[ძიუდო] რინერი ბეჭებზე! დიდი ეპოქის დასასრული +VIDEO

პარიზის „დიდ მუზარადზე“ მსოფლიოს სპორტის და მსოფლიოს ძიუდოსთვის აღსანიშნავი ამბავი მოხდა: დამარცხდა ფრანგთა ორგზის ოლიმპიური, მსოფლიოს 10-გზის და ევროპის ხუთგზის ჩემპიონი ტედი რინერი (+100), რაც ბოლო 10 წლის განმავლობაში პირველად მოხდა. რინერი ბოლოს 2010 წლის 13 სექტემბერს დამარცხდა, თუმცა ილეთი მაშინაც არ გაუშვია, ის შეხვედრა მსაჯთა გადაწყვეტილებით წააგო. ეს ტოკიოში გამართულ მსოფლიოს ჩემპიონატზე მოხდა, აბსოლუტური წონითი კატეგორიის ფინალში, სადაც რინერი იაპონელ დაიკი კამიკავას ხვდებოდა. მანამდე ფრანგმა +100 კილოგრამში გაიმარჯვა, სადაც ნახევარფინალში სხვა იაპონელი კაზუჰიკო ტაკაჰაში დაამარცხა, ფინალში კი გერმანელ ანდრეას ტოლცერს სძლია. მან ტაკაჰაშის აბსოლუტურ წონაშიც მოუგო, თუმცა იმ კატეგორიაში ბოლო სამმა პაექრობამ იაპონელებთან მოუწია: ტაკაჰაშისთან მოგებით ნახევარფინალში გავიდა, სადაც ჰიროკი ტაჩიამასაც აჯობა, ფინალში კი კამიკავა დაუხვდა. შეხვედრა თანაბარ ბრძოლაში წარიმართა. ყოველ შემთხვევაში, აქტიურობას ვერც კამიკავას „დავაბრალებდით“; პირიქით - ის ცოტა შიშითაც კი ეჭიდავებოდა ფრანგს, თუმცა ამოქმედდა დაუწერელი კანონი, რომ მსაჯები მასპინძელს სულ ოდნავ მაინც ეხმარებიან და არბიტრებმაც გამარჯვებულად კამიკავა გამოაცხადეს. ეს იყო და საერთოდ გულღია, კომუნიკაბელურმა ფრანგმა დაიფიცა, რომ იაპონიაში ფეხს აღარ დაადგამდა და დღემდე მტკიცედ ასრულებს ამ პირობას. მაშინ მსოფლიოს მედიამ ერთი საინტერესო ფოტოც გაავრცელა - მსაჯების გადაწყვეტილებით უკმაყოფილო ახმახი ფრანგი როგორ ტიროდა თავისი მენეჯერი ძმის მკერდზე თავმიდებული.

თუმცა, როგორც გითხარით, ფრანგს მაშინ ილეთი არ წაუგია, ფანდით კი ბოლოს კიდევ უფრო ადრე - 2008 წელს, პეკინის ოლიმპიადის მეოთხედფინალში იმხანად უკვე კაშკაშა „ვარსკვლავი“ უზბეკთა მომავალ ვიცე-ჩემპიონ აბდულო ტანგრიევთან დამარცხდა.

ოფიციალურად რინერის ანგარიშზე 152 წაუგებელი შეხვედრაა. თუმცა, როგორც ყველაფერს აქვს ამქვეყნად დასაწყისიც და დასასრულიც, მისი წაუგებელი სერიაც დამთავრდა.

ვინ შეწყვიტა ეპოქა?

რინერის დამარცხებას ვინ შეძლებდა, თუ არა ისევ იაპონელი! მძიმეწონოსანის კვალობაზე პატარა კოკორო კაგეურამ დიდ საფრანგეთს ნამდვილი თავზარი დასცა! თანაც, ეს შიგ პარიზში, მართალია, მთლად ვერსალში არა, მაგრამ ბერსის სასახლეში გააკეთა! ის, რაც 2017 წელს გურამ თუშიშვილს უნდა მოეხერხებინა, კაგეურამ გააკეთა.

