ძიუდო. რუმინეთში, ევროპის თასზე, არასრულად

11-12 აგვისტოს რუმინეთის ქალაქ კლუჟში ახალგაზრდა ძიუდოისტთა შორის ევროპის თასი ტარდება, რომელშიც ჩვენგან მონაწილეობას ბიჭებიც მიიღებენ და გოგონებიც. ახალგაზრდები ევროპის ჩემპიონატისთვის ემზადებიან, რომელიც 13-16 სექტემბერს სოფიაში ჩატარდება.

ამიტომ ჩვენებისთვის ეს შეჯიბრება სასტარტოცაა და შესარჩევიც. თუმცა უმეტეს წონებში მწვრთნელებს უკვე გარკვეული ჰყავთ სოფიაში წასაყვანი ათლეტები, მაგრამ შემადგენლობის დასახელებას ჯერ არ ჩქარობენ.

ეს განსაკუთრებით ბიჭებზე ითქმის, სადაც მთავარი მწვრთნელი ლაშა გუჯეჯიანი ისევ არჩევს კანდიდატებს, თორემ გოგოებში დიდი კონკურენცია არცაა და გია თენაძეც აქცენტს იმ გუნდზე აკეთებს, რომელიც რუმინეთში იჭიდავებს.

აქვე გეტყვით, რომ იქ გოგონებში მხოლოდ ხუთი მონაწილე გვეყოლება, თუმცა ბიჭებიც არასრული ნაკრებით იქნებიან - მონაწილე არ გვეყოლება 55 და 90 კილოგრამებში. ამასთან, მძიმეწონოსან ამირან წიქორიძისთვის ეს სარეაბილიტაციო შეჯიბრებაა, რადგან ოპერაციის შემდგომ პერიოდს გადის.

ტურნირის დასრულების შემდეგ ბიჭები საქართველოში დაბრუნდებიან და აქ გააგრძელებენ ვარჯიშს, 19-ში კი შეკრებას დაიწყებენ გორში. გოგოები რუმინეთში დარჩებიან, რადგან იქ ერთობლივი საწვრთნელი კემპი ტარდება და მასში მიიღებენ მონაწილეობას. მერე თბილისში ჩამოვლენ და რამდენიმე დღეში უკვე მინსკში გაფრინდებიან, სადაც უფროსებში ტარდება "ევროპის ღია თასი". მისი დასრულების შემდეგ იქაც იმართება ერთობლივი შეკრება და ჩვენებიც იქ ივარჯიშებენ, მისი დასრულების შემდეგ კი ჰოლანდიაში წავლენ შეკრებაზე.

მინსკში 18-19 აგვისტოს ტურნირში მარიამ ჯანაშვილიც (52) იჭიდავებს, რომელიც ასევე დარჩება შეკრებაზე. ჯერჯერობით გაურკვეველია, წავა თუ არა ბელარუსში უკრაინიდან გადმოყვანილი ტატიანა შუკვანი (52), რადგან საერთაშორისო ფედერაციას კვლავაც არ გამოუგზავნია მასზე დასტური, რომ უფლებას აძლევს, იასპარეზოს საქართველოს სახელით. არადა, გადმოსვლის ნება უკრაინის ფედერაციამ უკვე დართო.

ჩვენი გუნდების შემადგენლობები ასეთია:

ბიჭები
ჯაბა პაპინაშვილი (60 კგ), გიორგი ნიაზაშვილი და თემურ ნოზაძე (66 კგ), ბაგრატ ნინიაშვილი და ალეკო მამიაშვილი (73 კგ), ტატო გრიგალაშვილი (81 კგ), ზაურ კენჭაძე (100 კგ), გელა ზაალიშვილი და ამირან წიქორიძე (+100 კგ )

გოგონები
ელენე ყიფშიძე (48 კგ), ეთერ ლიპარტელიანი და მზია ბებოშვილი (57 კგ), მარიამ ჭანტურია (70 კგ), სოფიო სომხიშვილი (+78 კგ )

ყოველდღიური სპორტული გაზეთი "ლელო"
614
მკითხველის კომენტარები / 0 /
მსგავსი ამბები
რუბრიკის სხვა სიახლეები