდი მუზარადის“ ფინალში აუღო... და-ძმა აბეებმა (სხვათა შორის, ისინი ვაჟთა ძიუდოში ერთადერთი სამგზის ოლიმპიური ჩემპიონის - ტადაჰირო ნომურას (60) დის შვილები არიან) მსოფლიოს ძიუდოში უკვე შექმნეს პრეცედენტი - 2018 წელს ბაქოში ორივე მსოფლიოს ჩემპიონი გახდა, ეს კი პირველი შემთხვევა იყო, როცა და-ძმამ არათუ ერთ ტურნირში, სულაც ერთ დღეს მოიპოვა ეს პრესტიჟული ტიტული. თქვენ ის თქვით, ტოკიოს ოლიმპიადაზეც თუ შექმნეს ანალოგიური პრეცედენტი.

მე თქვენ გეტყვით და გაუჭირდებათ, თუმცა ვნახოთ - ჯერ იქამდე ჰიფუმიმ ოლიმპიადის საგზური უნდა გაინაღდოს.

856
მკითხველის კომენტარები / 0 /
მსგავსი ამბები
რუბრიკის სხვა სიახლეები
;