ძიუდო. როდიდან ან რა ფორმატით ივარჯიშებს ნაკრები?

ჯერაც გაურკვევლობაშია ჩვენი ქვეყნის ერთ-ერთი საუკეთესო და ოლიმპიურ ჭრილში დასაყრდენი გუნდი - ძიუდოისტთა ნაკრები. მართალია, ხელისუფლებისგან მიღებულია გარანტია, რომ თამაშებისთვის მოსამზადებელ პროცესში ჩართულმა ათლეტებმა განაახლონ ვარჯიში, თუმცა ჯერ მაინც არაა გადაწყვეტილი, ეს გუნდი როდის ან რა ფორმატით გააგრძელებს ვარჯიშს და მზადებას ტოკიოს თამაშებისთვის.

ჯერჯერობით ფედერაციაც გაურკვევლობაშია და ელოდება სპორტის სამინისტროს გადაწყვეტილებას, ბიუჯეტს რამდენს დაუმტკიცებენ, რადგან პანდემიის გამო ხელისუფლებასაც უწევს ქვეყნის მთავარი საფინანსო დოკუმენტის კორექტირება, თუმცა ფინანსები იმდენად არაა პრობლემა, რამდენადაც თავად სავარჯიშო პროცესი, რასაც ვირუსი აფერხებს.

ძიუდოისტთა წინაშე ჯერჯერობით ორი ვარიანტია - ან მცირე ჯგუფებად დაყოფილებმა გააგრძელონ ვარჯიში, ან მიჰყვნენ ჯანდაცვის სამინისტროს მიერ გაცემულ რეკომენდაციებს და დაგეგმონ ჩვეულებრივი შეკრება, ოღონდ მის დაწყებამდე ორკვირიანი კარანტინი უნდა გაიარონ და ჩააბარონ ტესტები. პირველი ვარიანტი მათთვის უცხო არაა - კარგა ხანია, ჩვენი ნაკრები ისედაც ჯგუფებად დაყოფილი ვარჯიშობს, პირად მწვრთნელებთან ერთად და არაა გამორიცხული, მომავალშიც ასე გააგრძელონ მზადება.

მოგეხსენებათ, ამ ცოტა ხნის წინ საქართველოს ეროვნულმა ოლიმპიურმა კომიტეტმა ლიცენზიებისთვის ბრძოლაში ჩაბმულ ფედერაციებთან გამოკითხვა ჩაატარა, რომელ ბაზებზე სურდათ ვარჯიშის განახლება. ძიუდოისტებმა საშეკრებო ვარიანტად თბილისი, კონკრეტულად კი ორი ბაზა მიუთითეს: ძიუდოს აკადემია და „შევარდენის“ დარბაზი მარჯანიშვილის ქუჩაზე. თუმცა მას შემდეგ ვითარება სასიკეთოდ შეიცვალა და მალე სასტუმროებიც ამუშავდებიან, რაც ძიუდოსაც უქმნის დამატებით პერსპექტივას - ყველას არა, მაგრამ მათ ნაწილს სპორტული დარბაზიც გააჩნია, სადაც ასევე შესაძლებელია შეკრების გავლა. ეს განსაკუთრებით იმ სასტუმროებზე ითქმის, რომლებიც ბორჯომ-ბაკურიანში, დუშეთსა და ქართული სპორტისთვის მოსამზადებელ ბაზებად ქცეულ ტრადიციულ ზონებში მდებარეობენ.

თუმცა, კიდევ ვიმეორებთ, რომ ეს ყველაფერი ბიუჯეტზეა დამოკიდებული, რა მოცულობის თანხას დაუმტკიცებენ და მხოლოდ ამის შემდეგ უფრო კონკრეტულად დაალაგებენ გეგმებს. ძიუდოს ფედერაციაში იმედოვნებენ, რომ ეს საკითხები უკვე მომავალ კვირაში საბოლოოდ გაირკვევა. აქ კიდევ ერთხელ უნდა დავაზუსტოთ, რომ ამ ეტაპზე საუბარია მხოლოდ ვარჯიშის განახლებასა და საშეკრებო ფორმატზე, თორემ ტურნირებზე ჯერაც ვერავინ ფიქრობს.

