ძიუდო. რეიტინგი -2018. მასტერსით აღზევებულნი

ახალი სპორტული სეზონის წინ ურიგო არ იქნება, გადავხედოთ ძიუდოისტთა საერთაშორისო რეიტინგს, თუმცა მასში ამჯერად ქართველთა პოზიციები ცოტა შერყეულია, მაგრამ არა საგანგაშოდ.

მართალია, წონის ლიდერი არა გვყავს, მაგრამ სამ წონაში (90, 100, +100) მეორე ადგილზე ვართ, კიდევ ერთგან სამეულში ვართ (66), ათეულში კი შვიდიდან ექვს წონაში შევდივართ.

ოღონდ ისიც უნდა განვმარტოთ, რომ მეორე ადგილზე აღზევებაში ჩვენებს ძალიან წაეშველა დეკემბერში მსოფლიოს მასტერსზე გამარჯვება, რისთვისაც თითოეულმა 1800 ქულა მიიღო.

სწორედ ამის დამსახურებით ვხვდებით ახალ სეზონს გამყარებული პოზიციებით. არადა, ახალი სეზონი ძალიან მნიშვნელოვანია, რომ წლეულს სალიცენზიო ქულების განაწილება იწყება და რეიტინგის დანიშნულება მით უფრო იზრდება.

არის ერთი დასაფიქრებელი ფაქტორი: უმეტეს წონებში მოწინავეთა შორის მხოლოდ თითო ძიუდოისტი გვყავს, სხვები კი მათ საგრძნობლად ჩამორჩებიან. არადა, მნიშვნელოვანია, რომ ლიდერებს ღირსეული რეზერვი მისდევდეთ კვალში, როგორც ეს 90 კილოგრამშია.

60 კგ.

აქ ჩვენგან საუკეთესო ევროპის ჩემპიონი, მსოფლიოს ბრინჯაოს მედალოსანი ამირან პაპინაშვილია - 3363 ქულა და მე-7 ადგილი. თანაგუნდელებისგან მის სიახლოვეს მხოლოდ ლუხუმ ჩხვიმიანია და ისიც 21-ზეა, ასეულში კი მეტი მონაწილე არა გვყავს.

1. ნაოჰისა ტაკატო (იაპონია) - 5050
2. რიუჯუ ნაგაიამა (იაპონია) - 4140
3. ფრანსისკო გარიგოსი (ესპანეთი) - 3759
4. ამარტუვშინ დაშდავაა (მონგოლეთი) - 3740
5. რობერტ მშვიდობაძე (რუსეთი) - 3624
7. ამირან პაპინაშვილი (საქართველო) - 3363
21. ლუხუმ ჩხვიმიანი (საქართველო) - 1400

66 კგ.

ევროპის ჩემპიონი, მსოფლიოს ბრინჯაოს მედალოსანი ვაჟა მარგველაშვილი 4251 ქულით მესამეა, ლაშა გიუნაშვილი - 26-ე, ბაგრატ ნინიაშვილს კი სწორედ მსოფლიოს ახალგაზრდულ ჩემპიონატზე მოპოვებულმა ბრინჯაოს მედალმა უშველა და რეიტინგში 56-ეა.

1. ჰიფუმი აბე (იაპონია) - 4500
2. ტალ ფილკერი (ისრაელი) - 4382
3. ვაჟა მარგველაშვილი (საქართველო) - 4251

4. კერლენ განბოლდი (მონგოლეთი) - 3450
5. ბარუხ შმაილოვი (ისრაელი) - 2829
26. ლაშა გიუნაშვილი (საქართველო) - 1228
56. ბაგრატ ნინიაშვილი (საქართველო) - 610

73 კგ.

ეს წინა ზედიზედ მესამეა, სადაც იაპონელები ლიდერობენ, თუმცა სწორედ ამ წონის ლიდერმა, იაპონელმა მსოფლიოს მოქმედმა ჩემპიონმა სოიჩი ჰაშიმოტომ დააგროვა შვიდივე წონის ფავორიტთა შორის ყველაზე მეტი ქულა და წლის საუკეთესო ძიუდოისტი გახდა.

ჩვენი ოლიმპიური და ევროპის ჩემპიონი ლაშა შავდათუაშვილი ხუთეულს აგვირგვინებს. ტატო გრიგალაშვილიც მსოფლიოს ახალგაზრდულ ჩემპიონატზე მოპოვებულმა ბრინჯაომ შეიყვანა ასეულში, სადაც ასევე არიან ომარ ნიაზაშვილი და ნუგზარ ტატალაშვილი, თუმცა ეს უფრო ძველი ინერციით რჩება ამ წონის რეიტინგში, რადგან უკვე გადავიდა 81-ში.

1. სოიჩი ჰაშიმოტო (იაპონია) - 7150
2. ოდბაიარ განბაატარი (მონგოლეთი) - 4988
3. რუსტამ ორუჯოვი (აზერბაიჯანი) - 4968
4. ჰიდაიეტ ჰეიდაროვი (აზერბაიჯანი) - 3921

5. ლაშა შავდათუაშვილი (საქართველო) - 3722
51. ტატო გრიგალაშვილი (საქართველო) - 602
79. ნუგზარ ტატალაშვილი (საქართველო) - 341
88. ომარ ნიაზაშვილი (საქართველო) - 288

81 კგ.