24 წლის კაგეურა იმ ახალი თაობის წარმომადგენელია, რომელიც დიდ ასპარეზზე მიმდინარე ოლიმპიურ ციკლში გამოვიდა: უფროსებში პირველ სერიოზულ წარმატებას 2016 წელს მიაღწია, როცა ტოკიოს „დიდი მუზარადის“ ფინალში გავიდა, სადაც თავისივე თაობის წარმომადგენელ თანამემამულე ტაკეში ოჯიტანისთან წააგო. საინტერესოა, რომ ის ჯერ იაპონიის ჩემპიონიც არაა, სამაგიეროდ, აზიის 2016 წლის გამარჯვებულია.

კაგეურას ჯერ ტოკიოს ოლიმპიადაზე გამოსვლაც არა აქვს განაღდებული.

იაპონელებს შანსი მსოფლიოს ბოლო ორ პირველობაზე მიეცათ, სადაც რინერი არ გამოსულა, თუმცა ვერ გამოიყენეს - 2018 წელს ბაქოში მათი იმედები თუშიშვილმა დაასამარა, შარშან კი მათსავე მშობლიურ ტოკიოში სანუკვარი ტროფეი ქვედა წონიდან ოლიმპიური ჩემპიონის ტიტულით ამონაცვლებულმა ჩეხმა ლუკაშ კრპალეკმა აართვათ ცხვირწინ - ფინალში ჰარასავას მოუგო. სხვათა შორის, იმ შეხვედრას ჩვენი წარმატებული მსაჯი ვლადიმერ ნუცუბიძე სჯიდა, ვინც ჰარასავა დამატებით დროში მოხსნა, თუმცა, ჩემი აზრით, იაპონელი მანამდეც იმსახურებდა მოხსნას.

როგორც გითხარით, რინერმა გამოტოვა მსოფლიოს ბოლო ორი ჩემპიონატი. მისი სურვილი გასაგებია - გახდეს სამგზის ოლიმპიური ჩემპიონი და გაუტოლდეს ამ წოდების ერთადერთ მფლობელს, იაპონელ ტადაჰირო ნომურას (60).

779
მკითხველის კომენტარები / 1 /
გურამი ონიანი
0
უყურე მთლიან ტურნირს და რინერი რომ დამარცხდებოდა ეჭვიც არ მეპარებოდა კაი იქნებოდა ქართველის ხელით დამარცხებულიყო. ჩემი აზრით რინერის ეპოქა დასრულებულია. მაგრამ აქ სულ სხვა მიზეზის გამო ვწერ ეხლა წავიკითხე მარაკეშის გრამპრის შემადგენლობა და იქ ჩვენი გოგოების შემადგენლობა არ არის დარეგისტრირებული! ეს კი იმას ნიშნავს რომ გოგოები ფაქტობრივათ წყვიტავენ ოლიმპიადის ლიცენზიისთვის ბრძოლას რაც ძალიან გულდასაწყვეტია ძიუდოს გულშემატკივრისთვის!!!! და კიდევ ფედერაციას თქვენ კაი ხალხო პარიზის გრანსლემს აჭიდავებთ გოგოებს სადაც საფრანგეთის იაპონიის კოსოვოს კანადის პირველი და მეორე ნაკრებები მონაწილეობენ და მაროკოს გრან პრიზე სადაც არცერთი მადგანი არ მონაწილეობს და სალიცენზიო ქულები თითქმის იგივეა მაგაზე უარს აცხადებთ? გასაგებია დიუსელდორფში არ მომნაწილეობა რადგან დასვენება სჭირდებოდათ მაგრამ მაროკოზე უარის თქმა სასაცილოა თუ არა ღალატი!!!
მსგავსი ამბები
რუბრიკის სხვა სიახლეები
;