არადა, ბიუჯეტის კორექტირება რომ მოხდება, გასაგებია, ვინაიდან გაზაფხულსა და ზაფხულში გასამართავი ყველა ტურნირი გაუქმდა - სექტემბრამდე ყველა შეჯიბრება გადადებულია. მართალია, ძიუდოს ევროპის კავშირმა თავის კალენდარში ევროპის წლევანდელ ჩემპიონატს უკვე მიუჩინა ადგილი - ნოემბერში ისევ ჩეხეთში ჩატარდება და თანაც სურთ, რომ სამივე ასაკში, ანუ უფროსებში, ახალგაზრდებსა და ჭაბუკებში ერთად გამართონ, ამ შეჯიბრებისთვის მომზადებას კი სათანადო პირობები სჭირდება. თუმცა დაბეჯითებით ვერც ევროპული ორგანიზაცია იტყვის, რომ იმ დროისთვის ვირუსი აღარ შეგვაწუხებს და კონტინენტის პირველობა ნამდვილად  გაიმართება, საქართველოში კი ამაზე, მართალია, ღიად და დაბეჯითებით არ საუბრობენ, თუმცა ვირუსის მეორე ტალღას სწორედ ოქტომბერ-ნოემბერში ელოდებიან...

ერთი სიტყვით, ჩვენი ბედი მთლიანად კორონავირუსზეა დამოკიდებული.

ამასობაში კვლავაც გაურკვეველია მსოფლიოს რეიტინგის ბედი, რომელიც განსაზღვრავს ოლიმპიადის ლიცენზიებს. მოგეხსენებათ, რეიტინგში ერთწლიანი ხანდაზმულობის შემდეგ ქულები ნახევრდებოდა, ხოლო ორწლიანობის შემდეგ საერთოდ უქმდებოდა. გაურკვეველიც სწორედ ესაა - რა ბედი ელის ამ ქულებს. თავიდან საერთაშორისო ფედერაციამ განაცხადა, რომ ეს განულება, განახევრების პროცესი ჩვეულებრივად გაგრძელდებოდა, მაგრამ მაშინ ამხელა პაუზას ისინიც არ ელოდნენ. გადაჭრით მხოლოდ ისაა ცნობილი, რომ სალიცენზიო შეჯიბრებების ბოლო ვადამ ერთი წლით ანუ 2021 წლის ივნისამდე გადაიწია, სხვა დანარჩენზე კი ვერსიები ბლომადაა, მაგრამ როგორც საქართველოს ძიუდოს ფედერაციაში გვითხრეს, საერთაშორისო ფედერაციიდან მათ ოფიციალური დოკუმენტი ჯერ არ მიუღიათ.

შეგახსენებთ, რომ ჩვენს ვაჟ ძიუდოისტებს ყველა წონაში, პრაქტიკულად, განაღდებული აქვთ ლიცენზიები. ასევე რეალურია, რომ ქალებშიც მოვიპოვოთ საგზური. თუმცა ვაჟებში სარეიტინგო ადგილებია საინტერესო ანუ რვა განთესილში მოხვედრა, რაც ნებისმიერ ტურნირზე ოლიმპიადის ჩათვლით შედარებით „მშვიდი ცხოვრების“ გარანტიაა. არადა, სამწუხაროდ, ბოლო პერიოდში ჩვენებმა მოწინავე ოქტეტში გვარიანად დათმეს პოზიციები და ამ ხარვეზის გამოსწორება იყო საჭირო.

536
მკითხველის კომენტარები / 0 /
მსგავსი ამბები
რუბრიკის სხვა სიახლეები
;