ესაა ერთადერთი წონა, სადაც ათეულს მიღმა ვართ: ევროპის მესამე პრიზიორი ზებედა რეხვიაშვილი მე-11 ადგილზეა 2368 ქულით. იაპონელთა ჰეგემონობაც აქ მთავრდება: 81-დან მოყოლებული, მათ არც ერთ წონაში აღარ ჰყავთ პირველი ნომერი, ჩვენ კი ასეულში კიდევ ოთხი ფალავანი გვყავს, ოღონდ იმათში ერთი ასევე ზედა წონაში გადაბარგებული ევროპის სამგზის და მსოფლიოს ჩემპიონი ავთანდილ ჭრიკიშვილია.

1. ხასან ხალმურზაევი (რუსეთი) - 4650
2. ფრანკ დე ვიტი (ჰოლანდია) - 4554
3. საეიდ მოლაე (ირანი) - 3854
4. ალან ხუბეცოვი (რუსეთი) - 3840
5. უუგანბაატარ ოტგონბაატარი (მონგოლეთი) - 3501
11. ზებედა რეხვიაშვილი (საქართველო) - 2368

53. თამაზ კირაკოზაშვილი (საქართველო) - 636
57. გიორგი პაპუნაშვილი (საქართველო) - 562
67. ავთანდილ ჭრიკიშვილი (საქართველო) - 470
77. ამბაკო ავალიანი (საქართველო) - 404

90 კგ.

აქედან მოყოლებული, მომდევნო სამ წონაში მეორე ადგილზე ვართ, რადგან სწორედ ამ წონებში გამოდის მასტერსის მომგები სამეული.

ევროპის მესამე პრიზიორი ბექა ღვინიაშვილი მეორეზეა, თუმცა მსოფლიოს ბრინჯაოს მედალოსანი უშანგი მარგიანიც ახლოსაა მასთან - მე-11. ღვინიაშვილს კვალში ქართველი უდგას, მაგრამ - ესპანეთის სახელით მოჭიდავე ნიკოლოზ შერაზადიშვილი. ჯერჯერობით რეიტინგი არ აქვს ჭრიკიშვილს, რადგან ტრავმა-ოპერაციების გადამკიდეს, ბევრიც არ უჭიდავია აქ.

თუმცა წლეულს ისიც ჩაერთვება შიდა კონკურენციაში და აქ ლიდერობისთვის ბრძოლა ჩვენებს შორის უფრო გამძაფრდება.

1. ალექსანდარ კუკოლი (სერბეთი) - 4418
2. ბექა ღვინიაშვილი (საქართველო) - 4150
3. ნიკოლოზ შერაზადიშვილი (ესპანეთი) - 3679

4. დონგჰან გვაკი (კორეა) - 3392
5. კრისტიან ტოტი (უნგრეთი) - 3289
11. უშანგი მარგიანი (საქართველო) - 2723
49. ვალერი ლიპარტელიანი (საქართველო) - 600

100 კგ.

ამ წონაში ძლიერი ფალავნები არც ადრე გვყავდა დასათვლელად და ახლაც ძირითადად ერთის იმედად ვრჩებით. თუმცა ერთსაც გააჩნია, რამეთუ ის ევროპის სამგზის გამარჯვებული, მსოფლიოს ორგზის ფინალისტი და ოლიმპიადის ვიცე-ჩემპიონი ვალერი ლიპარტელიანია, ვინც რეიტინგში მეორეა.

1. მიხაელ კორელი (ჰოლანდია) - 4836
2. ვალერი ლიპარტელიანი (საქართველო) - 4732
3. მიკლოშ ცირიენიჩი (უნგრეთი) - 4279

4. ელხან მამადოვი (აზერბაიჯანი) - 3976
5. კირილ დენისოვი (რუსეთი) - 3548
46. ბექა ღვინიაშვილი (საქართველო) - 614
63. ლაშა ტაველური (საქართველო) - 406

+100 კგ.

გაგიკვირდებათ და ამ წონის ლიდერი არაა დაუმარცხებელი ფრანგი ტედი რინერი, რადგან იშვიათად ჭიდაობს. მასტერსის კიდევ ერთი გამარჯვებული, ევროპის მოქმედი ჩემპიონი გურამ თუშიშვილიც მეორეა,

ევროპის კიდევ ერთმა ჩემპიონმა, მსოფლიოს ბრინჯაოს პრიზიორმა ადამ ოქრუაშვილმა და ევროპის მედალოსანმა ლევან მატიაშვილმა კი მნიშვნელოვნად დათმეს პოზიციები.

ასეულში სულ ოთხი მონაწილე გვყავს, მაგრამ ნიჭიერი ახალგაზრდა, თანატოლებში ევროპის მესამე პრიზიორი გელა ზაალიშვილიც ახლოსაა მასთან - მხოლოდ ოთხი ადგილი აშორებს ამ ზონას.

1. დავიდ მოურა (ბრაზილია) - 5710
2. გურამ თუშიშვილი (საქართველო) - 4580
3. ტედი რინერი (საფრანგეთი) - 3550
4. რაფაელ სილვა (ბრაზილია) - 3300

5. ალექს გარსია მენდოსა (კუბა) - 2736
15. ადამ ოქრუაშვილი (საქართველო) - 1930
23. ლევან მატიაშვილი (საქართველო) - 1377
48. ონისე ბუღაძე (საქართველო) - 598

სამწუხაროდ, ქალებში ჯერ დიდი რეიტინგი არ გვაქვს, თუმცა სალიცენზიო ტურნირებში ისინიც ჩაებმებიან.

ყოველდღიური სპორტული გაზეთი "ლელო"
2966
მკითხველის კომენტარები / 1 /
1234
0
ჭრიკიშვილი 81-ში რომ დააბრუნონ ნეტავ ვერა.?
მსგავსი ამბები
რუბრიკის სხვა სიახლეები
;